25 Shkurt 2020

Interesim i jashtëzakonshëm i publikut gjilanas për shfaqjen “Trenat”

Gjilan, 26 janar - Në ditën e katërt të Festivalit të dramës "Talia e Flakës 2020", para artdashësve gjilanas është prezantuar shfaqja konkurruese "Trenat" e autorit Haqif Mulliqi, prodhim i Teatrit Kombëtar të Prishtinës.

Vendosja e shfaqjes është konceptuar të prezantohet në skenën e rrethuar nga publiku, për një numër të kufizuar syresh.

E interesimi për ta pa nga afër këtë shfaqje ka qenë shumë më i madh nga ç'pritej prej publikut tradicional lokal, pasi kanë marrë pjesë edhe artdashës e krijues të shumtë nga Prishtina e gjetiu, emra të shquar të dramaturgjisë e artit skenik në përgjithësi.

Fabula e shfaqjes "Trenat" përmes lojës së aktorëve Shpëtim Selmani e Rozi Kryeziu ka shpërfaqur një moment jetësor të çiftit (Veni e Vini) në pritje për t'u arratisur, me qëllim të shpëtimit të identitetit e integritetit personal, ndonëse të dalë nga binarët e normalitetit të jetës, si pasojë e përjetimeve pas dramës së dhunimit e përdhunimit që u ka ndodhur.

Nga situatat dramatike të tensionuara në skenë herë-herë nëkuptohet që ata paraprakisht janë dakorduar të "harrojnë" atë gjëmë që u ka rënë mbi kokë.

Porse pesha e saj del të jetë më e rëndë seç është paramenduar se mund të përballohet, ndaj, me kalimin e kohës problemi bëhet gjithnjë e më i vështirë për t'u "harruar".

Shih për këtë, shpërthimet e kohëpaskohshme të protagonistëve, veçmas shpërthimet instinktive të aktores Rozi Kryeziu, vijnë mëse të natyrshme në skenë, ndërsa nxjerrin në pah natyrën e saj sublime femërore, e cila paralelisht me pasojat e tmerrit të përjetuar është e detyruar të përballet edhe me dhembjet e pritjes së dyfishtë: atë të lindjes së foshnjes dhe trenit "shpëtimtar", për të vazhduar "itinerarin" e jetës në drejtim të panjohur.

Përveç aktorëve Rozi Kryeziu e Shpëtim Selmani, në shfaqjen "Trenat", e cila është konceptuar si dramë e ironisë, pritjes e frikës, ka luajtur edhe Xhemajl Gllavica si instrumentist në sfond, ndërsa regjinë e ka punuar Zanë Duraku.

Shfaqja "Trenat" e shkruar nga autori i sa e sa veprave të inskenuara gjithandej, Haqif Mulliqi, është prezantuar para publikut gjilanas në natën e katërt konkurruese, ndërsa skenografinë e ka realizuar Mentor Berisha.

Kjo ishte shfaqja e dytë nga repertori i Teatrit Kombëtar të Kosovës në konkurrencë zyrtare në "Talia e Flakës 2020", pas asaj të regjisores Burbuqe Berisha e autor Milazim Krasniqi "Bryma e vdekjes".

Paraprakisht janë prezantuar edhe shfaqjet "Shkamat" e autorit dhe regjisorit Fadil Hysaj prodhim i "EtnoFest" dhe shfaqja "Graviteti" me autor Lirak Celaj e regjisor Florent Mehmeti nga teatri "Oda".

Në ditën e fundit të Festivalit të Dramës shqipe "Talia e Flakës 2020", të dielën në program është shfaqja nikoqire e Teatrit të Qytetit të Gjilanit "a. y. l. a. n", e autorit Jenton Neziraj në regji të Blerta Neziraj, me ç'rast bëhet edhe ndarja e çmimeve.

Kalendari

Ngjarjet e datës 25 shkurt 2020 - Konstituohet Komisioni për Mbikëqyrjen e Agjencisë së Kosovës për Inteligjencë. (Ndërtesa e Kuvendit, salla N 303, ora 10:00)

- Koalicioni i OJQ-ve për Mbrojtjen e Fëmijëve në Kosovë organizon konferencë të jashtëzakonshme për media për të shprehur shqetësimin lidhur me trajtimin e rasteve ku fëmijët janë viktima të formave të abuzimit dhe dhunës seksuale. (Ambientet e organizatës Forumi për Iniciativa Qytetare në lagjen Pejton, ora 10:00)

- Konstituohet Komisioni për Shëndetësi dhe Mirëqenie Sociale, Vendi: (Ndërtesa e Kuvendit, salla N302, ora 10:00)

- Demokracia Plus dhe Qendra për Avokim dhe Kulturë Demokratike në bashkëpunim me programin e USAID për Fuqizim të Sistemit të Drejtësisë organizojnë konferencën në cilën do të shpalosen rezultatet e Anketës me përdoruesit e shërbimeve të gjykatave. (Hotel Sirius, ora 10:00) 

- Konstituohet Komisioni për Buxhet dhe Transfere. (Ndërtesa e Kuvendit, salla C 203, ora 11:00)

- Konstituohet Komisioni për Punë të Jashtme dhe Diasporë. (Ndërtesa e Kuvendit, salla N 10, ora 11:00)

- Bibloteka Kombëtare e Kosovës dhe Shoqata e të Burgosurve Politik organizojnë hapjen e ekspozitës "Kujtesa e Kosovës, portrete të Adem Demaqit në pikturë dhe fotografi". (Bibloteka Kombëtare, ora 11:00)

- Konstituohet Komisioni për Arsim, Shkencë, Teknologji, Inovacion, KulturÑ‘, Rini dhe Sport. (Ndërtesa e Kuvendit, salla N 204, ora 11:00)

- ADMOVERE e mbështetur nga KFOS promovon raportin "Gjendja në Fakultetin e Gjeoshkencave të Universitetit të Mitrovicës". (Hapësirat e rektoratit të UMIB-it në Mitrovicë, ora 11:00)

- Komisioni për Ekonomi, Punësim, Tregti, Industri, Ndërmarrësi dhe Investime Strategjike mban diskutim lidhur me detyrat me prioritet dhe organizimin e punës së Komisionit. (Ndërtesa e Kuvendit, salla C 203, ora 12:00)

- Anibar Festivali Ndërkombetar i Animacionit organizon shfaqjen e filmave nga java e Kinematografisë afrikane. (Kinema Jusuf Gërvalla, 13:00)