24 Maj 2019

Kompanitë interesohen për trajnim të stafit në Qendrën e Trajnimit të KEK

Prishtinë, 19 prill - Qendra e Trajnimit që funksionon në kuadër të Korporatës Energjetike të Kosovës po vazhdon të jetë në qendër të vëmendjes së shumë punëtorëve që duan të marrin trajnime profesionale dhe të licencuara ndërkombëtarisht.

Drejtori dhe njëkohësisht ekzamineri i kësaj qendre, Safet Imeri thotë se në këtë qendër organizohen edhe trajnime për profesionet e veçanta si: teknologjia elektrike, mekanike, salduese dhe operim i makinave të rënda.

Imeri po ashtu ka treguar se gjatë vizitave bërë kompanive të ndryshme prodhuese në Kosovë, ku kanë vërejtur se mungojnë kuadro profesionale të saldimit për të cilat edhe kanë ofruar një bashkëpunim që këto kuadro kryesisht vetëm me shkollë të mesme, të kualifikohen dhe të jenë të gatshëm për punë.

“Kryesisht janë trajnime praktike. Rreth 80% e punës është praktikë dhe 20% teori dhe kur kandidatët e kryejnë këtë trajnim, janë të gatshëm të punojnë. Për trajnimet që kryhen tek ne, në fund u lëshojmë certifikata, mirëpo kemi edhe kualifikime të cilat janë të njohura nga Autoriteti Kombëtar i Kualifikimeve, të cilat përveç që i vulosim ne, nëse kandidatët i plotësojnë kriteret i vulosin edhe ata dhe pastaj certifikatat njihen në krejt Kosovën, ndërsa për fushën e saldimit dhe fushën e operimit të makinave të rënda kemi edhe certifikata të njohura ndërkombëtarisht."

"Në fushën e saldimit kemi dy trajnerë, të cilët i kemi përgatitë për përgatitje të kandidatëve, ndërsa testin vijnë e bëjnë nga institucioni për certifikim gjerman 'Defaes' dhe këto certifikata është njëjtë si me i marrë tek ne si me i marrë në Gjermani. Ndërsa për operim të makinave të rënda, po ashtu kemi tre trajnerë, të cilët janë të certifikuar për pjesën teorike dhe ekzaminer, dhe kemi tre trajnerë për pjesën praktike fushore, ku testet na vijnë përmes postës. Ne e bëjmë trajnimin dhe ekzaminimin, ndërsa vendimin e merr kompania amerikane 'Hevicert' ku në rast se kandidati i arrin kriteret e kalueshmërisë, i lëshohet certifikata për pesë vjet”, deklaroi Imeri.

Duke marrë parasysh faktin se viteve të fundit shumë punëtorë kanë janë lënduar dhe disa edhe kanë pësuar vdekje në vendet e tyre të punës, Qendra e Trajnimit në Obiliq e certifikuar me ISO standardin 9001-2015 për menaxhim dhe kualitet, po u mundëson kandidatëve që të bëjnë kualifikimet më të sofistikuara në mënyrë që gjatë punës së tyre të ardhshme të ndihen të sigurt.

“Gjatë vizitave në kompani të ndryshme, kemi vërejtur se edhe nëse punëtorët dinë të bëjnë një punë, iu mungon shumë pjesa e sigurisë. E nëse punëtorët certifikohen, kompania do të arrijë performancën në punë dhe do të zvogëlohen aksidentet në vendin e punës, gjë që edhe është qëllim i kompanive, pra të zvogëlohen këto aksidente në vend të punës."

"Kandidatët që e kanë kryer trajnimin, ne i vizitojmë në kompanitë ku punësohen dhe shohim nëse ata arrijnë të jenë të përgatitur që të punojnë të pavarur, andaj ne i ftojmë të gjitha kompanitë që të bëjnë trajnimin dhe investimin e stafit pasi kjo sjellë përfitime të shumëfishta edhe për formim më të mirë por edhe për zvogëlim të aksidenteve dhe përmirësimin e sigurisë në vendin e punës”, shtoi drejtori i kësaj qendre, Safet Imeri.

Kandidatët që po ndjekin trajnimet në këtë qendër kanë thënë se me anë të këtyre trajnimeve kanë arritur të marrin shumë informacione dhe të profesionalizohen në kryerjen e punës që e kanë zgjedhur.

“Për këtë trajnim jam njoftuar nga disa njerëz që kanë qenë më herët këtu, por e kam parë edhe në faqen zyrtare të KEK-ut. Unë ndihem mirë dhe mendoj se ky trajnim do të më ndihmoj edhe në të ardhmen pasi unë i dua makinat e mëdha dhe kam pas rastin të punoj pak, por me këtë njohuri që po e marrim këtu, e shohim se nuk i kemi ditë shumë gjëra rreth sigurisë në punë. Ne sot kemi filluar me fazën e stimulatorëve ku po i mësojmë se si funksionojnë komandat dhe mendoj që pas këtyre trajnimeve teorike e praktike do të jemi të gatshëm për punë qoftë në sektorin privat apo atë publik”, tha kandidati Xhevdet Idrizi.

Nga ky trajnim shpreson se do të gjejë punë edhe kandidati tjetër Smajl Bllaca, i cili po trajnohet për drejtim të eskavatorit.

“Qëllimi i këtij trajnimi shpresoj të jetë punësimi. Ne deri tani kemi pasur mësim teorik, pastaj praktik, kushtet i kemi shumë të mira dhe ky trajnim është një mundësi shumë e mirë për ne që aftësohemi për punë”, tha kandidati Bllaca.

Qendra e Trajnimit ka nisur punën në maj të vitit 2005.

Ndërtimi i Qendrës së Trajnimit dhe po ashtu pajisja e zyrave, laboratorëve dhe punëtorive është financuar nga KEK-u dhe Agjencioni Evropian për Rindërtim.

 

Kalendari

Ngjarjet e datës 24 maj 2019

- Nisin punimet për rregullimin e rrugës kryesoret të qytetit të Deçanit Rrugës së  Qendrës konkretisht rrugës 'Luan Haradinaj' dhe 'Dëshmoret e Kombit'. (Në afërsi të pikës së karburantit Agonisi Gas në Carrabreg, ora 10:00)

- Mbahet mbledhja e komisionit për Mbikëqyrjen e Financave Publike në të cilën do të behët shqyrtimi i Raportit të Auditimit për raportet financiare dhe atyre të deklarimit financiar të subjekteve politike për vitin 2017. (Ndërtesa e Kuvendit, salla N 302, ora 10:00)

- Kryeministri Ramush Haradinaj merr pjesë në ceremoninë e fillimit të punimeve të rrugës së qytetit të Deçanit. (Sheshi i qytetit në Deçan, ora 10:00)

- Drejtori i Zyrës për Rritje Ekonomike i USAID-it në Kosovë, Brian Martalus, do të mbajë një fjalim në hapjen e Konferencës Ekonomike të Diasporës Shqiptare nga Evropa - B2B. (Hotel Emerald, ora 10:00)

- “Let’s Do It” mban aksion pastrimi në disa fshatra të Hasit, me moton “Për një Has të pastër”. (Fshati Gjonaj tek Ura e Drinit të Bardhë, ora 10:00)

- Drejtoresha e misionit të USAID-it Lisa Magno do të flasë me rastin e prezantimit të gjashtë video udhëzuesve për e-prokurim. (Hoteli Swiss Diamond, ora 10:00)

- Mbledhja e komisionit Ad-hoc për përmirësimin dhe forcimin e procesit zgjedhor në të cilën do të behët shqyrtimi i kërkesës së Grupit për Studime Juridike dhe Politike për pjesëmarrje në Grupin Këshillëdhënës. (Ndërtesa e Kuvendit, salla N 303, ora 10:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Kompleksin Memorial “Dëshmorët e Kombit” në Gllogjan. (Kompleksi Memorial “Dëshmorët e Kombit” në Gllogjan, ora 11:00)

- Programi i Kombeve të Bashkuara për Zhvillim, Ministria e Punëve të Brendshme dhe Policia e Kosovës do të shënojnë së bashku Ditën Ndërkombëtare të Grave për Paqe dhe Çarmatim me një konferencë shtypi. (Ambientet e UNDP-së, ora 11:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Fshatin Kodrali. (Fshati Kodrali, ora 11:30)

- Presidenti i Republikës së Kosovës, Hashim Thaçi, merr pjesë në Akademinë Përkujtimore për heroin Abdullah Tahiri. (Teatri Kombëtar i Kosovës, ora 12:00)

- Prokuroria Themelore e Pejës organizon konferencën për media ku temë diskutimi do jetë ngritja e dhjetëra aktakuzave për rastin e njohur në opinionin publik si “veteranët e rrejshëm”. (Objekti i Prokurorisë Themelore të Pejës, rruga “Hasan Cermaxhija”. ora 12:00)

- 44 nxënës nga klasa 7 deri në klasën 9, nga të gjitha regjionet e Kosovës do të takohen për të garuar në finalen e garës së tretë vjetore të gërmëzimit.  (Biblioteka kombëtare, ora 13:15)

- Ministria e Kulturës, Rinisë dhe Sportit organizon ceremoninë e ndarjes  së çmimeve “Nikete Dardani”. (Kabineti i Ministrit të Kulturës, ora 13:30)

 - Shënohet 19 vjetori i themelimit të Aleancës për Ardhmërinë e Kosovës në Gjakovë. (Pallati i Kulturës” Asim Vokshi” , Gjakovë, ora 18:00)

- Organizuar nga Ministria e Diaspores dhe Investimeve Strategjike dhe Rrjeti i Bizneseve të Diasporës Shqiptare mbahet konferenca ekonomike e diasporës shqiptare nga Evropa më B2B. (Hotel Emerald, ora 20:00)

- Kryeministri Ramush Haradinaj merr pjesë në Konferencën Ekonomike të Diasporës Shqiptare nga Evropa, organizuar nga Ministria e Diasporës dhe Investimeve Strategjike dhe Rrjeti i Bizneseve të Diasporës Shqiptare. (Hotel Emerald, ora 20:00)