Prishtinë, 28 prill - Zëvendëskryeministri dhe ministri i Drejtësisë, Prof. Dr. Hajredin Kuçi, u takua me kryeprokurorin e Republikës së Çekisë, Pavel Zeman.

Pas këtij takimi, ministri Kuçi tha së në takim me Kryeprokurorin çek, kanë biseduar për mundësitë e thellimit të bashkëpunimit në fushën e drejtësisë.

“Biseduam për mundësitë e bashkëpunimit në mes të dy vendeve tona dhe bashkëpunimin në mes të dy sistemeve të drejtësisë, ku gjeta një mundësi të qartë të bashkëpunimit. Ne kemi bashkëpunuar edhe me herët, por tani do të kemi një bashkëpunim konkret."

"Natyrisht biseduam edhe për raportet tona që i kemi në bashkëpunim me EULEX-in, ku theksova suksesin që e kemi të përbashkët, bashkëpunimin e përbashkët në vendosjen e rendit dhe ligjit, po edhe në ngritjen e kapaciteteve tona si vend, në fushën e drejtësisë. Në takim theksova edhe çështjet të cilat janë të hapura për vendosjen e rendit dhe ligjit në tërë territorin e Republikës së Kosovës dhe në veçanti në veri”, tha ministri Kuçi.

Po ashtu, ministri Kuçi tha së kanë biseduar për ndihmat konkrete dhe ka marrë premtim nga Kryeprokurori çek, që në Agjencinë për Administrimin e Pasurisë së Sekuestruar ose Konfiskuar, do të marrim një ekspert nga Republika e Çekisë, për përgatitjen e kuadrit kosovar.

Edhe kryeprokurori çek, Pavel Zeman, tha së në takim kanë biseduar për mundësitë e thellimit të bashkëpunimit në fushën e sistemit të drejtësisë.

“Kemi biseduar me Ministrin në lidhje me bashkëpunimin në fushën juridike. Po ashtu, biseduam për mundësitë e trajnimit për Prokurorët kosovarë, si dhe për ndihmën që Çekia mund ta jep në Agjencinë për Administrimin e Pasurisë së Sekuestruar ose Konfiskuar”, tha kryeprokurori Zeman.

Gjatë këtij takimi, është biseduar edhe për mundësitë e thellimit të bashkëpunimit në fushën juridike ndërkombëtar, ku me këtë rast ministri Kuçi ka shprehur gatishmërinë e tij, që Kosova dhe Çekia të nënshkruajnë marrëveshjeve juridike ndërkombëtare në fushën penale dhe civile.