13 Dhjetor 2019

Kuvendi i ri të vendosë si prioritet miratimin e Rregullores së Re të Punës

Prishtinë, 22 nëntor - Në pritje të certifikimit të rezultateve nga zgjedhjet parlamentare të 6 tetorit 2019, dhe formimit të institucioneve të reja, Instituti Demokratik të Kosovës (KDI), sot ka lansuar platformën e dialogut “Kuvendi 2020”, në mes të përfaqësuesve politikë dhe shoqërisë civile me qëllim që të rrisë debatin mbi transparencën, llogaridhënien dhe efikasitetin e institucionit të Kuvendit.

Në funksion të kësaj, KDI publikoi analizën e shkurtër “Tejkalimi i i sfidave të Kuvendit përmes miratimit të Rregullores së re të Punës”.

Sipas KDI, miratimi i Rregullores së re të Punës, përbën një mundësi unike për legjislaturën e re t’i trajtojë me prioritet disa mangësi që e kanë përcjellë punën e Kuvendit në vitet e kaluara.

Platforma 2020, do të jetë në funksion të trajtimit edhe të disa temave tjera në interes të publikut dhe qeverisjes së mirë si: Reforma Zgjedhore, Ligji për financimin e subjekteve politike,  Ligji për lobimin dhe Konsensusi për dialogun Kosovë-Serbi. 

Në dy legjislaturat e fundit, Kuvendi ka çaluar në organizimin e punës së  tij, gjë që është përkthyer në performancë të dobët të këtij institucioni. Kryesia e Kuvendit nuk është mbledhur me rregull për të caktuar seanca plenare.

Shmangiet nga procedurat e parapara në Rregulloren e Punës për shqyrtimin e projektligjeve kanë qenë të shpeshta, ndërsa mekanizmat e mbikëqyrjes parlamentare nuk janë ushtruar në mënyrë efikase.

Deputetët kanë abstenuar nga ushtrimi i mandatit të tyre kushtetues, duke mos marrë pjesë në seanca dhe mbledhje të komisioneve, si dhe duke mos marrë pjesë në votim përkundër që kanë qenë të pranishëm në seancë.

Të gjitha këto mangësi kërkojnë vëmendje dhe zgjidhje praktike nga deputetët e ardhshëm të Kuvendit, i cili pritet të ketë rreth 50 deputetë të zgjedhur për herë të parë.

Rregullorja e re do të mund të adresonte shumë çështje teknike dhe do ta rriste përkushtimin, disiplinën dhe mbi të gjitha efikasitetin e Kuvendit në ligjbërje, përfaqësim e mbikëqyrje.

Alexander Chavarria nga NDI, theksoi se është e rëndësishme dhe urgjente që të ketë një rregullore të re të punës.

Gjithashtu sipas tij është shumë me rëndësi që Kuvendi të sigurohet që qeverisja në të gjitha nivelet të jetë transparente, llogaridhënëse dhe e përgjegjshme.

Chavarria ka thënë se duhet të kuptohet që janë bërë 10 vjet prej kur është miratuar Rregullorja e fundit e Punës, ndërsa ka theksuar nevojën për rishikim të saj në mënyrë që ajo t’i adaptohet kontekstit politik. “Rregullorja është dokument ‘i gjallë’ që natyrisht duhet të rishikohet të paktën për çdo mandat”, ka thënë ai. 

Ai ka theksuar se ekziston një dokument i mirëkonsoliduar në Kuvend dhe sipas tij, jo doemos duhet të ketë vonesa në drejtim të rregullores së re.

Albulena Haxhiu nga Lëvizja Vetëvendosje, ka theksuar se prioritet i Kuvendit të ri duhet të jetë rregullorja e re, në mënyrë që të shmanget pengesat që kanë shoqëruar legjislaturat e kaluara.

Haxhiu ka thënë se pajtohet që legjislatura e fundit nuk ka pasur performancë të mirë dhe se përgjegjësinë e ka Kryesia e Kuvendit.

Sipas saj ka pasur organizim të çrregullt të punës në përgjithësi teksa ka thënë se krahas kësaj një pjesë e komisioneve parlamentare kanë bërë punë të mirë.

Haxhiu ka theksuar se duhet të ndodh fuqizimi i rolit të Kuvendit, mekanizmave të tij dhe  padyshim edhe fuqizimi i rolit të opozitës. “Qasja e rregullores nuk duhet të jetë shtypja e opozitës por fuqizimi i saj dhe i Kuvendit”, shtoi ajo.

Armend Zemaj nga Lidhja Demokratike e Kosovës, ka thënë se Kuvendi nuk ka arritur që nga legjislatura e tretë të miratoj rregulloren e re dhe se tani duhet të shihet se si të arrihet konsensusi politik për të.

Zemaj ka theksuar se më e rëndësishmja është që të avancohet me demokratizimin e mëtejmë të raporteve në të gjitha instancat e Kuvendit, funksionalizimin e organeve të Kuvendit, racionalizimin e shfrytëzimit të kapaciteteve dhe racionalizimin kohor.

Dy legjislaturat e fundit sipas tij, kanë lënë shumë për të dëshiruar në çdo aspekt.
 

Kalendari

Ngjarjet e datës 13 dhjetor 2019 - Aleanca Kosovare e Bizneseve dhe Ministria e Tregtisë dhe Industrisë organizojnë hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2019” me moto: Unë Konsumoj Produkte Vendore, Po JU? (Hotel Emerald, ora 9:30)

- Organizata për Fëmijët pa Kujdes Prindëror organizon konferencë nacionale për të diskutuar për situatën e strehimit familjar në Kosovë, për të arriturat, sfidat dhe planet e ardhshme për të zhvilluar me tutje këtë shërbim për fëmijët pa përkujdesje prindërore. (Hotel Sirius, ora 9:30)

- Komisioni i Pavarur për Miniera dhe Minerale organizon takim vjetor informues për përfaqësuesit dhe personat përgjegjës të ndërmarrjeve që merren me shfrytëzimin dhe përpunimin e lëndëve minerare, përpiluesit e plan-programeve të hulumtimit, përpiluesit e projekteve gjeologjike dhe të shfrytëzimit. (Salla e madhe në ndërtesën e Ministrisë së Administratës Publike, ora 10:00)

- Instituti Columbus organizon tryezë diskutimi me temë "Efekti i korrupsionit tek qytetarët: Diskutimi i fondit për trjatimin e pacientëve jashtë institucioneve publike të Kosovës. (Hotel Sirius, ora 10:00)

- Ministria e Tregtisë dhe Industrisë organizon konferencë informuese për zhvillimin e sektorit privat ku do të behet edhe ndarja e mirënjohjeve për “Ndërmarrjet me të suksesshme të vitit 2019”. (Hotel Emerald, ora 10:00)

- Demokraci Plus në bashkëpunim me Fondacionin Konrad Adenauer organizon konferencën lidhur me Procesin e Berlinit dhe obligimet për Sundim të Ligjit dhe Mirëqeverisjen. (Hotel Swiss Diamond, ora 10:00)

- Kryeministri në detyrë Ramush Haradinaj zhvillon vizitë pune në Ministrinë e Mbrojtjes, për të shënuar  një vjetorin e miratimit të tri Ligjeve, Ligjin për Forcën e Sigurisë, Ligjin për Shërbimin në FSK dhe Ligjin për Ministrinë e Mbrojtjes. (Ministria e Mbrojtjes, ora 11:00)

- Komuna e Istogut organizon diskutim publik me qytetar për projekt rregulloren komunale për taksa, ngarekesa dhe gjoba. (Ndërtesa e Komunës së Istogut, ora 11:00)

- Ekipi i Kombëve të Bashkuara në Kosovë së bashku me Klubin Ndërkombëtarë të Prishtinës  organizon panairin e festave të fundvitit. (Ndërtesa e Termokiss në Dardani, ora 12:00)

- Nxënësit finalistë nga e gjithë Kosova të klasave 3-12 do të konkurrojnë në garën e katërtë vjetore Po-e-Zë. (Amfiteatri i Bibliotekës Kombëtare të Kosovës, ora 12:00)

 - Muzeu Kombëtar i Kosovës organizon hapjen e ekspozitës me fotografi 'Bukuria e betonit' nga autori Etienne Rémond. (Muzeu Kombëtar, ora 12:00)

- Kryeministri në detyrë Haradinaj, në përvjetorin e rënies së dëshmorit dhe heroit Mujë Krasniqi, bën homazhe dhe vendos kurora lulesh te shtatorja e heroit. (Klinë, ora 13:00​)

- Hapet panairi “Punimet artizanale përtej kufijve” i organizuar për nder të festave të fundvitit, në kuadër të projektit ndërkufitar Kosovë - Maqedoni Veriore, “Ndërtimi i konkurrencës përmes bashkëpunimit dhe inovacionit: Qasja në tregjet e eksportit për produktet artizanale’’. (Restorant ‘’Planet’’ në Gjilan, ora 14:00)

- Instituti Kosovar për Hulumtim dhe Zhvillim të Politikave organizon tryezë diskutimi me temë: “Ligjërisht (t’pa) diplomuar?” e cilan mbahet me qëllim të diskutimit rreth problemit të verifikimit të diplomave të studentëve të cilët kanë ndjekur studimet pranë Bartësve Privatë të Arsimit të Lartë. (Hotel Sirius, ora 14:00)

- Projekti Climate 4 Change, i cili mbështetet nga Ambasada Norvegjeze dhe nga Fondacioni Kosovar për Shoqëri Civile organizon një debat politik - publik në të cilën do të diskutotohet për klimën. (Salla e Kuqe në Pallatin e Rinisë dhe Sporteve, ora 17:00)

- Ambasadorja e Francës në Kosovë, Marie-Christine Butel, organizon një pritje e cila si qëllim ka promovimin e djathit të Sharrit. (Rezidenca e Francës në Arbëri, ora 17:30)

- Instituti i Kosovës për Drejtësi organizon shfaqjen e dokumentarit “Java Kundër Korrupsionit 2018”.  (Modelarium i Fakultetit te Arkitekturës të Universitetit të Prishtinës, ora 18:00)