13 Nëntor 2019

PSD kërkon të rritet numri i punëtorëve dhe të ruhet jeta e punëtorit

Prishtinë, 7 qershor - Inspektoriati i Punës është një nga mekanizmat kryesorë për garantimin e të drejtave të punëtorëve. Në Kosovë mbetet një nga hallkat me të dobëta të zhvillimit institucional dhe ligjor pasojat e të cilës po i vuajnë punëtorët. Duke qenë kështu, përveç që duhet të rritet numri i inspektorëve, duhet të bëhen edhe trajnime për inspektorët aktualë ne zbatimin e dispozitave ligjore lidhur me shëndetin dhe parandalimin e rrezikut në vendin e punës. Shtimi i numrit të inspektorëve së bashku me reformën dhe ngritjen e resurseve profesionale, është domosdoshmëri e kohës.

Kjo nevojë u shtrua në konferencën e mbajtur për media sot nga Partia Socialdemokrate, ku folën deputetja dhe anëtarja e Kryesisë Besa Baftiu, dhe anëtari i Kryesisë, Adonis Tahiri, njëherit edhe Drejtor i Inspeksconit në Komunën e Prishtinës.

Në fjalën e saj, deputetja Baftiu përmendi të gjeturat shqetësuese në raportin e fundit të Komisionit Evropian për Kosovën, ku veçoi rritjen e numrit të aksidenteve me fatalitet në vendin e punës nga 14 në vitin 2017 në 21 përgjatë vitit 2018. Ajo foli edhe mbi të gjeturat në raportin e punës 12 mujore të Inspektoriatit të Punës për vitin 2018.

“Aty figuron se brenda gjithë kësaj periudhe, domethënë, për një vit janë bërë vetëm 9056 inspektime, nga të cilat janë shqiptuar vetëm 270 gjoba në total. Kjo, derisa momentalisht në Kosovë numërojmë 165.268 biznese aktive, nga të cilat 9963 biznese janë krijuar vetëm brenda 2018-së. Nëse gjitha inspektimet e bëra gjatë vitit 2018 janë bërë në biznese të ndryshme, i bie që mbi 94% të bizneseve nuk janë inspektuar asnjëherë. E kur dihet që një numër i tyre janë inspektime të përsëritura, del që përqindja e bizneseve të painspektuara është edhe më e madhe. Për ta konkretizuar edhe më tej këtë gjendje të rëndë, theksojmë që në vitin 2018 më i madh është numri i bizneseve të krijuara sesa i inspektimeve të bëra – pra janë 9963 biznese të reja në vitin 2018 dhe vetëm 9056 inspektime brenda këtij viti nga Inspektoriati i Punës”, theksoi deputetja Besa Baftiu, duke nënvizuar se gjatë kësaj periudhe 22 punëtorë kanë humbur jetën e 125 të tjerë janë lënduar në vendin e punës.

Më tej, u theksua edhe përqindja e lartë e fëmijëve në marrëdhënie të punës, derisa inspektorët nuk e kanë raportuar asnjë rast të tillë përgjatë vitit 2018, duke u potencuar se informaliteti në punë është sfidë e madhe e Inspektoriatit të Punës, por në një rast të këtillë, kur viktimë e tij janë të miturit, tejkalimi i kësaj situate bëhet shumë më urgjent.

Tutje, Adonis Tahiri foli sesi Inspektoriati i Punës është organi me përgjegjësinë kryesore për ruajtjen e shëndetit të punëtorëve dhe luftimin e padrejtësive që iu bëhen atyre.

“Partia Socialdemokrate përmes deputetëve do të angazhohet në kuvend në dizajnimin e infrastrukturës ligjore për funksionimin dhe kompetencat e inspektoriatit të punës. Mirëpo, infrastruktura ligjore nuk ka asnjë vlerë përderisa mekanizmi themelor për zbatimin e tij nuk e kryen punën e vet, prandaj dhe duhet të rritet numri i inspektorëve, duhet të bëhen edhe trajnime për inspektorët aktualë ne zbatimin e dispozitave ligjore lidhur me shëndetin dhe parandalimin e rrezikut në vendin e punës”, tha ndër të tjera në fjalën e tij, Tahiri.

Kalendari

Ngjarjet e datës 13 nëntor 2019

- Save the Children në bashkëpunim me Minstrinë e Arsimit dhe Institutin Pedagogjik organizojnë konferencën ndërkombëtare ‘Fuqizimi i Kujdesit, Zhvillimit dhe Edukimit në Fëmijërinë e Hershme’ që ka për qëllim të ofrojë mundësi për hartuesit e politikave, ofruesit e shërbimeve, përfaqësuesit nga akademia dhe akterë të tjerë, për t’u informuar dhe ndarë praktikat më të mira mbi rëndësinë e investimeve në kujdesin dhe zhvillimin e fëmijërisë së hershme. (Hotel Sirius, ora 9:30)

- Instituti Demokratik i Kosovës organizon tryezën e diskutimit lidhur me dy projekte të mëdha të Ministrisë së Infrastrukturës siç janë, rehabilitimi i rrugës Prishtinë - Pejë dhe Prishtinë - Mitrovicë ku edhe do të bëhet edhe publikimi i hulumtimit mbi arsyet e vonesave në punime në këto dy rrugë, i titulluar “Rrugë pa fund”. (Hotel Sirius, ora 10:00)

- Organizata "Voice of Roma, Ashkali and Egyptians" VoRAE organizon Festivalin Multikulturorë i pari i këtij lloji në Kosovë. (Hotel Emerald, ora 10:00)

- Grupi për Studime Juridike dhe Politike organizon tryezën e diskutimit me temë “Roli i vendimeve të Gjykatës Supreme në luftën kundër krimit dhe korrupsionit: Një thirrje për disiplinim të gjyqtarëve që marrin vendime të kundërligjshme”. (Qendra e konferencave Orion, ora 10:30)

- Në kuadër të fushatës “Jo drogë tek të rinjtë”, Task Forca Anti Drogë tek të rinjtë dhe siguri në Shkolla do të organizoj pritje për student, ku do të shfaqin prezantimet me njohurit e tyre lidhur me narkotikët, si dhe do të bashkëbisedojnë me Shefin e Task Forcës Anti Drogë. (Ndërtesa e Qeverisë, salla P38, ora 11:00) 

- Drejtori i Drejtorisë së Shëndetësisë në Komunën e Prizrenti, Visar Shehu, do të mbajë konferencë për shtyp për ta njoftuar opinionin publik me më të rejat nga fusha e shëndetësisë. (Zyret e Shërbimit Urgjent, rruga Tirana në Prizren, ora 11:00)

- Ambasada e Francës në Kosovë mban konferencë për media në të cilën do të prezantojë edicionin e 19 - të Festivalit të Filmit Frankofon në Kosovë i cili organizohet në bashkëpunim me përfaqësitë diplomatike të Zvicrës, Belgjikës dhe Luksemburgut, Aleancën Franceze, Ministrinë e Punëve të Jashtme, si dhe Ministrinë e Kulturës, Rinisë dhe Sportit të Kosovës. (Salla e konferencave në Ministrinë e Punëve të Jashtme, ora 12:00)

- Teatri i Qytetit te Mitrovicës "Muharrem Qena" shfaq premierën teatrore “Kur treni vonohet”, me autor Osman Goranci dhe me regji të Artan Tmavës. (Qendra e Kulturës “Rexhep Mitrovica”, ora 19:00)