24 Maj 2019

Mbahet debati për Miniera dhe Minerale dhe për Ligjin për Shërbimin Gjeologjik

Prishtinë, 17 prill - Në ditën e tretë, debati për Projektligjin për Ndryshimet dhe Plotësimet e Ligjeve, që kanë të bëjnë me racionalizimin dhe vendosjen e vijave llogaridhënëse, u përqendrua kryesisht tek Ligji NR. 03/L-163  për Miniera dhe Minerale dhe Ligji për Shërbimin Gjeologjik të Kosovës. Të pranishëm, pos zyrtarëve të MAP-it,  Zyrës së Komisionit Evropian,  SIGMA-së, Ministrisë së Zhvillimit Ekonomik, ishin edhe përfaqësuesit e shoqërisë civile. Gjatë këtij debati u tha se shkurtesa KPMM (Shërbimi për Gjeologji, Miniera dhe Minerale),  zëvendësohet me shkurtesën SHGJMM (Shërbimi për Gjeologji, Miniera dhe Minerale). Me një fjalë, me hyrjen në fuqi të këtij ligji, KPMM-ja shkrihet në Shërbimin për Gjeologji, Miniera dhe Minerale, e cili shndërrohet në Agjenci Ekzekutive në kuadër të Ministrisë përgjegjëse për sektorin minerar.

Ndërkaq, në tekstin e Ligjit nr. 03/L-163 për Minierat dhe Mineralet, emërtesa Ministria e Energjisë dhe Minerale, zëvendësohet me emërtesën Ministria përgjegjëse për energji dhe miniera, kurse emërtesa Ministria e Ekonomisë dhe e Financave zëvendësohet me emërtesën Ministria përgjegjëse për financa. Kurse të punësuarit marrin statusin e shërbyesve civilë.

Kundrejt këtyre pohimeve të më sipërme, përfaqësuesit e KPMM-së dhe të ShGjK-së u angazhuan, që këto dikastere ta ruanin pozicionin që e kishin deri tash. Përballë këtij insistimi, nga kryesuesit e këtij projekti u kërkua që propozimet e tyre t’i përcjellin me shkrim të Grupi punues, me qëllim të harmonizimit të plotësim-ndryshimeve që i kërkon Projektligji në diskutim.

 

Kalendari

Ngjarjet e datës 24 maj 2019

- Nisin punimet për rregullimin e rrugës kryesoret të qytetit të Deçanit Rrugës së  Qendrës konkretisht rrugës 'Luan Haradinaj' dhe 'Dëshmoret e Kombit'. (Në afërsi të pikës së karburantit Agonisi Gas në Carrabreg, ora 10:00)

- Mbahet mbledhja e komisionit për Mbikëqyrjen e Financave Publike në të cilën do të behët shqyrtimi i Raportit të Auditimit për raportet financiare dhe atyre të deklarimit financiar të subjekteve politike për vitin 2017. (Ndërtesa e Kuvendit, salla N 302, ora 10:00)

- Kryeministri Ramush Haradinaj merr pjesë në ceremoninë e fillimit të punimeve të rrugës së qytetit të Deçanit. (Sheshi i qytetit në Deçan, ora 10:00)

- Drejtori i Zyrës për Rritje Ekonomike i USAID-it në Kosovë, Brian Martalus, do të mbajë një fjalim në hapjen e Konferencës Ekonomike të Diasporës Shqiptare nga Evropa - B2B. (Hotel Emerald, ora 10:00)

- “Let’s Do It” mban aksion pastrimi në disa fshatra të Hasit, me moton “Për një Has të pastër”. (Fshati Gjonaj tek Ura e Drinit të Bardhë, ora 10:00)

- Drejtoresha e misionit të USAID-it Lisa Magno do të flasë me rastin e prezantimit të gjashtë video udhëzuesve për e-prokurim. (Hoteli Swiss Diamond, ora 10:00)

- Mbledhja e komisionit Ad-hoc për përmirësimin dhe forcimin e procesit zgjedhor në të cilën do të behët shqyrtimi i kërkesës së Grupit për Studime Juridike dhe Politike për pjesëmarrje në Grupin Këshillëdhënës. (Ndërtesa e Kuvendit, salla N 303, ora 10:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Kompleksin Memorial “Dëshmorët e Kombit” në Gllogjan. (Kompleksi Memorial “Dëshmorët e Kombit” në Gllogjan, ora 11:00)

- Programi i Kombeve të Bashkuara për Zhvillim, Ministria e Punëve të Brendshme dhe Policia e Kosovës do të shënojnë së bashku Ditën Ndërkombëtare të Grave për Paqe dhe Çarmatim me një konferencë shtypi. (Ambientet e UNDP-së, ora 11:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Fshatin Kodrali. (Fshati Kodrali, ora 11:30)

- Presidenti i Republikës së Kosovës, Hashim Thaçi, merr pjesë në Akademinë Përkujtimore për heroin Abdullah Tahiri. (Teatri Kombëtar i Kosovës, ora 12:00)

- Prokuroria Themelore e Pejës organizon konferencën për media ku temë diskutimi do jetë ngritja e dhjetëra aktakuzave për rastin e njohur në opinionin publik si “veteranët e rrejshëm”. (Objekti i Prokurorisë Themelore të Pejës, rruga “Hasan Cermaxhija”. ora 12:00)

- 44 nxënës nga klasa 7 deri në klasën 9, nga të gjitha regjionet e Kosovës do të takohen për të garuar në finalen e garës së tretë vjetore të gërmëzimit.  (Biblioteka kombëtare, ora 13:15)

- Ministria e Kulturës, Rinisë dhe Sportit organizon ceremoninë e ndarjes  së çmimeve “Nikete Dardani”. (Kabineti i Ministrit të Kulturës, ora 13:30)

 - Shënohet 19 vjetori i themelimit të Aleancës për Ardhmërinë e Kosovës në Gjakovë. (Pallati i Kulturës” Asim Vokshi” , Gjakovë, ora 18:00)

- Organizuar nga Ministria e Diaspores dhe Investimeve Strategjike dhe Rrjeti i Bizneseve të Diasporës Shqiptare mbahet konferenca ekonomike e diasporës shqiptare nga Evropa më B2B. (Hotel Emerald, ora 20:00)

- Kryeministri Ramush Haradinaj merr pjesë në Konferencën Ekonomike të Diasporës Shqiptare nga Evropa, organizuar nga Ministria e Diasporës dhe Investimeve Strategjike dhe Rrjeti i Bizneseve të Diasporës Shqiptare. (Hotel Emerald, ora 20:00)