28 Tetor 2020

Në hollin e Kuvendit ekspozohen dy piktura të piktorit Haki Xhakli

Prishtinë, 21 shtator - Me iniciativën e deputetit Elmi Reçica, sot në hollin e Kuvendit të Republikës së Kosovës janë ekspozuar dy piktura të piktorit Haki Xhakli, në të cilat trajtohet tema e të pagjeturve dhe ajo e viktimave të dhunës seksuale gjatë luftës.

Gjatë fjalës së tij, deputeti Elmi Reçica çmoi lart figurën e profesorit Haki Xhakli, duke vlerësuar se pikturat kanë nivel të lartë artistik.

Duke e cilësuar si rast të veçantë ekspozimin e tyre në ambientet e Kuvendit, deputeti Reçica tha se ato pasqyrojnë historinë e luftës sonë të fundit.

"Unë si deputet i kam parashtruar një kërkesë Kryesisë së Kuvendit, e cila e ka miratuar atë. Këto dy vepra, shumë të çmuara dhe shumë domethënëse, janë pasqyrim i një historie të cilën e kemi kaluar. Nëpërmjet tyre, dëshmohet se kush është vrarë, masakruar dhe dhunuar", theksoi Reçica.

Duke e falënderuar Kuvendin që ka lejuar ekspozimin e punimeve të tij, piktori Haki Xhakli tha se ekspozita trajton të pagjeturit dhe gratë e dhunuara, tema këto që sipas tij, preokupojnë shoqërinë tonë.  

"Në këto piktura kam paraqitur ndjenjën time për gratë e dhunuara gjatë luftës, brengë e imja kjo, e cila më ka shtyrë deri te realizimi i tyre. Unë besoj fuqishëm që të gjithë do të angazhohemi që të pagjeturit të vijnë në shtëpitë e tyre", theksoi Xhakli.

Edhe deputetja Blerta Deliu-Kodra punimet e cilësoi të një rëndësie të veçantë, për shkak, siç tha ajo, temave të trajtuara, duke kërkuar gjithashtu që këto tema të trajtohen edhe më tej nga politika e Kosovës.

“Viktimat e dhunës seksuale dhe të pagjeturit preokupojnë shoqërinë kosovare, prandaj duhet të kontribuojmë që këto tema të trajtohen edhe më tutje nga politika në Kosovë”, theksoi ajo. ​

Kalendari

Ngjarjet e datës 28 Tetor 2020 - Qendra e parë shoqërore në Prishtinë “Termokiss” nisë programin pesë ditor “Krejt Ka Pak V - Me Zemër Ngat” me aktivitete të ndryshme. (Hapësira e Termokissit, ora 9:00)

- Komisioni për të Drejtat e Njeriut, Barazi Gjinore, për Persona të Pagjetur dhe Peticione takohet me përfaqësuesit e Divizionit të Skemave për Kategoritë e Luftës në Departamentin e Familjeve të Dëshmorëve dhe Invalidëve të Luftës pranë Ministrisë së Punës dhe Mirëqenies Sociale dhe përfaqësues të Komisionit Qeveritar për njohjen dhe verifikimin e statusit të viktimave të dhunës seksuale gjatë luftës çlirimtare të  Kosovës. (Ndërtesa e Kuvendit, salla N10, ora 10:00)

- Me rastin e shënimit të  “Muajit të mundësive të barabarta për personat me aftësi të kufizuara”, që është muaji tetor, kryetari i Komunës së Prizrenit, Mytaher Haskuka dhe drejtori i Drejtorisë së Administratës Osman Hajdari, do të vizitojnë personat me aftësi të kufizuara që janë të angazhuar në Administratën Komunale të Komunës së Prizrenit. (Objekti i Administratës Komunale në Qendrën për Shërbime të Integruara-One Stop Shop, ora 10:00)

- Ministri për Komunitete dhe Kthim, Dalibor Jevtiq raporton para Komisionit për të Drejtat dhe Interesat e Komuniteteve dhe Kthim lidhur me raportin e punës së ministrisë, për vitin 2020. (Ndërtesa e Kuvendit, salla N302, ora 10:00)

- Kryeministri Avdullah Hoti së bashku me Zëvendëskryeministrin Driton Selmanaj mbajnë tryezë konsultative me Organizata të Shoqërisë Civile për prioritetet e Agjendës së Reformave Evropiane. (Objekti i Qeverisë, ora 11:00)

- Ministri i Drejtësisë, Selim Selimi do të mbajë një konferencë për media. (Ministria e Drejtësisë, ish-objekti i Rilindjes, kati IX, salla 914, ora 11:00)

- Ministri i Tregtisë dhe industrisë, Vesel Krasniqi raporton para Komisionit për Ekonomi, Punësim, Tregti, Industri, Ndërmarrësi dhe Investime Strategjike lidhur me problemet që është duke u ballafaquar ministria në përgjithësi, në veçanti për prodhuesit dhe transportuesit vendor për CEFTA si dhe për subvencionet e ndara për biznese gjatë pandemisë. (Ndërtesa e Kuvendit, salla N10, ora 13:00)

- Kryeministri Avdullah Hoti viziton Komisionin Rregullativ të Prokurimit Publik. (Objekti i KRPP-së, ora 14:00)

- Ministrja e Financave Hykmete Bajrami raporton para Komisionit për Buxhet dhe Transfere lidhur me zhvillimet e fundit në Sistemin e Menaxhimit të Financave Publike në Kosovë. (Ndërtesa e Kuvendit, salla C203, ora 14:00)

- Forumi për Lidership dhe Diplomaci përmbyllë Projektin “Akademia për Lidership”. (Swiss Diamond Hotel, ora 14:00)

- Komisioni për Shëndetësi dhe Mirëqenie Sociale, sot mban tryezë me përfaqësues të institucioneve të vendit, organizatave që merren me përkrahjen e grave me kancer të gjirit, si dhe gra të mbijetuara nga kanceri i gjirit. (Holli i Kuvendit, ora 15:00)

- Ambasada e Gjermanisë bashkë me Asociacioni për Evropën Juglindore dhe Instituti Aspen Gjermani organzojnë konferencën digjitale “Të rinjtë, migrimi dhe sfida demografike në Ballkanin Perëndimor”. (Onlne, ora 16:00)