13 Nëntor 2019

Publikohet Indeksi i Çmimeve të Prodhimit për tremujorin e parë

Prishtinë, 7 qershor - Agjencia e Statistikave të Kosovës (ASK) ka publikuar Indeksin e Çmimeve të Prodhimit për tremujorin e parë (TM1) të vitit 2019.

Indeksi i tërësishëm i çmimeve të prodhimit në Kosovë pësoj rënie për (-0.4%) në TM1 2019, krahasuar me TM4 2018. Rënie më të mëdha sipas degëve të veprimtarive ekonomike vërehen te: nxjerrja e xehes së metalit (-8.8%); energjia elektrike, gazi, avulli dhe furnizimi me ajër të kondicionuar (-2.7%); prodhimi i lëkurës dhe prodhimeve prej saj (-1.6%); grumbullimi, trajtimi dhe furnizimi me ujë (-1.5%); prodhimi i pajisjeve elektrike (-1.4%); prodhimi i letrës dhe prodhimeve prej saj (-0.6%); dhe prodhimi i makinerisë dhe pajisjeve p.k.t (-0.1%).    

Rënia u neutralizua me ngritjen e çmimeve te: përpunimi i prodhimeve ushqimore (2.6%); prodhimi i produkteve të fabrikuara metalike, përveç makinerisë dhe pajisjeve (2.5%); prodhimi i mobilieve (1.8%); xeheroret dhe guroret e tjera (1.4%); prodhimi i drurit dhe i produkteve të drurit dhe të tapës, përveç mobilieve: prodhimi i artikujve nga kashta dhe materialeve të gërshetuara – thurëse (0.3%); prodhimi i produkteve kimike (0.2%); prodhimi produkteve të gomës dhe të plastikës (0.1%); dhe prodhimi i pijeve (0.1%).

Ndërkaq, krahasuar TM1 2019 me TM1 2018, çmimet e prodhimit në Kosovë u ngritën në një mesatare prej 1.8%. Ngritje më të mëdha sipas degëve të veprimtarive  ekonomike vërehen te: prodhimi i produkteve minerale jometalike (6.0%); përpunimi i produkteve ushqimore (5.7%); prodhimi i makinerisë dhe pajisjeve p.k.t (4.6%); prodhimi i mobilieve (4.2%); energjia elektrike, gazi, avulli dhe furnizimi me ajër të kondicionuar (2.4%); prodhimi i pijeve (2.4%); prodhimi i produkteve të gomës dhe të plastikës (1.3%); prodhimi i metaleve (1.2%); prodhimi i letrës dhe produkteve prej saj (0.6%); dhe xeheroret dhe guroret e tjera (0.6%).

Ngritja u neutralizua me rënien  e çmimeve te: nxjerrja e xehes së metalit (-16.0%); prodhimi i pajisjeve elektrike (-8.4%); prodhimi i produkteve kimike (-2.6%); prodhimi i drurit dhe i produkteve të drurit dhe të tapës, përveç mobilieve: prodhimi i artikujve nga kashta dhe materialeve të gërshetuara – thurëse (-1.8%); grumbullimi, trajtimi dhe furnizimi me ujë (-1.5%); prodhimi i lëkurës dhe produkteve prej lëkurës (-1.4%); dhe prodhimi i mjeteve motorike (të transportit), rimorkiove dhe gjysmërimorkiove (-0.5%).

 Për më shumë informata, lidhur me Indeksin e Çmimeve të Prodhimit, vizitoni: http://ask.rks-gov.net/sq/agjencia-e-statistikave-te-kosoves/ekonomi/cmimet
 

Kalendari

Ngjarjet e datës 13 nëntor 2019

- Save the Children në bashkëpunim me Minstrinë e Arsimit dhe Institutin Pedagogjik organizojnë konferencën ndërkombëtare ‘Fuqizimi i Kujdesit, Zhvillimit dhe Edukimit në Fëmijërinë e Hershme’ që ka për qëllim të ofrojë mundësi për hartuesit e politikave, ofruesit e shërbimeve, përfaqësuesit nga akademia dhe akterë të tjerë, për t’u informuar dhe ndarë praktikat më të mira mbi rëndësinë e investimeve në kujdesin dhe zhvillimin e fëmijërisë së hershme. (Hotel Sirius, ora 9:30)

- Instituti Demokratik i Kosovës organizon tryezën e diskutimit lidhur me dy projekte të mëdha të Ministrisë së Infrastrukturës siç janë, rehabilitimi i rrugës Prishtinë - Pejë dhe Prishtinë - Mitrovicë ku edhe do të bëhet edhe publikimi i hulumtimit mbi arsyet e vonesave në punime në këto dy rrugë, i titulluar “Rrugë pa fund”. (Hotel Sirius, ora 10:00)

- Organizata "Voice of Roma, Ashkali and Egyptians" VoRAE organizon Festivalin Multikulturorë i pari i këtij lloji në Kosovë. (Hotel Emerald, ora 10:00)

- Grupi për Studime Juridike dhe Politike organizon tryezën e diskutimit me temë “Roli i vendimeve të Gjykatës Supreme në luftën kundër krimit dhe korrupsionit: Një thirrje për disiplinim të gjyqtarëve që marrin vendime të kundërligjshme”. (Qendra e konferencave Orion, ora 10:30)

- Në kuadër të fushatës “Jo drogë tek të rinjtë”, Task Forca Anti Drogë tek të rinjtë dhe siguri në Shkolla do të organizoj pritje për student, ku do të shfaqin prezantimet me njohurit e tyre lidhur me narkotikët, si dhe do të bashkëbisedojnë me Shefin e Task Forcës Anti Drogë. (Ndërtesa e Qeverisë, salla P38, ora 11:00) 

- Drejtori i Drejtorisë së Shëndetësisë në Komunën e Prizrenti, Visar Shehu, do të mbajë konferencë për shtyp për ta njoftuar opinionin publik me më të rejat nga fusha e shëndetësisë. (Zyret e Shërbimit Urgjent, rruga Tirana në Prizren, ora 11:00)

- Ambasada e Francës në Kosovë mban konferencë për media në të cilën do të prezantojë edicionin e 19 - të Festivalit të Filmit Frankofon në Kosovë i cili organizohet në bashkëpunim me përfaqësitë diplomatike të Zvicrës, Belgjikës dhe Luksemburgut, Aleancën Franceze, Ministrinë e Punëve të Jashtme, si dhe Ministrinë e Kulturës, Rinisë dhe Sportit të Kosovës. (Salla e konferencave në Ministrinë e Punëve të Jashtme, ora 12:00)

- Teatri i Qytetit te Mitrovicës "Muharrem Qena" shfaq premierën teatrore “Kur treni vonohet”, me autor Osman Goranci dhe me regji të Artan Tmavës. (Qendra e Kulturës “Rexhep Mitrovica”, ora 19:00)