20 Gusht 2019

Korriku 2019, muaji më nxehtë në histori

Londër, 6 gusht - Pasi qershori i 2019 u njoh nga një numër organizatash zyrtare si qershori më i nxehtë që kur regjistrimi i të dhënave ka filluar, korriku mund të jetë tani muaji më i nxehtë i regjistruar ndonjëherë.

Kjo sipas qendrës Copernicus për studimet e klimës që ka prezantuar të dhënat e saj bashkë me një njoftim se ky korrik mund të ketë qenë ndjeshëm më i nxehtë se ai i 2016, që më herët mbante rekordin e muajit më të nxehtë.

Lajmi vjen ndërsa vera po shoqërohet me temperatura rekord në Evropë. Parisi theu rekordin e 1947 prej 40.4 gradësh celsius, kur temperatura arriti në 42.6 gradë celsius në korrik. Britania arriti temperaturën e dytë më të lartë të regjistruar ndonjëherë, 38.1 gradë celcius në Cambridge. Holanda pa temperaturat të arrinin në 40.4 gradë celsius për të parën herë ndërsa gjermania regjistroi temperaturën më të lartë të saj në të gjithë kohërat, prej 42.6 gradësh celsius në Lingen, në korrik.

Moti i nxehtë ka bërë edhe që të humbet një masë e madhe akujsh në Groenlandë me pjesën më të madhe të SHBA dhe Kanadasë që kanë njohur një valë të jashtëzakonshme të nxehti.

Qendra “Copernicus”, thotë se korriku 2019 ishte 1.2 gradë celsius mbi nivelet para-industriale.

Qendra është pjesë e projektit të bashkimit evropian Copernicus, që është një program i vëzhgimit të tokës. Të dhëna më të thelluara do të jenë të disponueshme në mes të gushtit, kur edhe do të mund të shihen më qartë rezultatet.

Kalendari

Ngjarjet e datës 20 gusht 2019 - Ministri i Tregtisë dhe Industrisë, Endrit Shala do ta takojë ministrin e Ekonomisë së Maqedonisë së Veriut, Kreshnik Bekteshi. (Holli i Ministrisë së Tregtisë dhe Industrisë, ora 9:30)

- Oda Ekonomike Amerikane në Kosovë organizon tryezën për gjendjen e prodhimit në Kosovë ku do të diskutohen rekomandimet ndaj Qeverisë së re rreth zhvillimit të mëtutjeshëm të sektorit të prodhimit, me panelistë përfaqësues të bizneseve prodhuese në vend. (Hotel Sirius, ora 9:55)

- Në Gjilan fillon implementimi i programit “Shkollat e Shekullit 21”, i cili mbështetet nga Qeveria e Britanisë, i dizajnuar nga British Council. (Salla e Kuvendit Komunal, ora 11:00)

- Instituti Demokratik I Kosovës / Transparency International Kosova organizon konferencën për media gjatë të cilës do të shpalosën të gjeturat e hulumtimit pilot mbi transparencën e kryeqyteteve evropiane, ku mes 27 kryeqyteteve evropiane është vlerësuar edhe Prishtina. (Salla e konferencave të KDI, ora 12:00)

- Kryetari i Komunës së Prizrenit Mytaher Haskuka do të pret në takim anëtarin e Parlamentit Britanik, John Grogan ku pas takimit do të ketë edhe një konferencë të përbashkët për media. (Shtëpia e Bardhë, ora 13:00)

- Mbahet ceremonia e hapjes se festivalit të edicionit të 9-të të Festivalit të Arteve dhe Kulturës Tradicionale Etnofest. (Etnokompleksi i fshatit Kukaj, ora 18:00)

- Komuna e Prizrenit në kuadër të hartimit të buxhetit për vitin 2020 do të organizojë dëgjime publike me me banorët e rajonit të Zhurit, Vërrinit dhe Vërmicës me qëllim të angazhimit të tyre në procesin e hartimit të buxhetit, transparencës, gjithëpërfshirjes dhe llogaridhënies ndaj qytetarëve. (Shkolla fillore në Zhur, ora 19:00)

- Aleanca Franceze e Prishtinës, Kino Armata dhe Termokiss organizojnë së bashku edicionin e parë të festivalit "Kino nshehër". (Kino Armata te Sheshi, ora 20:00)