13 Gusht 2020

LDK: Menaxhmenti i KEK-ut i instrumentalizuar nga Qeveria Thaçi

Prishtinë, 14 prill - Lidhja Demokratike e Kosovës ka vlerësuar se reagimi i KEK-ut, pas kritikave të LDK-së ndaj Qeverisë Thaçi për neglizhencë të sektorit të energjisë, është i natyrës politike dhe tregon se kjo kompani është instrumentalizuar plotësisht nga partia në pushtet.

Vlerësimet e dhëna në deklaratën e mëparshme të LDK-së mbështeten plotësisht në raportet e KEK-ut, Ministrisë së Zhvillimit Ekonomik (MZHE), Zyrës së Rregullatorit për Energji (ZRRE) dhe Ministrisë së Financave (MF).

Raporti i Ndërmarrjeve Publike i MZHE-së sipas LDK-së tregon se prodhimi i energjisë është rritur me 4%, ndërsa raporti i ZRRE-së thekson se prodhimi i energjisë në Kosovë është megjithatë i pamjaftueshëm.

Prandaj, LDK ka vlerësuar në deklaratën e saj se kjo rritje është përgjysmë krahasuar me rritjen e kërkesës për energji prej 8% në baza vjetore.

Raporti vjetor i ZRRE-së thekoin se furnizimi me energji është jo cilësor dhe se humbjet teknike e komerciale në vitin 2010 kanë qenë 41.22% të energjisë së prodhuar.

Sipas deklaratës së KEK-ut, për vitin 2011 qenkan zvogëluar humbjet nën 40%, për rreth 2%, por kjo pritet të konfirmohet në raporte kredibile siç është raporti i ZRRE-së.

Nga këto të dhëna sipas LDK-së konstatohet qartë se menaxhmenti i KEK-ut po reagon politikisht dhe pas asnjë bazë  ndaj kritikave të opozitës, e cila gjë nuk i lejohet një ndërmarrjeje publike.

\"Në anën tjetër, duket se menaxhmenti i KEK-ut nuk e ka kuptuar vlerësimin e LDK-së se konsumatorët e rregullt po e paguajnë dy herë energjinë që e shpenzojnë. Herën e parë ata po e paguajnë përmes pagesës së faturave të tyre. Ndërsa herën e dytë përmes pagesës së taksave ndaj shtetit, të cilat taksa po përdoren nga Qeveria për pagesën e energjisë së importuar\", thuhet në njoftimin e kësa partie.

Të dhënat nga Raporti Financiar për vitin 2011 i Ministrisë së Financave tregojnë se nga viti 2008 deri më 2011, KEK-u ka pranuar 177 milion Euro nga buxheti i Kosovës.

Vetëm në vitin 2010 ka marrë 60 milion, ndërsa më 2011 ka marrë 30 milion. Prandaj, rritja e fitimit neto në pasqyrat e KEK-ut është mashtrim me numra, pasi ai fitim është rritur nga mjetet e grantit nga buxheti, në të cilin buxhet kanë kontribuar qytetarët me taksat e tyre.

Në buxhetin e vitit 2012, janë paraparë edhe 37 milion subvencione për ndërmarrje publike, prej të cilave 13 milion i shkojnë KEK-ut. Kësaj i shtohen edhe 4.5 milion për energjinë për familjet që janë raste sociale.

KEK sipas LDK-së duhet të japë përgjigje se me çfarë procedure i paraqet si shpenzime rreth 22 milion euro në vit në emër të humbjeve nga shlyerja e llogarive të farkëtueshme, të cilat i ka prezantuar në pasqyrat financiare të saj.

LDK përkujton KEK-un se energjia në Kosovë është ndër më të shtrenjtat në rajon. Kërkesa e KEK-ut drejtuar ZRRE-së për rritje të çmimit të energjisë elektrike është kërkesë nën presion politik të qeverisë, pasi kjo e fundit është zotuar para FMN-së se do të zvogëloi subvencionet për KEK dhe do të rrisë çmimet e energjisë.

Një familje mesatare në Kosovë paguan rreth 1/3 e një page mesatare për faturat e energjisë. Si mund të jetë energjia e lirë, kur rreth 30% e të ardhurave shkojnë për faturat e energjisë?

LDK kërkon nga KEK-u që në vend së të kërkoi rritjen e çmimit të energjisë, të rrisë shtrirjen e saj në veri të Mitrovicës dhe të inkasoi rreth 5% të energjisë në atë pjesë të vendit dhe në enklavat të banuara me serbë nëpër Kosovë.

LDK përkujton KEK-un se shpenzimet e bizneseve janë rritur mesatarisht me 10% për shkak të furnizimin jo stabil me energji. Kjo i ka bërë produktet vendore jo konkurrente në tregjet ndërkombëtare.

LDK kërkon nga KEK-u që të rrisë performancën dhe të ndalojë shkeljet dhe keqpërdorimet masive me tendere. Raporti i Organit Shqyrtues të Prokurimit Publik për vitin 2011 thekson se KEK ka pranuar më së shumti ankesa nga operatorët ekonomik për parregullsi në tendere në 31 raste të ndryshme.  

Kalendari

Ngjarjet e datës 13 Gusht 2020

- Komandanti i Forcës së Sigurisë së Kosovës, Gjenerallejtënant Rrahman Rama raporton para Komisionit për Çështje të Sigurisë dhe Mbrojtjes. (Ndërtesa e Kuvendit, salla N10, ora 9:00)

- Vazhdimi i seancës plenare të Kuvendit të Republikës së Kosovës. (Salla e Kuvendit, ora 10:00)

- Ministrja e Kulturës, Rinisë dhe Sportit, Vlora Dumoshi, viziton Komunën e Deçanit. (Objekti i Komunës se Deçanit, ora 10:00)

- Ministri i Infrastrukturës, Arban Abrashi, do të nënshkruaj memorandum bashkëpunimi për financimin e projekteve infrastrukturore me kryetarin e komunës së Istogut, Haki Rugova. (Komuna e Istogut, ora 10:00)

- Policia e Kosovës organizon ceremoninë e prerjes së shiritit të objektit të Stacionit Policor për Mbikëqyrje të Kufirit në Radavc ku pjesëmarrës do të jenë Drejtori i Përgjithshëm i PK-së, përfaqësues të ICITAP-it Amerikan dhe personalitete të larta vendore, përfshirë epror të PK-së. (Radavc, rruga Vitomiricë - Kullë, ora 11:00)                                              

- Drejtoria e Shëndetësisë e Komunës së Prizrenit do të bëjë hapjen e pjesës së renovuar të QKMF-së, ku do të punojë ndërrimi i tretë ku i pranishëm do të jetë kryetari i Komunës së Prizrenit, Mytaher Haskuka dhe drejtoresha e DSH-së, Narqize Arënliu Hoxhaj. (QKMF në Prizren, ora 12:00)