19 Mars 2019

Jo heqje të taksës

Shkruar nga Faik Krasniqi

Është e pabesueshme se si një kontinent i tërë është shndërruar në avokate dhe zëdhënëse të një shteti agresor si Serbia, duke i bërë presion Kosovës për heqjen e taksës së vendosur ndaj këtij shteti që me të gjitha mjetet dhe në mënyrë perverse po e lufton shtetin e Kosovës.

 Të një shteti që vrau dhe masakroi mbi 350 mijë njerëz në disa luftëra. Të një shteti që ushtroi gjenocid mbi shqiptarët, boshnjakët dhe kroatët.

Në vend se të bëjnë presion ndaj Serbisë që ta ndal ajo luftën e egër ndaj Kosovës, ata bëjnë presion ndaj nesh.

Sikur të bënin presion ndaj Serbisë për zbatimin e marrëveshjeve që janë nënshkruar mes Kosovës dhe Serbisë në Bruksel, me ndërmjetësimin dhe si garantuese e këtyre marrëveshjeve Bashkimi Evropian, gjërat nuk do të shkonin deri aty që Kosova të aplikonte këtë taksë ndaj Serbisë dhe Bosnjës që Kosovën lëre që nuk e njohin si shtet, por e luftojnë dhe mohojnë çdo gjë nga shteti ynë.

Por, siç duket Kosova nuk është interesant për BE-në dhe as që ka qenë ndonjëherë. Nëse Kosova do të kishte qenë interesant për BE-në dhe në agjendën e tyre, zëdhënësi dhe avokati i Serbisë, Johannes Hahn, nuk do të vinte për të bërë presion për heqjen e taksës 100% ndaj Serbisë.

Pavarësisht presionit ndërkombëtar rreth taksës së vendosur Kosova nuk guxon të lëshojë pe, sepse kjo është karta jonë e vetme që të mbrohemi nga ky agresion i Serbisë.

Kjo është karta jonë që të jemi të barabartë edhe në bisedime me Serbinë, gjë që nuk ishim deri më tani.

Kosova për ta hequr taksën ndaj Serbisë dhe Bosnjës duhet t'i vë këto kushte ndaj BE-së dhe Serbisë.

1) Serbia t'i zbatojë në praktikë të gjitha marrëveshjet e nënshkruara me Kosovën.
2) Kosovën mos ta pengojë në anëtarësimet në organizatat ndërkombëtare.
3) Të zhbllokohet hapësira ajrore me Serbinë.
4) BE-ja menjëherë t'i heq vizat për qytetarët e Kosovës.
5) Kosova të anëtarësohet në Këshillin e Evropës.

Nëse pranohen këto kushte nga Serbia dhe BE-ja, atëherë ja vlen që të hiqet taksa, sepse Kosova përndryshe do të dilte fitimtare.

Përndryshe, me heqjen e taksës pa asnjë kusht siç jemi mësuar ne, edhe atëherë kur filluam dialogun me Serbinë pa asnjë kusht të vetëm, do të dalim humbës dhe na rrezikohet çdo gjë, madje edhe copëtimi i Kosovës.

Duhet të mësohemi një herë e mirë që për interesat shtetërore të vendosim kushte edhe ne, ashtu siç vendosin kushte çdo shtet për interesat e tyre.

Serbia me kushte gjithmonë ka fituar gjithçka. Kështu do ta vlerësojnë dhe respektojnë të gjithë, e jo si deri më tash duke na përbuzur dhe shkelur mbi dinjitetin tonë.

Të përbuzur se të përbuzur, të shkelur se të shkelur, të izoluar se të izoluar, të paktën të tregojmë respekt për veten tonë!
 

Kalendari

Ngjarjet e datës 19 mars 2019 - Ministria e Integrimit Evropian feston 10 vjetorin e bashkëpunimit Kosovë – JICA”. (Hotel Swiss Diamond, ora 9:00)

- Instituti Demokratik i Kosovës organizon tryezën e diskutimit gjatë së cilës do të publikohen gjetjet e raportit nga monitorimi i Kontratave për furnizim me material shpenzues për Hemodializë për vitin 2018, në një diskutim me përfaqësues të institucioneve dhe shoqërisë civile. (Orion Conference Center, ora 10:00)

- Mbahet mbledhja e Komisionit Ad-hoc për përpilimin e Kodit për rregullimin dhe menaxhimin e fushës së pensioneve dhe beneficioneve nga sigurimi social. (Ndërtesa e Kuvendit, salla N204, ora 10:00)

- Rrjeti i Grave të Kosovës organizon mbledhjen e radhës së Koalicionit për Barazi “Fuqizimi i pjesëmarrjes së grave në politikë”. (Hotel Sirius, ora 11:00)

- Ministria e Administrimit të Pushtetit Lokal në Kosovë dhe Ministria e Vetëqeverisjes Lokale në Maqedoninë Veriore në koordinim me Zyrën e Bashkimit Evropian në Kosovë dhe me përkrahjen teknike të ofruar nga Sekretariati i Përbashkët Teknik organizojnë Forumin Konsultativ. (Hotel International Prishtina, ora 11:00)

- Grupi Parlamentar i Lidhjes Demokratike të Kosovës mban konferencë për media. (Ndërtesa e Kuvendit, kati III, para sallës C301, ora 11:00)

- Lëvizja Vetëvendosje mban aktivitet. (Takimi me mediat bëhet pranë QKMF-së, te Qafa, ora 12:00)

- Promovohet romani “Rrota e Ujit” i autores Resmije Kryeziu. (Kolegji AAB, objekti V, te këndi i Librarisë, ora 12:00)

- Oda e Afarizmit të Kosovës organizon konferencë për media lidhur me Udhëzimet Administrative të cilat janë në mospërputhje me Ligjin për Minierat dhe Mineralet që po pengojnë zhvillimin e bizneseve të këtij sektori. (Zyret e OAK-së, ora 13:00)

- Mbahet mbledhja e rregullt e Qeverisë së Republikës së Kosovës. (Ndërtesa e Qeverisë, ora 14:00)

- Ambasadori Kosnett do të vizitojë Zyrën Kombëtare të Auditimit të Kosovës ku do të merr pjesë në nisjen zyrtare të Njësisë për Luftimin e Mashtrimeve, e cila do të veprojë në kuadër të ZKAK. (Lokalet e Zyrës Kombëtare të Auditimit, rr. Ahmet Krasniqi, Arbëri, ora 15:10)

- Lidhja Demokratike e Kosovës dega në Podujevë organizon manifestim me rastin e 29 vjetorit të themelimit. (Restaurant Ora, ora 17:00)