13 Nëntor 2019

Energjia dhe minierat bazament i zhvillimit të shtetit

Prishtinë, 20 tetor - Për të pasur një pasqyrë më të gjithanshme lidhur me  Strategjinë minerare të Republikës së Kosovës për vitin 2010-2025,  Komisioni për Ekonomi, Tregti, Industri, Energjetikë, Transport dhe Telekomunikacion i Kuvendit të Kosovës, mbajti sot dëgjim publik.

Kryetarja e Komisionit, Myzejene Selmani, duke paraqitur qëllimin e këtij dëgjimi publik, u  tha të pranishmëve se ky dëgjim publik ka për qëllim që Komisioni të marrë opinionin për Strategjinë duke konsideruar se energjia dhe minierat janë bazament i zhvillimit të shtetit.

Prandaj, vazhdoi ajo, Strategjia e ofruar nga Ministria e Energjisë dhe Minierave (MEM), duhet analizuar hollësisht dhe kërkoi nga të pranishmit që në cilësinë e ekspertëve të japin shpjegime lidhur me interesimin e anëtarëve të Komisionit para se Strategjia të procedohet për miratim në Kuvendin e Kosovës.

Përfaqësuesi i MEM-it, Besim Veselaj, i njoftoi anëtarët e Komisionit se për hartimin e Strategjisë është duke u punuar me vite. Në vijim ai  bëri të ditur se ky dokument deri në formulimin final të tij ka kaluar në disa faza studimi nga ekspertë vendor dhe ndërkombëtarë.

Më tej, Veselaj shpalosi Strategjinë duke thënë se ajo përmban dy kapituj në të cilët janë të kategorizuara gjërat e nevojshme për zhvillimin e këtij sektori me rëndësi të veçantë. Në kapitullin e parë vazhdoi ai, pasqyrohet gjendja dhe potenciali i sektorit minerar dhe në kapitullin e dytë të Strategjisë paraqitet në mënyrë studioze misioni dhe vizioni i Strategjisë minerare.

Përfaqësuesi i Fakultetit të Gjeoshkencave, Shyqri Kelmendi, Strategjinë e vlerësoi si akt fundamental i cili pas Ligjit për Miniera dhe Minerale ofron politikat e sjelljes të të gjithë akterëve me ndikim të kësaj fushe.  Ai më tej shtoi se sipas kësaj Strategjie Kosova mund të shëndrrohet në shtet shumë të rëndësishëm për eksportimin e metaleve të ngjyrosura.

Ndërkaq, Ferat Shala, drejtor i kombinatit “Trepça”, pasi prezantoi një histori të shkurtër të këtij kombinati, foli edhe për gjendjen aktuale të tij dhe vlerësoi se Strategjia e propozuar hap perspektivë për Kombinatin.

Ai me këtë rast përmendi rregulloren e UNMIK-ut 2005/40, e cila kombinatin “Trepça” e ka vënë në monitorium i cili, pengon zhvillimin e tij, andaj, strategjia shfuqizon këtë rregullore, theksoi Shala. Me këtë rast, Shala ftoi anëtarët e Komisionit për vizitë në kombinat nga ku do të mundë të njoftoheshin më për së afërmi mbi gjendjen në të.

Anëtarët e Komisionit, duke bërë vlerësimin e Strategjisë minerare thanë se ajo plotëson kushtet dhe i është përshtatur rrethanave në Kosovë, por në të njëjtën duhet që rolit të shtetit ti lihet hapësirë më e madhe në përpilimin e politikave në këtë sektor.
 

Kalendari

Ngjarjet e datës 13 nëntor 2019

- Save the Children në bashkëpunim me Minstrinë e Arsimit dhe Institutin Pedagogjik organizojnë konferencën ndërkombëtare ‘Fuqizimi i Kujdesit, Zhvillimit dhe Edukimit në Fëmijërinë e Hershme’ që ka për qëllim të ofrojë mundësi për hartuesit e politikave, ofruesit e shërbimeve, përfaqësuesit nga akademia dhe akterë të tjerë, për t’u informuar dhe ndarë praktikat më të mira mbi rëndësinë e investimeve në kujdesin dhe zhvillimin e fëmijërisë së hershme. (Hotel Sirius, ora 9:30)

- Instituti Demokratik i Kosovës organizon tryezën e diskutimit lidhur me dy projekte të mëdha të Ministrisë së Infrastrukturës siç janë, rehabilitimi i rrugës Prishtinë - Pejë dhe Prishtinë - Mitrovicë ku edhe do të bëhet edhe publikimi i hulumtimit mbi arsyet e vonesave në punime në këto dy rrugë, i titulluar “Rrugë pa fund”. (Hotel Sirius, ora 10:00)

- Organizata "Voice of Roma, Ashkali and Egyptians" VoRAE organizon Festivalin Multikulturorë i pari i këtij lloji në Kosovë. (Hotel Emerald, ora 10:00)

- Grupi për Studime Juridike dhe Politike organizon tryezën e diskutimit me temë “Roli i vendimeve të Gjykatës Supreme në luftën kundër krimit dhe korrupsionit: Një thirrje për disiplinim të gjyqtarëve që marrin vendime të kundërligjshme”. (Qendra e konferencave Orion, ora 10:30)

- Në kuadër të fushatës “Jo drogë tek të rinjtë”, Task Forca Anti Drogë tek të rinjtë dhe siguri në Shkolla do të organizoj pritje për student, ku do të shfaqin prezantimet me njohurit e tyre lidhur me narkotikët, si dhe do të bashkëbisedojnë me Shefin e Task Forcës Anti Drogë. (Ndërtesa e Qeverisë, salla P38, ora 11:00) 

- Drejtori i Drejtorisë së Shëndetësisë në Komunën e Prizrenti, Visar Shehu, do të mbajë konferencë për shtyp për ta njoftuar opinionin publik me më të rejat nga fusha e shëndetësisë. (Zyret e Shërbimit Urgjent, rruga Tirana në Prizren, ora 11:00)

- Ambasada e Francës në Kosovë mban konferencë për media në të cilën do të prezantojë edicionin e 19 - të Festivalit të Filmit Frankofon në Kosovë i cili organizohet në bashkëpunim me përfaqësitë diplomatike të Zvicrës, Belgjikës dhe Luksemburgut, Aleancën Franceze, Ministrinë e Punëve të Jashtme, si dhe Ministrinë e Kulturës, Rinisë dhe Sportit të Kosovës. (Salla e konferencave në Ministrinë e Punëve të Jashtme, ora 12:00)

- Teatri i Qytetit te Mitrovicës "Muharrem Qena" shfaq premierën teatrore “Kur treni vonohet”, me autor Osman Goranci dhe me regji të Artan Tmavës. (Qendra e Kulturës “Rexhep Mitrovica”, ora 19:00)