22 Gusht 2019

Dekretohen dhe betohen 37 gjyqtarë të rinj të Republikës së Kosovës

Prishtinë, 21 janar - Presidenti i vendit, Hashim Thaçi, sot ka dekretuar 37 gjyqtarë të rinj të Republikës së Kosovës.

Në një ceremoni solemne para presidentit Thaçi, gjyqtarët e rinj, shtatë prej të cilëve vijnë nga komuniteti serb, janë betuar se gjatë kryerjes së detyrës do t’i qëndrojnë besnikë Republikës së Kosovës, Kushtetutës, ligjeve në fuqi dhe do të respektojnë rregullat e etikës profesionale, si dhe do t’i kryejnë me besnikëri, në mënyrë të pavarur, profesionale dhe të paanshme detyrat dhe funksionet që u janë besuar.

“Sot është ditë e veçantë për Republikën e Kosovës, sepse sistemit gjyqësor i bashkohen edhe tridhjetë e shtatë gjyqtarë të rinj. Kosova në vazhdimësi ka bërë dhe po bën reforma në sistemin gjyqësor, me të vetmin qëllim që sistemi gjyqësor të funksionojë sa më mirë, që të kemi sundim të mirëfilltë të ligjit në shtetin tonë”, u shpreh presidenti Thaçi.

Kreu i shtetit ka thënë se në vitin e kaluar është bërë një punë e madhe nga institucionet përgjegjëse në hartimin, miratimin dhe shpalljen e ligjeve të rëndësishme, gjë që e kanë avancuar edhe më tej sistemin gjyqësor.

“Shteti i Kosovës është ndërtuar mbi parimet kushtetuese, të gjithëpërfshirjes, të barazisë dhe të lirisë së secilit individ që të realizojë vetveten dhe të kërkojë lumturinë e tij/saj pa iu cenuar asnjëherë e drejta që të jetë pjesë e shoqërisë kosovare."

"Republika e Kosovës ka miratuar masa adekuate për të promovuar një barazi të plotë dhe efektive ndërmjet pjesëtarëve të komuniteteve në të gjitha fushat e jetës ekonomike, shoqërore, politike dhe kulturore. Edhe sot dekretimi dhe betimi i këtyre gjyqtarëve, pasqyron plotësisht natyrën shumetnike të Republikës së Kosovës”, ka thënë presidenti Thaçi.

I pari i vendit ka shtuar se gjyqtarët kanë rol të madh në jetën e qytetarëve, në realizimin e të drejtave të tyre dhe në sigurinë e qasjes së barabartë në drejtësi, pa marrë parasysh dallimin e tyre gjinor, racor, fetar e kombëtar.

Në supet e gjyqtarëve është një përgjegjësi e madhe, ka theksuar presidenti Thaçi, të cilën ka besim të plotë se do të dinë ta mbajnë dhe qytetarët e vendit tonë do ta ndjejnë veten të sigurt dhe të barabartë para ligjit.

 

 

 

Kalendari

Ngjarjet e datës 22 gusht 2019

- Mbahet seanca plenare e Kuvendit të Republikës së Kosovës në të cilën do të behët shqyrtimi i propozimit të Grupit të deputetëve për shpërndarjen e Legjislaturës së gjashtë të Kuvendit të Republikës së Kosovës. (Kuvendi i Kosovës, ora 10:00)

- Komuna e Prishtinës organizon vendosjen e pesë njësive shtesë të pemëve për pastrimin e ajrit në sheshin "Zahir Pajaziti" ku do të jetë prezent dhe Kryetari i Komunës, Shpend Ahmeti. (Sheshi i 'Zahir Pajazitit', ora 10:00)

 - Mbahet dita e tretë e Etnofestit në të cilën do të mbahet punëtoria kreative, instalacione me atelje te pikëtorëve dhe skulptorëve, punime artizanale, etj. (Ambientet e Etnofestit në fshatin Kukaj, ora 10:30)

- Kryetari i Komunës se Istogut, Haki Rugova do të organizojë dëgjimin me qytetarë për Draft Buxhetin Komunal për vitet 2020-2022. (Salla e Kuvendit Komunal në Istog, Kati III, ora 11:00) 

- Kryetari i Komunës së Prizrenit Mytaher Haskuka do të pret në takim anëtarin e Parlamentit Britanik, John Grogan ku pas takimit do të ketë edhe një konferencë të përbashkët për media. (Shtëpia e Bardhë në Prizren, ora 13:00)

- Aleanca Franceze e Prishtinës, Kino Armata dhe Termokiss organizojnë së bashku edicionin e parë të festivalit "Kino nshehër". (Termokis, ora 20:00)