18 Nëntor 2019

Miliband rikonfirmon përkrahjen britaneze për Kosovën

Londër, 23 mars - Gjatë qëndrimit të tij në Londër, Ministri i Punëve të Jashtme i Republikës së Kosovës, Skender Hyseni është pritur sot nga sekretari i jashtëm britanik David Miliband.

Gjatë takimit miqësor dhe shumë përmbajtësor, ministri Hyseni dhe sekretari i jashtëm Miliband, u përqëndruan në çështje shumë të rëndësishme për Kosovën, me theks të posaçëm te zhvillimet e brendshme, procesi i njohjeve, periudha e pas opinionit këshilldhënës të Gjykatës Ndërkombëtare të Drejtësisë, përkrahja e mëtejme e Britanisë së Madhe për Kosovën etj.

Ndërsa e njohu me progresin që Kosova ka bërë gjatë dy viteve të pavarësisë së saj, ministri Hyseni ndau me sekretarin e jashtëm Miliband pikpamjet e Kosovës dhe institucioneve të saj për çështje të rëndësishme si marrëdhëniet ndërfqinjësore me Serbinë.

Duke u ndalur në këtë pikë, ministri Hyseni e siguroi sekretarin e jashtëm Miliband se Kosova është e interesuar për marrëdhënie të mira me Serbinë, së pari se, agjenda e përbashkët e të dy vendeve është ajo e integrimeve evropiane dhe së dyti se, kjo i shërben para së gjitha paqes dhe stabilitetit të dy vendeve, por edhe rajonit. Ndërkaq, ministri Hyseni e artikuloi qëndrimin tashmë të njohur se nuk mund të ketë rinegociata për pavarësinë e Kosovës.

Duke folur për rëndësinë që ka për Kosovën procesi i njohjeve, bashkëbiseduesit u ndalën edhe te periudha e pas dhënies së opinionit këshilldhënës të GJND-së, periudhë kjo e cila sipas ministrit Hyseni është shumë e rëndësishme dhe e lidhur ngushtë me procesin e njohjeve.

Në këtë kuadër, ministri Hyseni kërkoi nga sekretari i shtetit Miliband bashkërendim me qeverinë e tij për hapat që duhen ndërmarrë pas dhënies së mendimit këshilldhënës të GJND-së. Nga ana e tij, sekretari i shtetit Miliband ndau pikëpamje të përbashkëta me ministrin Hyseni sa i përket progresit dhe arritjeve që ka bërë Kosova në dy vitet e pavarësisë së saj, ndërsa kërkoi nga qeveria e Kosovës që të vazhdohen përpjekjet për të luftuar fenomenet negative të shoqërisë kosovare. Po ashtu, sekretari i jashtëm Miliband rikonfirmoi përkrahjen e mëtejme të Britanisë së Madhe për shtetin e  Kosovës.

Në agjendën e takimeve zyrtare të ditës së sotme të ministrit Hyseni në Londër, ishte edhe takimi me ministrin për Evropë në Foreing Office Kris Brajant (Chris Bryant).

Gjatë këtij takimi bashkëbiseduesit folën për zhvillimet në Kosovë, për arritjet që ajo ka pasur në këta dy vjet të pavarësisë së saj si dhe për sfidat me të cilat Kosova po përballet dhe pritet të përballet në të ardhmen. Biseda pati në spikamë procesin e njohjeve dhe rëndësisnë që ai ka për Kosovën.

Edhe nga ministri për Evropë në Foreing Office Kris Brajant, ministri Hyseni mori rikonfirmimin e përkrahjes së mëtejme që Britania e Madhe do t’i japë Kosovës në të gjitha planet, veçmas në procesin e njohjeve. Po ashtu, gjatë bisedës, u fol edhe për marrëdhëniet me Serbinë, veçmas për nevojën e integrimit të mëtejmë të komunitetit serb në shoqërinë kosovare.

Në këtë kuadër, ministri Hyseni e njohu bashkëbiseduesin me përpjekjet dhe hapat që ka ndërmarrë qeveria kosovare në këtë kontekst, për çka edhe u përqëndrua te pjesëmarrja e lartë që komuniteti serb pati në zgjedhjet lokale të nëntorit, pjesëmarrje kjo më e larta e komunitetit serb në ndonjë palë zgjedhje të zhvilluara në Kosovën e pasluftës.

Kalendari

Ngjarjet e datës 18 nëntor 2019

- Oda Ekonomike e Kosovës do të mbajë konferencë për media në të cilën do të prezentojë hulumtimin rreth opinionit të bizneseve për marrëveshjen Kosovë-Serbi. (Objekti i Odës Ekonomike të Kosovës, ora 9:00)

- Organizata për Demokraci, Anti-korrupsion dhe Dinjitet, ÇOHU! me përkrahjen e Ambasadës së Mbretërisë së Holandës përmes Programit Matra organizon tryezë në të cilën do të publikohet raporti me titull Qasja në Drejtësi. (Hotel Sirius, ora 10:00)

- Qendra e Inovacionit të Kosovës dhe Oda Ekonomike Amerikane në Kosovë organizojnë ceremoninë e hapjes së Javës Globale të Ndërmarrësisë 2019 në Kosovë. (Menza "Ramiz Sadiku" në Prishtinë, ora 10:00)

- Grupi Tematik për të Drejtat e Fëmijëve në Shëndetësi në kuadër të Koalicionit te OJQ-ve për Mbrojtjen e Fëmijëve organizon konferencën për media në te cilën do të prezantojë një dokumet me të dhëna dhe rekomandime për mbrojtjen e ambientit në Kosovë. (Qendra e Resurseve për OSHC, Forumi për Iniciativa Qytetare në Lagjen Pejton, ora 10:00) 

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të organizojë tryezë me titull “Pandëshkueshmëria e korrupsionit”. (Hotel Sirius, ora 10:00)

- Instituti Kërkimor për Çështje Evropiane dhe të Zhvillimit organizon prezantimin e studimit per Çështjen e Kompleksit të Trepçës dhe Çështjen e Reparacioneve për Krimet e Luftës të kryera në Kosovë në Kontekstin e ‘Finales së Madhe’ eventuale ndërmjet Kosovës dhe Serbisë. (Hotel Swiss Diamond, ora 10:00)

- Komuna e Prizrenit në bashkëpunim me PPSE Swisscontact dhe SHB Sharri përuron shtegun turistik të ri Via Ferrata "Panorama". (Gryka e Lumbardhit, 4.5 km nga qendra e qytetit, ora 11:00 - transporti i organizuar nga Komuna e Prizrenit, nisja nga Shtëpia e Bardhë, ora 10:30)

- Në kuadër të aktivitet kulturor kushtuar "Ditet e Alfabetit", promovohet botimi 'Levizja Protestante te shqiptaret 1818-1908" te autorit prof. dr. David Hosaflook. (Biblioteka Kombetare "Pjeter Bogdani", ora 10:30)

- Muzeu Kombëtar i Kosovës hap ekspozitën “Bienalen e Akuarelit Edicioni i 2-të” e cila sjellë vepra arti të artisëve nga 70 vende të botës me rreth 380 piktura. (Muzeu Kombëtar, ora 19:00)