20 Gusht 2019

Kampistët e Kampit Ndërkombëtar vizitojnë Muzeun Etnologjik

Prishtinë, 21 korrik - Organizata Kosovare për Talent dhe Arsim - Toka organizon vizitë në Muzeun Etnologjik për Kampistët e Kampit Ndërkombëtar

Toka punon që të rinjtë në Kosovë të zhvillojnë shkathtësi të reja përmes edukimit jo-formal, si dhe nxitë qytetarinë aktive te ta përmes vullnetarizmit edukativ.

Kampistë nga Franca, Izraeli, Amerika, Maqedonia e Veriut, Mali i Zi, Shqipëria dhe Kosova, ndër shumë aktivitete të tjera, do të vizitojnë Muzeun Etnologjik të Kosovës për të shkëmbyer njohuri kulturore mes kampistëve vendas dhe kampistëve vizitorë.

Të gjithë do të shijojnë ushqime tradicionale si pite dhe fli e do të kënaqen duke mësuar për kulturën tonë shqiptare.

Kampi Ndërkombëtar financohet nga "Programi i shoqërisë civile për Shqipërinë dhe Kosovën", financiuar nga Ministria e Punëve të Jashtme të Norvegjisë dhe menaxhuar nga Fondacioni Kosovar për Shoqëri Civile (KCSF) në partneritet me Partnerët Shqipëri për Ndryshim dhe Zhvillim (PA).

Kampi poashtu përkrahet nga Programi Angazhimi për Barazi – E4E, i financuar nga Agjencia e Shteteve të Bashkuara për Zhvillim Ndërkombëtar - USAID dhe zbatuar nga Qendra e Trajnimeve dhe Burimeve për Avokim - ATRC, si dhe Komuna e Prishtinës.

 

Kalendari

Ngjarjet e datës 20 gusht 2019 - Ministri i Tregtisë dhe Industrisë, Endrit Shala do ta takojë ministrin e Ekonomisë së Maqedonisë së Veriut, Kreshnik Bekteshi. (Holli i Ministrisë së Tregtisë dhe Industrisë, ora 9:30)

- Oda Ekonomike Amerikane në Kosovë organizon tryezën për gjendjen e prodhimit në Kosovë ku do të diskutohen rekomandimet ndaj Qeverisë së re rreth zhvillimit të mëtutjeshëm të sektorit të prodhimit, me panelistë përfaqësues të bizneseve prodhuese në vend. (Hotel Sirius, ora 9:55)

- Në Gjilan fillon implementimi i programit “Shkollat e Shekullit 21”, i cili mbështetet nga Qeveria e Britanisë, i dizajnuar nga British Council. (Salla e Kuvendit Komunal, ora 11:00)

- Instituti Demokratik I Kosovës / Transparency International Kosova organizon konferencën për media gjatë të cilës do të shpalosën të gjeturat e hulumtimit pilot mbi transparencën e kryeqyteteve evropiane, ku mes 27 kryeqyteteve evropiane është vlerësuar edhe Prishtina. (Salla e konferencave të KDI, ora 12:00)

- Kryetari i Komunës së Prizrenit Mytaher Haskuka do të pret në takim anëtarin e Parlamentit Britanik, John Grogan ku pas takimit do të ketë edhe një konferencë të përbashkët për media. (Shtëpia e Bardhë, ora 13:00)

- Mbahet ceremonia e hapjes se festivalit të edicionit të 9-të të Festivalit të Arteve dhe Kulturës Tradicionale Etnofest. (Etnokompleksi i fshatit Kukaj, ora 18:00)

- Komuna e Prizrenit në kuadër të hartimit të buxhetit për vitin 2020 do të organizojë dëgjime publike me me banorët e rajonit të Zhurit, Vërrinit dhe Vërmicës me qëllim të angazhimit të tyre në procesin e hartimit të buxhetit, transparencës, gjithëpërfshirjes dhe llogaridhënies ndaj qytetarëve. (Shkolla fillore në Zhur, ora 19:00)

- Aleanca Franceze e Prishtinës, Kino Armata dhe Termokiss organizojnë së bashku edicionin e parë të festivalit "Kino nshehër". (Kino Armata te Sheshi, ora 20:00)