Hapet edicioni i katërt i Festivalit të Gjelbër
Festivali i Gjelbër ka për qëllim kryesor rritjen e tregjeve dhe promovimin e bizneseve në fushën e energjisë solare, atë efiçiente dhe të riciklimit. Festivali do të ofrojë platformë rrjetëzimi për bizneset e gjelbra, agjencitë qeveritare, dhe të gjithë akterët relevantë të energjisë së gjelbër.
Në këtë ngjarje dy ditore, rreth 45 kompani vendore do t’i ekspozojnë produktet dhe shërbimet e tyre në Pavijonin e Gjelbër .
Këtë vit risi do të jetë prezantimi i kompanive ndërtuese me projekte dhe ide inovative të lagjeve moderne që promovojnë jetesën efiçiente 'Green'.
Edicioni i katërt i Festivalit të Gjelbër do të fokusohet në teknologjinë e gjelbër dhe inovative, energjinë e ripërtërishme, urbanizimin e qëndrueshëm, ndërtimin dhe dizajnin dhe mbrojtjen e ambientit.
Pjesë e festivalit do të jenë edhe Forumet e Gjelbra, ku ekspertë ndërkombëtarë dhe vendorë do të prezantojnë trendet e fundit dhe të ardhshme të industrisë në riciklim, energji të ripërtërishme dhe e´¬çiencë të energjisë, duke theksuar rëndësinë e energjisë së gjelbër.
Përveç kësaj, një sërë aktivitetesh paralele që do të tërheqin njerëz të të gjitha moshave do të mbahen me temën e energjisë së gjelbër.
Për tri edicione me radhë ky Festival është organizuar nga USAID Empower Private Sector, ku edicioni i tretë është organizuar në bashkëpunim me Klubin e Prodhuesve të Kosovës.
Ndërsa nga edicioni i sivjetmë, ky projekt implementohet nga Klubi i Prodhuesve të Kosovës.
Koncepti i Festivalit të Gjelbër është në përputhshmëri me punën e Klubit të Prodhuesve të Kosovës, ku objektivat kryesore të Klubit janë promovimi i produkteve “Made in Kosova” si dhe në përputhje me strategjinë bazë të Klubit e cila përfshinë punësimin, diplomacinë ekonomike, energjinë dhe ambientin.
