07 Korrik 2020

Letër “mikut”

Shkruar nga Mentor Barani


Njëri nga presidentët amerikan, pat thënë me plot të drejtë “Mos na lashtë zoti pa revolucionin rinor” (Vilsoni). Kjo thënie, kaq kuptimplote, si duket pak ka kuptim dhe domethënie tek zullumqarët politik në partitë e Kosovës. Kjo thënie e mençur, më lejon të besoj dhe të jem i bindur se shtypja e vrullit rinor, është gjëja më e rrezikshme për një shoqëri. E pikërisht për këtë, shtypja e këtij vrulli rinor, është shtypje e aspiratave të shoqërisë, për një jetë më të prosperuar dhe më demokratike.

Është bërë tanimë klishe të thuhet se demokracia në Kosovë është e brishtë. Mbase kështu edhe është, sidomos për partitë e dala pas luftës, pa vizione politike, por për Lidhjen Demokratike të Kosovës, do të duhej të ishte ndryshe, sepse ajo ka qenë kreatore e proceseve demokratike në Kosovë. Mirëpo, edhe në këtë parti, zullumqarët kanë lëshua rrënjë dhe po bëhen pengues të proceseve demokratike.

Vdekja e presidentit të Kosovës dhe njeriut që bëri epikën e tij në proceset shqiptare dhe me gjerë, edhe LDK-në si parti e ka vu në pozita të vështira, e shpeshherë demokracia aty ka mbet si një flusk sapuni, në duart e disa grupeve oborrtare, që të yshtur për pushtet pa alternativë, kanë shtyp proceset demokratike.

Kohëve të fundit, janë ngrysur përsëri në këmbë, ca zullumqarë të palodhshëm, që po ndërhyjnë në proceset më se demokratike, të domosdoshme për LDK-në dhe Kosovën. Këto veprime, janë të turpshme dhe banditeske, sepse krijojnë celula të rrezikshme politike, pa zgjedhje demokratike dhe pa procese të mirëfillta demokratike.

E, këto veprime, në anën tjetër,  shkaktojnë avari në masat e gjëra, sidomos në këtë kohë kur LDK-ja duhet të akumulojë të gjitha potencialet e saja, duke promovuar frymën e vërtet demokratike, në funksion të një Kosovë më stabile.

Është me rëndësi të theksohet se njerëzit, pavarësisht apetiteve nuk duhet të bien preh e këtyre tendencave aspak të shëndosha për të ardhmen e partisë më të fuqishme në Kosovë për afro dy dekada, lëvizjes që u bë shtylla kryesore e shtetit të Kosovës, LDK-së. E hiq më pak, të “mikut” tim që po luan lojën e zullumqarit.

Na bie të dëgjojmë dhe lexojmë në shtypin sesi anëtar të partisë, ndërhyjnë keq në proceset demokratike dhe krijojnë klane të këqija, duke shtytë njerëz që të pranojnë detyra të pamerituara dhe çka është më e keqja, pa miratimin e shumicës.

Gjithë  këta zullumqarë, duhet të kuptojnë se këto procese janë jodemokratike dhe janë të destinuar të dështojnë.

Kështu që njerëzve plëngprishës, u duhet ndal tërbimi njëherë e përgjithmonë, sepse kështu krijohen kushte që rinia, kjo forcë kaq kreative dhe kaq e dobishme për Kosovën, të bëhet motor i lëvizjes së proceseve në Kosovë.

E, sot kur demokracia po kalon ditë të vështira, s’ka sesi t’i quajmë ndryshe këta, veçse monstra me fytyrë e njeriu e tru peshku-pretendimet e të cilëve, lirisht mund të thuhet se shkojnë nga tendencat e ajetollahzimit të Kosovës dhe partive politike në vend.

E them me plot bindje se me këto ndërhyrje bizare dhe të paprecedente për proceset demokratike, po perëndon koha e këtyre zullumqarëve, ngase elani dhe energjia e rinisë, mund të stopohet, por kurrë të ndalet. Kur gufon ajo, bëhet uragan që se ndal kush, e më së paku këto figura qesharake, që janë bë zullumqarë të LDK-së dhe kështu edhe Kosovës.

Duhet përmend edhe faktin se është në përvojën njerëzore, por edhe në atë fetare, se edhe Zoti zullumqarët i duron, por kur bëhet tepër, ua thyen qafen. Shtypja e vrullit rinor, po ju thyen qafën këtyre zullumqarëve politikë. Këtyre figurave që nuk ka sesi të emërohen ndryshe përveç se PËGËRA. 

Kalendari

Ngjarjet e datës 7 Korrik 2020

- Dr. Basri Sejdiu do të mbajë konferencë për media lidhur me vendimin e Bordit Drejtues për shkarkimin nga detyra e drejtorit të përgjithshëm të SHSKUK. (QKUK, ora 11:00)

- Ministri i Drejtësisë Selim Selimi do të vizitoje Komunën e Prishtinës. (Ndërtesa e Komunës së Prishtinës, ora 11:00)

- Kryetari i Sindikatës së Pavarur të Sektorit Privat të Kosovës, Jusuf Azemi do të mbaj takim me Ministren e financave, znj. Hikmete Bajrami me të cilën do të bisedoj lidhur me pagesën e pagave të  punëtorëve nga pakoja emergjente, tërheqjen e mjeteve për punëtorë nga fondi i kursimeve si dhe eliminimin e gabimeve teknikeve gjatë  aplikimit për pakon fiskale emergjente. (Kabineti i ministres Bajrami, ora 11:00)

- Kryetari i Sindikatës së Pavarur të Sektorit Privat të Kosovës, Jusuf Azemi pas takimit me Ministren e financave, znj. Hikmete Bajrami do të mbaj konferencë për shtyp, ku do të ju njoftojë lidhur me këtë takim. (Zyret e Sindikatës në objektin e ish Gërmisë, ora 11:45)

- Lëvizja Vetëvendosje! mban konferencë për media në të cilën flet nënkryetari Besnik Bislimi. (Zyret e LV-së në Arbëri, ora 12:00)

- Me hapjen e ekspozitës multimediale në hapësirat e SENSE Qendrës në Pulë, Qendra për Drejtësi Tranzicionale në bashkëpunim me Fondin për të Drejtën Humanitare Kosovë nisin kampanjën me titull: Srebrenica 25: Së bashku kundër virusit të mohimit në ditën kur në vitin 1995 ka rënë Srebrenica. (Transmetim direkt livestream http://srebrenica.sensecentar.org, ora 17:00)

- Komuna e Rahovecit mban dëgjim publik me banorët të fshatrave Malësi e Vogël dhe Gexhë. (Objekti i Shkollës Fillore të Mesme të Ulët “Skender Kastrati” në fshatin Malësi e Vogël, ora 19:00)

- Komuna e Rahovecit mban dëgjim publik me banorët të fshatrave Ratkoc, Dejnë, Vrajak dhe Bratotin. (Objekti i Shkollës  Fillore të Mesme të Ulët “4 Dëshmorët” në fshatin Ratkoc, ora 20:00)