OJQ, nesër në protestë kundër bllokadës ekonomike nga BE
Drejtuesi i kësaj organizate, Sejdi Demiri, tha se qytetarëve të Kosovës është duke iu bërë padrejtësi nga Bashkimi Evropian, sepse janë populli i vetëm në Ballkan pa liri të qarkullimit jashtë vendit.
Koalicioni për demokraci i përbërë nga më shumë se 200 organizata ka paralajmëruar për nesër një marsh në sheshin Zahir Pajaziti në Prishtinë moton Edhe ne jemi evropianë.
Ky marsh do të organizohet për të shprehur indinjatën ndaj bllokadës ekonomike që i është bërë Kosovës si dhe për të shprehur pakënaqësinë ndaj mungesës së lëvizjes së lirë të qytetarëve si pasojë e mos liberalizimit të vizave.
Marshi do të fillojë në orën 12:00 nga sheshi deri te Teatri Kombëtar në shenjë simbolike për qarkullim të lirë të qytetarëve dhe për të demonstruar pakënaqësitë e qytetarëve për mos-liberalizim të vizave.