26 Janar 2022

Së shpejti fillon faturimi i rrymës në katër komunat veriore

Prishtinë, 25 nëntor - Kryeministri i Kosovës, Albin Kurti ka thënë se shumë shpejt do të vije dita që qytetarët e katër komunave veriore do ta paguajnë energjinë elektrike.

Kryeministri Kurti duke iu përgjigjur deputetes së AAK-së, Time Kadrijaj se edhe për sa kohë do t’u paguhet energjia elektrike qytetarëve në veriun e Kosovës, tha se në bashkëpunim me ZRRE-në, Bashkimin Evropian dhe me partner të tjerë, të gjithë edhe ata në pjesën veriore do ta paguajnë energjinë që shpenzojnë, e siç tha ai do të ndodhë për herë të parë pas 22 vjetësh.

Deputetja Kadrijaj tha se sa ishte Lëvizja Vetëvendosje në opozitë e kanë akuzuar çdo qeveri për këtë temë.

“Sa ishit në opozitë keni akuzuar çdo qeveri për të njëjtën temë. Nuk keni lënë qeveri e zyrtarë qeveritarë e pa e akuzuar e denigruar, deri në pikën më të ulët të mundshme. Sa ishit në opozitë keni thënë se fajet I ka qeveria, tash kur jeni në qeveri po thoni se fajin e kanë strukturat ilegale të Serbisë.“

“Tregoni, a jeni kryeministër I gjithë Republikës, dhe pse po e gjuani fajin tani te dikush tjetër, e sa ishit në opozitë thoni tjera fjalë. A do të thotë kjo që do të jeni dorëlirë me parat e shtetit, kryeministër. Dhe meqenëse po thoni se keni me bërë sistemin e faturimit, kur do të filloj sistemi I faturimit në pjesën veriore të Mitrovicës?”, tha Kadriaj.

Kurti tha se kritikat e tij kanë qenë të arsyeshme, dhe beson se këtë çështje siç tha ai të trashëguar, do ta zgjidhë shpejt.

“Është e vërtet që ne kemi qenë kritik kur kemi qenë në opozitë, andaj sot e kemi trashëguar këtë gjendje e cila na ka vërtetuar dhe dëshmuar se kemi pasur të drejt në kritikën tonë. Janë bërë shumë dakordime të pafavorshme për Kosovën në Bruksel, dhe ne po i vuajmë pasojat tani.“

“Në raportet tona që i kemi atje edhe me partnerët ndërkombëtar, por edhe në bisedimet me Serbinë, argumentet kryesore kundër nesh janë dakordimet e pajtueshmëritë e qeverive paraprake. Pra, unë duhet të operoj me trashëgiminë e lënë më herët. Po bëj më të mirën e mundshme në funksion të kushtetutshmërisë, në funksion të sovranitetit të Kosovës dhe pa dyshim që nuk do të dëshiroja që të jem në këtë gjendje.“

“Me krejt çfarë dimë e mundemi, sa më shpejt do të vij dita që të filloj faturimi edhe atje në veri, sepse është një padrejtësi e madhe ndaj të gjithë qytetarëve të Republikës, e në veçanti dëmtuesit më të mëdhenj janë pikërisht ata të cilët me qëndrimet tyre kundër Kosovës edhe nuk e paguajnë energjinë elektrike. Dhe ata që janë konsumatorë të mëdhenj, për interesa të tyre biznesore që shkaktojnë dëm të energjisë e cila konsumohet e nuk paguhet”, theksoi Kurti.

 

Kalendari

Ngjarjet e datës 27 janar 2022

- Kuvendi Komunal i Gjilanit mban seancën e radhes. (Salla e mbledhjeve të Kuvendit të Komunës së Gjilanit, ora 10:00)

- Komuna e Rahovecit organizon homazhe dhe nderime për dëshmorët e kombit: Nesimi Elshani, Agron Fetahu, Halim Hoti dhe Hilmi Krasniqi, të rënë në Brestoc me 27 janar 1990. (Brestoc, ora 10:00)

- Kuvendi i Kosovës mban seancën e jashtëzakonshme në të cilën do të mbahet debat parlamentar për gjendjen e pandemisë COVID-19 në Republikën e Kosovës. (Kuvendi i Kosovës, ora 11:00)

- Komuniteti Bektashian i Kosovës Gjyshata Gjakovë organizon ngjarjen përkujtimore për një vjetorin e kalimit nga jeta të ish-Kryetarit të Komunitetit Bektashian të Kosovës, Baba Mumin Lama si dhe 47 vjetorin e kalimit nga jeta të Baba Musa Himaduna, njëkohësisht rivarrimin e tij në tyrben e baballarëve bektashian në Gjakovë. (Ambientet e Teqesë Bektashiane në Gjakovë pranë “Hani i Haraçisë”, ora 11:00)
 
- Komuna e Rahovecit organizon manifestimin përkujtimor e kulturor për dëshmorët e kombit: Nesimi Elshani, Agron Fetahu, Halim Hoti dhe Hilmi Krasniqi. (Salla e Kuvendit Komunal në Rahovec, ora 11:00)

- Me rastin e 30 vjetorit të Shtëpive-Shkolla, Kryetari i Komunës së Prishtinës, Perparim Rama së bashku me ekipin e tij, do ta vizitoj Muzeun “Shtëpitë-Shkolla” te familja Hertica, shtëpi këto që u shndërruan në shkolla në periudhën e rezistencës mbarë popullore kundër regjimit serb. (Kodra e Trimave, ora 12:00)

- Universiteti “Fehmi Agani” në Gjakovë organizon ngjarjen kushtuar Ditës Ndërkombëtare të Përkujtimit të Holokaustit, e cila këtë vit i kushtohet shkrimtarit, veprimtarit politik, laureatit të Çmimit Nobel për Paqe dhe të mbijetuarit të Holokaustit, Elie Wiesel.  (Shkolla e Muzikës “Prenk Jakova” në Gjakovë, ora 12:00)

- Institutit për Politika Zhvillimore mban konferencën lidhur me situatën energjetike në vend. (Zyret e INDEP, ora 14:00)

- Kuvendi i Kosovës mban seancë plenare. (Kuvendi i Kosovës, ora 15:00)