17 Tetor 2018

IFC dhe ZRRE diskutojnë zhvillimet e Burimeve të Ripërtritshme

Prishtinë, 13 qershor - Bordi dhe menaxhmenti i Zyrës së Rregullatorit për Energji (ZRRE) janë takuar dje, me 12 qershor 2018, me një delegacion të lartë të IFC (International Finance Corporation), anëtare e Grupit të Bankës Botërore, për të diskutuar rreth zhvillimeve të deritanishme në sektorin e energjisë dhe në veçanti me ato të Burimeve të Ripërtritshme në vend. 

Përfaqësuesit e IFC kanë shprehur gatishmërinë e tyre për të ndihmuar në këtë fushë si dhe janë interesuar për proceset e aplikuara nga ZRRE gjatë procedurave të shqyrtimit dhe lëshimit të autorizimeve për ndërtimin e kapaciteteve të reja të energjisë nga Burimet e Ripërtritshme të Energjisë (BRE).

Përfaqësuesit e ZRRE kanë njoftuar në lidhje me proceset e zhvilluara deri me tani, e që kanë përfshirë nxjerrjen e legjislacionit sekondar për zhvillimin e procedurave të Autorizimit për ndërtimin e kapaciteteve të reja gjeneruese nga BRE-të si dhe ato për përkrahjen e investimeve për arritjen e caqeve të përcaktuara për zhvillimin e BRE-ve në vend.

Menaxhmenti i ZRRE ka njoftuar IFC-në se, bazuar në obligimet ligjore që dalin nga Ligjet e Energjisë, ZRRE është angazhuar që të përmbush rolin e saj përmes nxjerrjes së Legjislacionit Sekondar që rregullon këtë fushë, skemës mbështetëse të Tarifave Nxitëse si dhe duke përcaktimit të afateve të kontratave të shitblerjes së energjisë që do të prodhohet nga këto burime.
 
Është potencuar se ZRRE mbetet e përkushtuar në mbështetjen e investimeve në fushën e BRE-ve, duke krijuar procedura pa barriera burokratike dhe kushte të përshtatshme rregullative me qëllim të vetëm që të përmirësohet furnizimi me energji dhe të arrihen caqet e vendosura nga Bashkimi Evropian për prodhimin e energjisë nga BRE-të.

Përfaqësuesit e ZRRE kanë njoftuar të pranishmit se, si rezultat i këtij përkushtimi, deri më tani, janë 64 projekte që u janë nënshtruar procedurave të autorizimit, nga të cilat 24 janë në proces të ndërtimit dhe 11 janë duke operuar.   

Kalendari

Ngjarjet e datës 17 tetor 2018

- Mbahet mbledhja e Komisionit për Administratë Publike, Qeverisje Lokale dhe Media në të cilën do të shqyrtohet Projektligji për ndryshimin dhe plotësimin e Ligjit për festat zyrtare në Republikën e Kosovës. (Ndërtesa e Kuvendit, salla N204, ora 10:00)

- Mbahet ceremonia e nënshkrimit të Memorandumit të Bashkëpunimit në mes të Universitetit të Prishtinës “Hasan Prishtina” dhe Ministrisë se Inovacionit dhe Ndërmarrësisë, për financimin e projektit “Qendra e Inovacionit dhe Ndërmarrësisë në UP". (Rektorati i UP-së, ora 10:00)

- Mbahet tryeza e kampanjës informuese “Kodi Civil ndikon në statusin ligjor të qytetarëve”, organizuar nga  projekti i financuar nga Bashkimi Evropian “Mbështetje Kodit Civil – faza 2”. (Hotel Happy në Gjakovë, ora 10:00)

- Kryeministri Ramush Haradinaj pret në takim Ansamblin Kombëtar të Këngëve dhe Valleve “Shota”, të cilin do ta nderojë me medaljen e Gjergj Kastritot - Skenderbeu. (Ndërtesa e Qeverisë, ora 10:00)

- Pesë profesorë  nga Budapesti do të vizitojnë  Universitetin “Ukshin Hoti” në Prizren, ku edhe promovohet libri “Distribution atlas of vascular plants in Albania” botuar nga botanisti prof. dr. Zoltán Barina dhe mbahet një ligjëratë nga prof. dr. Antal Molnár. (Amfiteatrin e Fakultetit të Shkencave të Jetës dhe Mjedisit, ora 10:00)

- Ministri i Mjedisit dhe Planifikimit Hapësinor, Fatmir Matoshi  do të nënshkruajë Udhëzimin Administrativ për Ndëshkime me Gjoba Mandatore. (Kabineti i Ministrit Matoshi, kati 17, ish objekti “Rilindja”, ora 11:00)

- Mbahet mbledhja e Komisionit për Buxhet dhe Financa në të cilën do të shqyrtohet plotësimi dhe ndryshimi i Ligjit për Automjete, për Efiçiencë të energjisë, etj. (Ndërtesa e Kuvendit, salla N 303, ora 11:00)

- Ministria e Kulturës, Rinisë dhe Sportit, përuron objektin e Qendrës Rinore në Vushtrri. (Vushtrri, ora 11:00)

- Drejtori i Mbrojtjes dhe Shpetimit, Sami Spahiu nga Komuna e Gjilanit mban konferencë për media. (Zyra e krytarit të komunës, ora 11:00)

- Let’s Do It Kosova do të organizoj aksionin e pastrimit në Lipjan. (Oborri i Komunës së Lipjanit, ora 12:00)

- Komisioni për Punë të Jashtme, Diasporë dhe Investime Strategjike do të mbajë mbledhjen e radhës në të cilën do të shqyrtoj vlerësimet e sindikatës së MPJ-së lidhur me shkeljet në shërbimin e jashtëm. (Ndërtesa e Kuvendit, salla N-303, ora 13:00)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të shqyrtohet Projektligji për statusin e punëtorëve të arsimit shqip të Republikës së Kosovës nga viti shkollor 1990/91 deri në vitin shkollor 1998/99. (Ndërtesa e Kuvendit, salla N 225, ora 13:00)

- Lëvizja Vetëvendosje! mban konferencë për media. (Zyrat e Vetëvendosjes, ora 15:00)

-  Kryetari i Nismës Socialdemokrate, Fatmir Limaj, merr pjesë në takim me struktura drejtuese të Nismës në Vushtrri dhe Mitrovicë. (Restaurant Holiday në Vushtrri, ora 17:00)

- Kryeministri i Republikës së Kosovës, Ramush Haradinaj, merr pjesë në hapjen e “Java e bizneseve nga diaspora”, e cila organizohet nga Ministria e Diasporës dhe Investimeve Strategjike, në bashkëpunim me Odën Ekonomike Gjermano-Kosovare. (Hotel Emerald, ora 19:00)