20 Shkurt 2020

Jusuf Osmani, laureati kryesor i çmimit në trashëgimi kulturore

Prishtinë, 27 shkurt - Ministria e Kulturës, Rinisë dhe Sportit, në një ceremoni të organizuar sot në praninë e ministrit Kujtim Gashi, dha çmimet  në fushën e trashëgimisë kulturore, të cilat jepen në bazë të rregullores për dhënien e çmimeve në trashëgimi.

Çmimi për Veprimtari Jetësore në fushën e trashëgimisë kulturore “Dea Dardanicae”, iu nda Jusuf Osmanit dhe shpërblim financiar në vlerë prej 5000 euro për faktin se i njëjti ka bërë një mori botimesh nga fusha e historisë dhe arkivistikës si dhe për kontributin e jashtëzakonshëm për dokumentimin e krimeve serbe në luftën e fundit në Kosovë.

Ndërsa Çmimi Vjetor për Merita të Veçanta në fushën e trashëgimisë kulturore “Shtjefën  Gjeqovi” iu dhurua Shemsi Krasniqit me një shpërblim prej 2500 euro, për shkak të kontributit të tij dhënë për artin shkëmbor në Kosovë, një fushë shumë e veçantë e trashëgimisë kulturore.

Çmimi Vjetor për Vepër Shkencore në fushën e trashëgimisë kulturore “Zef Mirdita” iu nda Gjon Berishës dhe shpërblimi prej 2500 euro sepse vepra e tij “Gjergj Kastrioti – Skenderbeu në fondet e Arkivit Shtetëror të Dubrovnikut” është kontribut i veçantë shkencor i mbështetur kryesisht në dokumente.

Dhe Çmimin Vjetor për Menaxhim Institucional në fushën e trashëgimisë kulturore “Muhamed Shukriu” e mori Milot Berisha dhe u shpërblye me 2000 euro, si udhëheqës i projektit të lokalitetit më të veçantë të trashëgimisë kulturore i cili tashmë është shndërruar në “Parku Arkeologjik i Ulpianës” i cili me përkushtimin e tij ka bërë që ky lokalitet të jetë top atraksioni i turizmit kulturor në Kosovë, thuhet në vlerësimin e jurisë. Çmimet dhe vlerat financiare janë ndarë në bazë të rregullores.

Laureatët e çmimeve u shprehen të kënaqur me mirënjohjen që shteti i Kosovës, konkretisht MKRS-ja po tregon për punën e tyre në fushën e trashëgimisë dhe falënderuan ministrin Kujtim Gashi për kujdesin që ka ndaj trashëgiminë kulturore duke e konsideruar atë ndër prioritetet dhe vlerat e posaçme për Republikën e Kosovës.

Ministri Gashi tregoi se përmes këtyre çmimeve ne e shfaqim falënderimin dhe vlerësimin shtetëror për profesionistët dhe ata që kontribuojnë në fushën e trashëgimisë kulturore në vendin tonë.

Gashi tha se komisioni e ka vlerësuar me të drejtë secilin çmim që ka vendos me e nda dhe si ministri kemi qenë të përkushtuar që të kenë një juri profesionale dhe të marrin vendime të pavarura e të drejta.

“Ne jemi mundu që jurinë me e mbështetë dhe si komision me marr vendime të pavarura dhe drejta. Jam i lumtur si ministër që po i ndajmë këto çmime me ju motivuar juve e dimë se veprimtaria juaj nuk shpaguhet me vlera monetare por është akt i yni që e vlerëson punën tuaj në trashëgiminë kulturore dhe ne si ministri do jemi vazhdimisht mbështetës tuaj në veprimtarinë që bëni”, tha ai.

Ministri Gashi tha se “Puna e palodhshme dhe angazhimi i juaj i sot merr çmime dhe për të tjerët që nuk janë në mesin tonë e mbajnë gjallë trashëgiminë kulturore, aktivitetet në fushën kulturore ”.

Ndërkaq, Jusuf Osmani falënderoi ministrin për ndarjen e këtij çmimi.

“Faleminderit për këtë mirënjohje që e ndaj me shumë krijues të tjerë që na kanë ndihmuar të japim kontribut modest në konkurrimin e të dhënave në fushën e trashëgimisë që është e rëndësishme për ne sepse kjo identifikohet me identitetin kombëtar, të huajt janë munduar këtë trashëgimi të na rrënojnë por nuk e kanë arrit qëllimin dhe ajo që na ka mbete po mundohemi me tjetërsuar”, tha Osmani.

Juria Profesionale e cila ka vlerësuar materialet e ofruara për laureatët ka qenë në përbërje të Prof. asoc. dr. Nuri Bexheti, Dr. sc. Shafi Gashi, Prof. dr. Agim Zogaj, Mr. Bekim Ramku, dhe Mr. Sali Shoshi.

Kalendari

Ngjarjet e datës 20 shkurt 2020

- Behën homazhe në nderim te jetës dhe veprës së heroit, Selman Vojvoda. (Varri i heroit, në Llaushë të Skenderajt, ora 9:00)

- Mbahet takimi me Misionin e Komisionit Evropian për Vlerësimin e Programit për Reforma në Ekonomi dhe diskutimin mbi rekomandimet e politikave. (ndërtesa e Qeverisë salla P38,  ora 9:30)

- Administrata Tatimore e Kosovë do të mbaj seminar me tatimpaguesit e regjionit të  Prishtinës ku prezent do të jetë edhe Drejtori i Përgjithshëm i ATK-së Ilir Murtezaj. (Hotel Emerald, ora 10:00)

- Bëhet konstituimi i Komisionit për Çështje të Sigurisë dhe Mbrojtjes. (Ndërtesa e Kuvendit, salla N 204, ora 11:00)

- Kryetari i komunës së Istogut, Haki Rugova do ta pres në takim ambasadorin bullgar në Kosovë. (Zyra e Kretarit Haziri, ora 11:00)

- Komuna e Rahovecit mban diskutimi publik lidhur me Draft Planin Komunal të Veprimit për Efiçiencë të Energjisë dhe Planin Lokal për Veprim në Mjedis. (Salla e mbledhjeve të Kuvendit Komunal të Rahovecit, ora 11:00)

- Bëhet konstituimi i Komisionit për Ekonomi, Punësim, Tregti, Industri dhe Investime Strategjike. (Ndërtesa e Kuvendit, salla N303, ora 11:00)

- Mbahet ceremonia e dorëzimit te donacionit për qerdhën “Gëzimi Ynë” në Istog nga Ambasada e Bullgarisë. (Qerdhja “Gëzimi Ynë” në Istog, ora 11:30)

- Mbahet ceremonia e promvimit të librit" Obstetrika",  të Prof. dr. Shefqet Lulaj. (Bibloteka Kombëtare "Pjetër Bogdani", ora 12:00)

- Mbahet akademi përkujtimore për dëshmorin e Kosovës, Selman Vojvoda, në 30 vjetorin e rënies së tij. (Teatri Kombëtar, ora 12:00)

- Ministri i Punëve të Brendshme dhe Administratës Publike, z. Agim Veliu do të pres në takim ambasadorin amerikan në Kosovë, z Philip Kosnett. (objekti kryesor i MPBAP-së, ora 13:00)

- Ministrja e Drejtësisë, Albulena Haxhiu do të mbajë konferencë për media. (Objekti I Ministrisë, ora 13:00)

- Promovohet revista “Intro”, që është produkt i punës së studentëve të vitit të tretë të Departamentit të Gazetarisë, në kuadër të lëndës "Menaxhim i medias". (Amfiteatri i Fakultetit të Filologjisë në Universitetin e Prishtinës, ora 14:00)

- Komuna e Mitrovicës mban debat publik lidhur me rregulloren për realizimin e të drejtave të fëmijëve përmes sistemit qeverisës komunal miqësor për fëmijët. (Salla e mbledhjeve të Kuvendit të Komunës të Mitrovicës, ora 14:00)

- Zhvillohet ndeshja basketbolliste mes Kosovës dhe Islandës. (Pallati i Rinisë dhe Sportit në Prishtinë, ora 19:00)