Prishtinë, 8 shtator - Dje në Qendrën Sportive 'Sezair Surroi' në Prizren filluan xhirimet e filmit të shkurtër hibrid (zhanri dokufiction) “Table Stories” në produksion të SK Pictures, e subvencionuar nga Qendra Kinematografike e Kosovës dhe bashkëfinancuar nga Komuna e Prishtinës dhe Televizioni Kulturor Europian 'ARTE'.

Filmi në regji dhe skenar të Samir Karahodës, është projekt që bazohet në ngjarjet e vërteta të anëtarëve të ekipit të pingpongut në që pas pranimit në Federatën Ndërkombëtare të Pingpongut me të drejta të plota, e kuptojnë që nuk kanë hapësirë për stërvitje, fakt që i nxit dy entuziastë të mobilizohen për ta riaktivizuar klubin e pingpongut dhe përgaditjet për gara të mëdha ndërkombëtare. Por ata, as që janë të vetëdijshëm se çfarë i pret në këtë rrugëtim.
 
'Edhe pse situata me pandeminë nuk na lejoj t'i fillojmë xhirimet sipas planit origjinal, jemi të lumtur që më në fund u organizuam dhe e konsoliduam ekipën e produksionit për të filluar me xhirimet e projektit tonë të ri', u shpreh Eroll Bilibani, producenti i filmit 'Table Stories' duke shtuar 'filmi është i zhanrit DokuFiction, pra një film dokumentar me skena të rikrijuara duke u bazuar në ngjarjet e vërteta të protagonistëve kryesorë të filmit. Jam shumë i lumtur ta vazhdojë bashkëpunimin me Samirin, që e ka një vizion shumë të qartë vizual dhe artistik në portretizimin e shoqërisë në të cilën jetojmë sot përmes reinterpretimit të ngjarjeve nga e kaluara.'

Regjisori i filmit Samir Karahoda shprehet se 'Table Stories do të jetë një tribut ndaj talentëve të rinj të vendit, që për shkak të neglizhencës së institucioneve përgjegjëse detyrohen që vet të gjejnë zgjidhje alternative për të ushtruar aktivitetin e tyre sportiv apo edhe ti shuajnë ëndërrat. Do te jetë një projekt sfidues pasi që i gjithë filmi do të realizohet me protagonistë të vërtetë, por entuziazmi i tyre dhe dëshira për të treguar ngjarjen e tyre më bënë të besoj edhe më shumë si në ta ashtu edhe në projekt.'
 
Filmi planifikohet të kompletohet rreth muajit maj të vitit të ardhshëm.