13 Dhjetor 2019

Emancipimi i gruas në Kosovë është emancipim i tërë shoqërisë

Prishtinë, 22 nëntor - Presidenti i Republikës së Kosovës, Hashim Thaçi, ka marrë pjesë sot në lansimin e Studimit mbi Mirëqenien dhe Sigurinë e Grave në Kosovë, të organizuar nga OSBE-ja.

Presidenti Thaçi ka thënë se pas pranimit të raportit ndjenja e parë është ajo e dëshpërimit me pozitën e gruas, me dhunën që ushtrohet kundër gruas, me kërcënimet për mirëqenien dhe sigurinë e tyre në shoqërinë kosovare.

Sipas tij, traumat e thella të luftës dhe gjenocidit, të represionit dhe të diskriminimit, të përjashtimit dhe mohimit të të drejtave, prekin thellë në shoqërinë tonë.

“Prekin edhe pozitën e gruas dhe mundësinë e tërë shoqërisë për t’u përballur me problemet më të thella dhe më të rëndësishme”, ka thënë presidenti Thaçi.

Kreu i vendit ka shtuar se po në këtë raport ka gjetur arsye edhe për optimizëm dhe kurajo për të vazhduar me zhvillimin dhe transformimin e shoqërisë kosovare.

Ai ka përmendur tri të arritura të rëndësishme të këtij raporti.

“E arritura e parë është se edhe Kosova është përfshirë në këtë studim të rëndësishëm”, ka thënë presidenti Thaçi, duke shtuar më tej se është “i vetëdijshëm për pengesat që i bëhen shtetit të Kosovës në organizatat ndërkombëtare”.

Presidenti ka thënë se nuk dëshiron të flasë sa e padrejtë është kjo ndaj qytetarëve të Kosovës, por ka shprehur mirënjohje për përfshirjen e Kosovës në këtë hulumtim.

“U jam mirënjohës që keni vënë të drejtat dhe liritë e individit, qytetarit të Kosovës, mbi çdo politikë të ditës e interes të grupeve apo shteteve të ndryshme”, ka thënë ai.

Presidenti Thaçi më tej ka thënë se e arritura e dytë është se anketa e publikuar nuk bën vetëm konstatimin e gjendjes, por kërkon shkaqet, analizon shkaqet dhe pasojat, si dhe jep rekomandime për të përmirësuar gjendjen.

“Mostra e respodentëve, pyetjet, intervistat, kanë nxjerrë në pah të dhëna që kërkojnë debat e diskutime thelbësore në shoqërinë kosovare. Për më tepër, anketa që po e publikoni sot, nuk bën vetëm konstatimin e gjendjes, por kërkon shkaqet, analizon shkaqet dhe pasojat, si dhe jep rekomandime për të përmirësuar gjendjen. Po flasim për përmirësimin e pozitës së gruas në Kosovë, për fuqizimin e saj”, ka shtuar presidenti.

Emancipimi i gruas në Kosovë, ai ka thënë se do të thotë emancipim i tërë shoqërisë.

“Fuqizimi i gruas në Kosovë do të thotë fuqizim i parimeve të lirisë, barazisë, dinjitetit që vlejnë për tërë shoqërinë tonë”, ka thënë presidenti Thaçi, duke shtuar se “me punën e juaj ju po ndihmoni debatin e përgjithshëm shoqëror në Kosovë dhe emancipimin e tërë shoqërisë”.

I pari i vendit ka thënë se duke organizuar konferenca të tilla mbahet në majë të agjendës çështja e barazisë gjinore dhe nevoja për fuqizim të gruas.

“Të dhënat që do të shpalosni sot këtu do të kontribuojnë për një debat më të argumentuar. Rekomandimet tuaja do të ndihmojnë në ndërmarrjen e hapave për të përmirësuar pozitën e gruas në shoqërinë kosovare. Është e vërtetë që përkundër sfidave dhe historisë sonë kemi bërë hapa të mëdhenj përpara në fuqizimin e gruas dhe në avancimin e rolit të saj në shoqëri. Por, ky është vetëm fillimi”, ka thënë ai.

Presidenti Thaçi ka shtuar se kemi ende rrugë për të bërë për të garantuar barazi të plotë gjinore në shoqërinë kosovare.

 “Me përkushtimin, me njohuritë tona dhe përkrahjen tuaj do të vazhdojmë të ecim përpara deri sa çdo grua, çdo vajzë, të ndjehet e barabartë në shoqërinë tonë. Të ndjehet e sigurt, e pranuar, e mbrojtur, e barabartë dhe e lirë”, ka thënë presidenti Thaçi.
 

Kalendari

Ngjarjet e datës 13 dhjetor 2019 - Aleanca Kosovare e Bizneseve dhe Ministria e Tregtisë dhe Industrisë organizojnë hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2019” me moto: Unë Konsumoj Produkte Vendore, Po JU? (Hotel Emerald, ora 9:30)

- Organizata për Fëmijët pa Kujdes Prindëror organizon konferencë nacionale për të diskutuar për situatën e strehimit familjar në Kosovë, për të arriturat, sfidat dhe planet e ardhshme për të zhvilluar me tutje këtë shërbim për fëmijët pa përkujdesje prindërore. (Hotel Sirius, ora 9:30)

- Komisioni i Pavarur për Miniera dhe Minerale organizon takim vjetor informues për përfaqësuesit dhe personat përgjegjës të ndërmarrjeve që merren me shfrytëzimin dhe përpunimin e lëndëve minerare, përpiluesit e plan-programeve të hulumtimit, përpiluesit e projekteve gjeologjike dhe të shfrytëzimit. (Salla e madhe në ndërtesën e Ministrisë së Administratës Publike, ora 10:00)

- Instituti Columbus organizon tryezë diskutimi me temë "Efekti i korrupsionit tek qytetarët: Diskutimi i fondit për trjatimin e pacientëve jashtë institucioneve publike të Kosovës. (Hotel Sirius, ora 10:00)

- Ministria e Tregtisë dhe Industrisë organizon konferencë informuese për zhvillimin e sektorit privat ku do të behet edhe ndarja e mirënjohjeve për “Ndërmarrjet me të suksesshme të vitit 2019”. (Hotel Emerald, ora 10:00)

- Demokraci Plus në bashkëpunim me Fondacionin Konrad Adenauer organizon konferencën lidhur me Procesin e Berlinit dhe obligimet për Sundim të Ligjit dhe Mirëqeverisjen. (Hotel Swiss Diamond, ora 10:00)

- Kryeministri në detyrë Ramush Haradinaj zhvillon vizitë pune në Ministrinë e Mbrojtjes, për të shënuar  një vjetorin e miratimit të tri Ligjeve, Ligjin për Forcën e Sigurisë, Ligjin për Shërbimin në FSK dhe Ligjin për Ministrinë e Mbrojtjes. (Ministria e Mbrojtjes, ora 11:00)

- Komuna e Istogut organizon diskutim publik me qytetar për projekt rregulloren komunale për taksa, ngarekesa dhe gjoba. (Ndërtesa e Komunës së Istogut, ora 11:00)

- Ekipi i Kombëve të Bashkuara në Kosovë së bashku me Klubin Ndërkombëtarë të Prishtinës  organizon panairin e festave të fundvitit. (Ndërtesa e Termokiss në Dardani, ora 12:00)

- Nxënësit finalistë nga e gjithë Kosova të klasave 3-12 do të konkurrojnë në garën e katërtë vjetore Po-e-Zë. (Amfiteatri i Bibliotekës Kombëtare të Kosovës, ora 12:00)

 - Muzeu Kombëtar i Kosovës organizon hapjen e ekspozitës me fotografi 'Bukuria e betonit' nga autori Etienne Rémond. (Muzeu Kombëtar, ora 12:00)

- Kryeministri në detyrë Haradinaj, në përvjetorin e rënies së dëshmorit dhe heroit Mujë Krasniqi, bën homazhe dhe vendos kurora lulesh te shtatorja e heroit. (Klinë, ora 13:00​)

- Hapet panairi “Punimet artizanale përtej kufijve” i organizuar për nder të festave të fundvitit, në kuadër të projektit ndërkufitar Kosovë - Maqedoni Veriore, “Ndërtimi i konkurrencës përmes bashkëpunimit dhe inovacionit: Qasja në tregjet e eksportit për produktet artizanale’’. (Restorant ‘’Planet’’ në Gjilan, ora 14:00)

- Instituti Kosovar për Hulumtim dhe Zhvillim të Politikave organizon tryezë diskutimi me temë: “Ligjërisht (t’pa) diplomuar?” e cilan mbahet me qëllim të diskutimit rreth problemit të verifikimit të diplomave të studentëve të cilët kanë ndjekur studimet pranë Bartësve Privatë të Arsimit të Lartë. (Hotel Sirius, ora 14:00)

- Projekti Climate 4 Change, i cili mbështetet nga Ambasada Norvegjeze dhe nga Fondacioni Kosovar për Shoqëri Civile organizon një debat politik - publik në të cilën do të diskutotohet për klimën. (Salla e Kuqe në Pallatin e Rinisë dhe Sporteve, ora 17:00)

- Ambasadorja e Francës në Kosovë, Marie-Christine Butel, organizon një pritje e cila si qëllim ka promovimin e djathit të Sharrit. (Rezidenca e Francës në Arbëri, ora 17:30)

- Instituti i Kosovës për Drejtësi organizon shfaqjen e dokumentarit “Java Kundër Korrupsionit 2018”.  (Modelarium i Fakultetit te Arkitekturës të Universitetit të Prishtinës, ora 18:00)