18 Shtator 2019

MKRS investon rreth 5 milion euro në komunën e Ferizajit

Prishtinë, 27 maj - Ministri i Kulturës, Rinisë dhe Sportit, Kujtim Gashi, ka qëndruar sot për vizitë në Ferizaj me ç’rast ka marrë pjesë në hapjen e Ditës Olimpike.

Pas hapjes së Ditës Olimpike, mes Ministrisë së Kulturës, Rinisë dhe Sportit dhe Komunës së Ferizajt u nënshkruan tetë memorandume bashkëpunimi. Memorandumet e nënshkruara kanë për qëllim mbështetjen financiare të tetë projekteve në këtë komunë.

Për projektin “Renovimi i stadiumit të qytetit në Ferizaj”, i cili pritet të realizohet gjatë viteve 2019-2021, Ministria ndan mjete financiare në vlerën e 1 milion e 887 mijë e 428 eurove.

Projektin “Pishina gjysmë-olimpike në Ferizaj” Ministria e mbështet me 200 mijë euro dhe pritet të realizohet gjatë vitit 2019. Projektin “Kompleksi i fushave të tenisit” Ministria e mbështet me 100 mijë euro, i cili po ashtu pritet të realizohet gjatë vitit 2019. Ndërkaq për projektin “Terren sportiv në Dubravë Ferizaj” i cili gjithashtu pritet të realizohet realizohet gjatë vitit 2019, Ministria ndan 50 mijë euro.

Gjithashtu, mes Ministrisë dhe Komunës ndër tetë memorandumet e nënshkruara sot, katër prej tyre u nënshkruan në fushën e trashëgimisë për financimit e këtyre projekteve: Qendra Multifunksionale 200 mijë euro, ndërtesa e Teatrit Adriana Abdullahu, Kisha Katolike, Mulliri i madh në Ferizaj, Xhamia në Greme dhe Xhamia në Firajë. Të gjitha këto investime kanë vlerën totale rreth 5 milion euro.

Pas nënshkrimit të këtyre memorandumeve, ministri Gashi në konferencën për media tha se sot u nënshkruan një sërë marrëveshjesh për financimin e projekteve shumë të rëndësishme për qytetarët e Ferizajt.

“Për herë të parë në Kosovë ne kemi filluar një cikël të ndërtimit të pishinave gjysmë-olimpike dhe një nga to do të jetë në komunën e Ferizajt por ajo që është me rëndësi të theksoj, projekti i vetëm që po fillojmë në Republikën e Kosovës është Qendra Multifunksionale, një objekt që do të ndërtohet në këtë komunë i cili do ti shërbejë gjeneratave të ndryshme dhe për aktivitete të ndryshme rinore, sportive e kulturore”, tha ai.

Po ashtu ministri Gashi informoi se pjesë e marrëveshjeve për financim është edhe stadiumi ndihmës dhe renovimi i stadiumit.

“Kjo ka qenë një kërkesë e vazhdueshme e Komunës dhe në të njëjtën kohë edhe përkushtim i yni për të avancuar infrastrukturën sportive në Republikën e Kosovës”, theksoi ministri Gashi.

Ndërkaq për financimin e projektit “Terren sportiv në Dubravë Ferizaj”, ai tha se po bëhet me qëllim që të gjithë qytetarëve të Ferizajt pa dallim përkatësie etnie tu krijohet një mundësi dhe infrastrukturë e re sepse dihet që atje jeton komuniteti RAE. 

Ai po ashtu bëri të ditur se investime do të bëhen edhe në fushën e trashëgimisë përkatësisht në restaurimin e Teatrit të Qytetit, Kishës Katolike, Mullirit të Madh dhe Xhamisë në Greme dhe dha lajmin se do të bëhet edhe funksionalizimi i plotë i Qendrës Rajonale për Trashëgimi Kulturore.

Ndërkaq kryetari Aliu shprehu falënderim të veçantë për vizitën e ministrit dhe tha se me nënshkrimin e memorandumeve të bashkëpunimit Ferizaj po bëhet shembull i transformimit të përgjithshëm dhe i plotësimit të kërkesave.

“Ne kemi folur për projekte të caktuara, madhore dhe të munguara për komunën dhe nga sot po hapim një perspektivë të re të projekteve që kanë të bëjnë me mbulueshmërinë që është pjesë e angazhimeve dhe mbështetjes së MKRS-së”, tha kryetari Aliu.

Pas mbajtjes së konferencës, ministri Gashi së bashku me kryetarin e Komunës së Ferizajt, Agim Aliu, vizituan edhe punimet e Qendrës Multifunksionale në fshatin Greme. 

Kalendari

Ngjarjet e datës 18 shtator 2019 - Kryetari i Lëvizjes Vetëvendosje Albin Kurti viziton Xhaminë e Çarshisë në Prishtinë. (Xhamia e Çarshisë në Prishtinë, ora 9:10)  

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, do të vizitojë Komunën e Kaçanikut ku do të takoj kryetarin e kësaj komune, Besim Ilazin, për të diskutuar rreth përgaditjes së Garës Nacionale të Sportit. (Objekti i komunës, ora 9:30)

- Specialistët stomatologë të papunë do të protestojnë para Ministrisë së Shëndetësisë. (Para Ministrisë së Shëndetësisë, ora 10:00)

- Instituti Demokratik i Kosovës organizon tryezën e diskutimit ndërmjet qytetarëve dhe kandidatëve për deputetë nga subjektet politike lidhur me temën “Qasja e subjekteve politike rreth çështjes së gjinekologut në nivel komunal”. (Hotel Sirius, ora 10:00)

- Kryetari i Lëvizjes Vetëvendosje Albin Kurti viziton Kalanë e Artanës. (Kalaja e Artanës, ora 10:30)

- Oda e Afarzimit të Kosovës në bashkëpunim me Dhomën e Tregtisë në Tiranë dhe Odën Ekonomike të Maqedonisë Veri-Perëndimore organizojnë ngjarjen “Regional B2B Event”. (Holiday Inn në Shkup, 11:00)  

- Ministri i Kulturës, Rinisë dhe Sportit, Kujtim Gashi, mirëpret fituesit e medaljeve të Taekwandos. (Kabineti i Ministrit në MKRS, ora 11:00)

- Lëvizja FOL organizon diskutimin e tretë në kuadër të Forumit FOL Hapur me kandidatët për Kryeministër ku i ftuari i radhës do të jetë Nenad Rašić, Kandidat për Kryeministër nga koalicioni Slloboda. (Zyrat e Lëvizjes FOL, ora 11:00)

- Kryetari i Komunës së Gjianit, Lutfi Haziri, nënshkruan kontratat me tetë përfituesit e nën-granteve, në kuadër të projektit "Te rinjtë në Agrobiznes- Regjioni Ekonomik Lindje". (Zyra e Kryetarit Haziri, ora 11:00)

- Punëtorët teknik te qendrës studentore do të protestojnë para drejtorisë së qendrës studentore. (Para drejtorisë së qendrës studentore, ora 11:00)

- Kryetari i Lëvizjes Vetëvendosje Albin Kurti viziton Ulpianën. (Ulpianë, ora 11:40)

- Komuna e Prishtinës në bashkëpunim me Zyren e Bashkimint Evropian në Kosovë organizon promovimi i shtegut për çiklistë, si fazë testuese. (Rruga Zagrebi në Prishtinë, ora 12:00)

- Kryetari i Lëvizjes Vetëvendosje Albin Kurti viziton Janjevën. (Janjevë, ora 12:20)

- Komuna e Prishtinës në bashkëpunim me Zyren e Bashkimint Evropian në Kosovë organizon tryezë diskutimi “Ecja, çiklizmi dhe transporti urban”. (Kolegji Tempulli, rr. Eduard Lir 156, ora 14:00)

- Fondacioni i Kosovës për Shoqëri të Hapur bën promovimin e publikimeve dhe organizon panel diskutimin “ Njohja e Kosovës bashkëkohore”. (Swiss Diamond Hotel, ora 14:00)  

- Federata e Piingpongut e Kosoves, organizon ndeshjet e ligës së parë, e ndeshja derbi pritet të jetë ajo ndërmjet Shkollës dhe Hasan Prishtinës. (Prishtinë, ora 18:00)

- Kryetari i Lëvizjes Vetëvendosje Albin Kurti mban tubim më banorë të fshatit Rufc. (Rufc, ora 19:30)

- Kryetari i Lëvizjes Vetëvendosje Albin Kurti mban tubim më banor në fshatin Gadime. (Gadime, ora 21:00)