22 Janar 2019

Tranzicioni i energjisë fenomen global ndaj të cilit Kosova nuk është e veçuar

Prishtinë, 1 nëntor - Balkan Green Foundation dhe Germanwatch organizuan Konferencën mbi Tranzicionin e Energjisë “Sfidat dhe Mundësitë në Kosovë dhe rajon” ku u shtjelluan sfidat, strategjitë e politikave si dhe rruga drejt një Tranzicioni të Energjisë në Kosovë dhe në rajon.

Visar Azemi, Drejtori Ekzekutiv i Balkan Green Foundation, me hapjen e konferencës tha se tranzicioni i energjisë është një fenomen global ndaj të cilit Kosova nuk është e veçuar.

“Tranzicionin e energjisë e kemi mësuar nga miqtë tanë Gjerman, të cilët dëshmuan që tranzicioni i energjisë është i mundur dhe tani ne jemi duke punuar së bashku për eksploruar mundësitë që Kosova ka në këtë fushë. Kosova ka potenciale të mëdha të energjisë solare, dhe asaj të erës, andaj, investimet në burimet e ripërtëritshmë duhet përshpejtuar,” tha Azemi.

Pjesë e konferencës ishin edhe Valdrin Lluka, Ministër i Zhvillimit Ekonomik, Christian Heldt, Ambasadori Gjerman në Kosovë dhe Riccardo Serri, Shefi i sektorit për Politikë, Ekonomi dhe Integrim Evropian në Zyrën e BE-së në Kosovë, të cilët morrën fjalën për të diskutuar mbi rrugën drejt një të ardhmeje të begatë dhe të qëndrueshme të sistemit energjetik në Kosovë e rajon.

Përgjatë fjalimeve të tyre u cek se është e rëndësishme siguria e furnizimit me energji, përballueshmëria e çmimeve nga qytetarët, mbrojtja e ambientit dhe integrimi i burimeve të ripërtëritshme në sistemin energjetik – duke punuar kështu në arritjen e një tranzicioni energjetik në Kosovë dhe rajon.

Konferenca u nda në dy panele diskutuese. Paneli i parë diskutoi mbi rëndësinë e integrimit të burimeve të ripërtëritshme në sistemin energjetik, duke shqyrtuar politikat që nxisin efikasitetin e energjisë dhe kalimin nga qymyri në burimet e ripërtëritshme – të cilat janë thelbësore në arritjen e një tranzicioni energjetik në Kosovë dhe rajon.

Përgjatë diskutimit u tha se tranzicioni në energji nuk nënkuptohet vetëm në ndryshimin e burimeve të energjisë por edhe në përfshirjen e tranzicionit social, duke zhvendosur një sistem të centralizuar të energjisë në atë ku qytetari dhe konsumatori janë në qendër të zhvillimit të energjisë.

 Ky panel u përbë nga zyrtarë të Ministrisë së Zhvillimit Ekonomik, DG ENER, Balkan Green Foundation, Sekretariati i Komunitetit të Energjisë, dhe GIZ.

Ndërsa, paneli i rradhës shqyrtoi sfidat dhe mundësitë e investimeve në sektorin e energjisë nga perspektiva e ekonomisë, ligjit, teknologjisë në dispozicion dhe investitorëve potencialë.

Përveç kësaj, panelistët debatuan mbi prioritetet e vendeve të Ballkanit Perëndimor, duke përfshirë zbatimin e Pakos së Tretë të Energjisë dhe integrimin në treg në nivel rajonal, si dhe në tregjet evropiane.

Pjesë e këtij paneli ishin përfaqësues nga KOSTT, Zyra e Rregullatorit të Energjisë, Germanwatch, Agora Energiewende, Agjencia e Kosovës për Efiçencë të Energjisë, dhe nga SOWI Kosovo.

Prezent në konferencë ishin përfaqësues të institucioneve vendore dhe të huaja, shoqërisë civile, ekspertë kombëtarë dhe ndërkombëtarë, profesorë e studentë, të cilët kontribuan me diskutime konkrete në adresimin e çështjeve me interes të përbashkët në rrugën e Kosovës per zhvillimin dhe tranzicionin e energjisë.

Gjatë diskutimeve me pjesëmarrësit, u theksua se duke marrë parasysh se rajoni është shumë i varur nga lëndët djegëse fosile, është e domosdoshme që agjendat e zhvillimit të energjisë të prioritizojnë diversifikimin e burimeve të energjisë, duke pasur qëndrueshmërinë, besueshmërinë dhe përballueshmërinë si gur themelet e politikave të tyre të energjisë.
 

Kalendari

Ngjarjet e datës 22 janar 2019 - Mbahet mbledhja e Komisionit për të Drejtat e Njeriut, Barazi Gjinore, për Persona të Pagjetur dhe Peticione. (Ndërtesa e Kuvendit, salla N 302, ora 10:00)

- Mbahet programi i seminarit përmbyllës i projektit të binjakëzimit “Përkrahja e mëtejme e arsimit në sigurinë  publike në Kosovë”. (Akademia e Kosovës për Siguri Publike në Vushtrri, ora 10:00)

- Punëtorët teknik te disa shkollave të Prishtinës protestojnë në shenjë pakënaqësie lidhur me mos rritjen e pagave si dhe neglizhenca e Komunës së Prishtinës për t'i kthyer këta punëtorë nën menaxhim të Komunës sipas ligjit mbi Kryeqytetin e Kosovës. (Para Komunës se Prishtinës, ora 11:00)

- Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal mban mbledhjen e parë për ketë vit në të cilën do te shqyrtojë Projekt Statutin e Trepçes dhe Raportin e Panelit për zgjedhjen e Bordit të NP KOSTT. (Ndërtesa e Kuvendit, salla N 303, ora 11:00)

- Mbahet debati me temën 'Pozita dhe problemet e komuniteteve jo-shumicë në Kosovë'. (Qendra Mediale në Çagllavicë, ora 11:00)

- Profesori në Universitetin e Kembrixhit, Marc Weller, do të mbajë ligjëratë për studentët e UBT-së me temë “Dialogu Kosovë - Serbi: Sfidat dhe rruga përpara”. (Kampusi i UBT-së, ora 16:00)

- Shefja e Zyrës së BE-së në Kosovë, Nataliya Apostolova dhe Shefi i Zyrës Ndërlidhëse të Rumanisë, Daniel Onişor do të paraqesin prioritetet e Presidencës së Rumanisë të Këshillit të Bashkimit Evropian. (Restorant Rroni në Veternik, ora 18:00)