13 Dhjetor 2019

A do të ndërtohet Kamp Nou në Korroticë apo Santiago Berbaneu në Bërrnicë

Shkruar nga Behxhet Sh. Shala - Bajgora

Duelet e “viganëve“ të sportit që nuk i njeh, as Korrotica e as Bërrnica: Kosova është vend i mrrekullive dhe mundësive që nuk i ofron asnjë shtet tjetër në botë.

E ka një mbitokë të pasur me intelektualë, analistë të politikës dhe të anatomisë (që vegjetojnë, zhvillohen, mbijetojnë dhe ngriten profesionalisht në anusin e politikanëve e që studiohet nga anatomia), ekspertë për banka, për  ekonomi dhe financa, shoqëri civile super të pa – përlyer, profesorë që kanë grada shkencore të fituara sipas standardeve të Bangladeshit  të cilët nuk kanë njohuri elementare gjuhësore se si shkruhet pa gabime as formula e leshit.

Mbi të gjitha, Kosova e ka një nëntokë të jashtëzakonshme siç e kishte edhe Kolumbia e Pablo Eskobarit, Sicilia e Toto, jo Kutunjos por e Rinas, Klani i Zemunit me paramilitarët e Millosheviqit, dikur Bronksi i Amerikës apo sot Sinaloa ose ZETA –s  e Meksikos.

Kosova, përveçse është dëshmuar si burim i talenteve njihet edhe si vend ku” ekspertët “ e kësaj lëmie, sportin e kanë futur nën kthetra të politikës sikur që politikën e kanë shndërruar në sport të zhvatjes dhe faturë me të cilën mbulohen njëqindmijë të zeza !

Tash, nuk duhet të jeshë fort i informuar e ta kuptosh se, në planin ekonomik dhe social Kosova nuk e ka asnjë problem të vetëm sikur që në të gjitha fushat ku ofrohen shërbimet jemi bindshëm në vendin e parë !

Me gjitha këto të mira, duke mos ditur ç’të bëjmë tjetër e filluam një projekt ; ndërtimin e një stadiumi të futbollit e që të ngjashëm nuk do ta ketë askush në botë. Lëreni ju stadiumin e ndërtuar në Tiranë që në ndeshjen kundër Francës i ndahej shtresa e barit si të ishte petë lakërori, çdoherë kur ndonjë lojtar apo referi shkelte me tërë shputën e këmbës .

E patë një situatë  kur gjatë një dueli pak më të fortë, nën këmbët e lojëtarit u hapë një gropë sikur në rrugët e Shpend Ahmetit në Prishtinë të cilën pastaj Hysaj mundohej ta mbyllte, si të ishte kopshtar e jo lojëtar ! Kosova, nga pësimet e të tjerëve ka nxjerrë mësime, nuk ka patur nevojë të përsërisë gabimet e të tjerëve.

Pastaj, në këtë fushë ka angazhuar ekspertë ndër më të ndershmit në botë sikur që janë udhëheqësit e Federatës, politikanë të të dy krahëve ; atij paqësorë dhe të luftës dhe vetëm ka mbetur të përcaktohet për lokacionin.

Krahu i luftës, sa ishte në pushtet u përcaktua për Drenicë përkatësisht për Korroticë. Duket të jetë bërë projekti dhe se janë bërë investime fillestare.

Tash, pas zgjedhjeve të 6 tetorit 2019, krahu “ paqësorë “, LDK-ë duket se do të jetë pjesë e pushtetit, bashkë me LVV apo me dikend tjetër, nuk ka aspak rëndësi me kend, me rëndësi të jeni në grazhdin e pushtetit, ka deklaruar se Stadiumi nuk do të ndërtohet në Korroticë, por në Bërrnicë.

Kemi përballje të dy “ viganëve “ të sportit ; Bekim Haxhiu apo Kamishi i Drenicës dhe Lumir Abdixhiku apo Miri i Xhikës.

Përveçse kanë qenë jashtëzakonisht të talentuar,  si shpresa të futbollit kosovarë dhe botërorë, që të dy janë inteletualë të spikatur, Kamishi si profesor në fakultetin ku lind dhe vdesë humanizmi, Fakulteti i Mjekësisë  ndërsa Miri i Xhikës është ekspert në fushën ku numërohen dhe, pa asnjë gjurmë humbin paratë, në Fakultetin e Ekonomisë.

Që të dy, përveç përkushtimit në fushën e sportit njihen edhe si aktivistë politikë që janë në majat e kupolës - Ndragetës së politikës kosovare, për një kohë të gjatë.

Kamishi i Drenicës e ka bërë luftën e fundit kurse Miri i Xhikës jeton me kujtimet e luftës së parafundit. Gjaku ujë nuk bëhet ! Që të dy këta burra të shquar të kombit kosovar, janë edhe biznesmenë të sukseshëm por se, për shkak të modestisë së tyre nuk identifikohen në publik si të tillë  duke e respektuar statusin e tyre njerëzorë,  kombëtar, politikë, intelektualë dhe afaristë !

Çka i bashkon dhe çka i ndanë Korroticën dhe Bërrnicen: Këto të dy lokacione janë pjesë përbërëse e territorit të Kosovës sikur që të dyja këto duan që stadiumi të ndërtohet në lokacionin e përfolur. Mendoj se vetëm këto dy pika i bashkojnë këto lokacione.

Në anën tjetër, Korrotica, si pjesë e Drenicës heroike është burim i të gjitha përpjekjeve për çlirim, liri, drejtësi, barazi dhe pavarësi, si rrugëtim kalimtar  drejt gjakimit të gjithë shqiptarëve përjashtuar këtu kosovarët, bashkimit kombëtar që llogaritet si e drejtë e njeriut, e dhënë nga Zoti dhe nga Natyra. Drenica e dha formën, kuptimin dhe përmbajtjen e lirisë .

Po të mos ishte Drenica, liria nuk do të banonte në Kosovë dhe as shqiptarë nuk do të kishte në Kosovë.

Drenica e sakicës së Ahmet Delisë, e urisë së Shotë Galicës, e opingave të shqyera të Azem Bejtës, e gjymtyrëve të mërdhira të Shaban Polluzhës dhe Mehmet Gradicës por të shpirtit liridashës dhe sakrifikues, Drenica e Tahir dhe Nebih Mehës, kurbanëve të qëndresës, Drenica e dy gjigantëve të trimërisë, sakrificës dhe shqiptarisë ; Fehmi dhe Xhevë Lladrovci dhe Drenica e simfonisë së këngës për liri edhe në çaste kur shkonin drejt amshimit të Komandantit Legjendar Adem Jashari dhe tërë familjes legjendare Jashari, bashkë me mysafirë që ishin edhe luftëtarë sikur edhe me të tjerë që kurrë nuk iu ndanë Komandantit Legjendar, Adem Jashari, meriton më shumë respekt .

Meriton më shumë investime, si në ruajtjen e kujtesës historike ashtu edhe në përmirësimin e jetës së qytetarëve të Drenicës të cilët, sipas një paragjykimi të shëmtuar politesk, janë të paracaktuar vetëm për sakrifica.

Është koha e ndryshimit të këtij stereotipi që e përdorin hoxhallarët kur u drejtohen besimtarëve ; në këtë botë duhet të vuani në mënyrë që në botën tjetër t’i gëzoni gjitha të mirat, tokë, krimba  dhe të tjera që janë shoqërues të të vdekurve.

Për këtë arsye, ndonëse në asnjë mënyrë nuk e konsideroj se është prioritet ndërtimi i stadiumit, megjithatë jam që në Drenicë të ndërtohet stadiumi e jo në Bërrnicë. Bërrnica është krejtësisht e kundërta e Korroticës sepse aty ka qenë burimi i robërisë ku Serbia kishte njësi paramilitare ushtarake dhe politike.

Duhet, njëherë e mirë të pamundësojmë maniplimin e politikës në instrumentalizimin e sportit në përgjithësi kurse, në rastin konkret të futbollit në veçanti. Nuk duhet të lejohet që lojën e ndyrë politike ta bartin në fushën e sportit.

Asgjë nuk paraqesin në sport, As Kamishi e as Miri i Xhikës, po përpiqen të bëhen faktorë vetëm përmes politikës.

Që të dy, kontributin më të madh që mund të japin për sportin kosovarë është që të qëndrojnë sa më larg dhe, në rast se shkojnë në stadium, atëherë duhet t’i paguajnë biletat e jo të shvercovaten si VIP –a!

Të bëhemi të sinqertë e të mos riciklojmë pamjet që zgjatnin 1-2 orë duke brohoritur : Jemi me ty, Drenicë kurse tërë kohën tjetër e kalonim duke u shoqëruar me Draganin, Stojanin dhe Millanin duke pirë shlivovicë, në Bërrnicë !

Kalendari

Ngjarjet e datës 13 dhjetor 2019 - Aleanca Kosovare e Bizneseve dhe Ministria e Tregtisë dhe Industrisë organizojnë hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2019” me moto: Unë Konsumoj Produkte Vendore, Po JU? (Hotel Emerald, ora 9:30)

- Organizata për Fëmijët pa Kujdes Prindëror organizon konferencë nacionale për të diskutuar për situatën e strehimit familjar në Kosovë, për të arriturat, sfidat dhe planet e ardhshme për të zhvilluar me tutje këtë shërbim për fëmijët pa përkujdesje prindërore. (Hotel Sirius, ora 9:30)

- Komisioni i Pavarur për Miniera dhe Minerale organizon takim vjetor informues për përfaqësuesit dhe personat përgjegjës të ndërmarrjeve që merren me shfrytëzimin dhe përpunimin e lëndëve minerare, përpiluesit e plan-programeve të hulumtimit, përpiluesit e projekteve gjeologjike dhe të shfrytëzimit. (Salla e madhe në ndërtesën e Ministrisë së Administratës Publike, ora 10:00)

- Instituti Columbus organizon tryezë diskutimi me temë "Efekti i korrupsionit tek qytetarët: Diskutimi i fondit për trjatimin e pacientëve jashtë institucioneve publike të Kosovës. (Hotel Sirius, ora 10:00)

- Ministria e Tregtisë dhe Industrisë organizon konferencë informuese për zhvillimin e sektorit privat ku do të behet edhe ndarja e mirënjohjeve për “Ndërmarrjet me të suksesshme të vitit 2019”. (Hotel Emerald, ora 10:00)

- Demokraci Plus në bashkëpunim me Fondacionin Konrad Adenauer organizon konferencën lidhur me Procesin e Berlinit dhe obligimet për Sundim të Ligjit dhe Mirëqeverisjen. (Hotel Swiss Diamond, ora 10:00)

- Kryeministri në detyrë Ramush Haradinaj zhvillon vizitë pune në Ministrinë e Mbrojtjes, për të shënuar  një vjetorin e miratimit të tri Ligjeve, Ligjin për Forcën e Sigurisë, Ligjin për Shërbimin në FSK dhe Ligjin për Ministrinë e Mbrojtjes. (Ministria e Mbrojtjes, ora 11:00)

- Komuna e Istogut organizon diskutim publik me qytetar për projekt rregulloren komunale për taksa, ngarekesa dhe gjoba. (Ndërtesa e Komunës së Istogut, ora 11:00)

- Ekipi i Kombëve të Bashkuara në Kosovë së bashku me Klubin Ndërkombëtarë të Prishtinës  organizon panairin e festave të fundvitit. (Ndërtesa e Termokiss në Dardani, ora 12:00)

- Nxënësit finalistë nga e gjithë Kosova të klasave 3-12 do të konkurrojnë në garën e katërtë vjetore Po-e-Zë. (Amfiteatri i Bibliotekës Kombëtare të Kosovës, ora 12:00)

 - Muzeu Kombëtar i Kosovës organizon hapjen e ekspozitës me fotografi 'Bukuria e betonit' nga autori Etienne Rémond. (Muzeu Kombëtar, ora 12:00)

- Kryeministri në detyrë Haradinaj, në përvjetorin e rënies së dëshmorit dhe heroit Mujë Krasniqi, bën homazhe dhe vendos kurora lulesh te shtatorja e heroit. (Klinë, ora 13:00​)

- Hapet panairi “Punimet artizanale përtej kufijve” i organizuar për nder të festave të fundvitit, në kuadër të projektit ndërkufitar Kosovë - Maqedoni Veriore, “Ndërtimi i konkurrencës përmes bashkëpunimit dhe inovacionit: Qasja në tregjet e eksportit për produktet artizanale’’. (Restorant ‘’Planet’’ në Gjilan, ora 14:00)

- Instituti Kosovar për Hulumtim dhe Zhvillim të Politikave organizon tryezë diskutimi me temë: “Ligjërisht (t’pa) diplomuar?” e cilan mbahet me qëllim të diskutimit rreth problemit të verifikimit të diplomave të studentëve të cilët kanë ndjekur studimet pranë Bartësve Privatë të Arsimit të Lartë. (Hotel Sirius, ora 14:00)

- Projekti Climate 4 Change, i cili mbështetet nga Ambasada Norvegjeze dhe nga Fondacioni Kosovar për Shoqëri Civile organizon një debat politik - publik në të cilën do të diskutotohet për klimën. (Salla e Kuqe në Pallatin e Rinisë dhe Sporteve, ora 17:00)

- Ambasadorja e Francës në Kosovë, Marie-Christine Butel, organizon një pritje e cila si qëllim ka promovimin e djathit të Sharrit. (Rezidenca e Francës në Arbëri, ora 17:30)

- Instituti i Kosovës për Drejtësi organizon shfaqjen e dokumentarit “Java Kundër Korrupsionit 2018”.  (Modelarium i Fakultetit te Arkitekturës të Universitetit të Prishtinës, ora 18:00)