14 Dhjetor 2018

Normat e interesit në kredi vazhduan trendin rënës

Prishtinë, 14 qershor - Banka Qendrore e Republikës së Kosovës ka publikuar Raportin Vjetor për vitin 2017, në të cilin gërshetohen të gjitha zhvillimet në sektorët që janë pjesë e përgjegjësive të BQK-së.

Raporti Vjetor i BQK-së për vitin 2017, ashtu siç kërkohet me Ligjin mbi Bankën Qendrore, paraqet një pasqyrë të zhvillimeve ekonomike dhe financiare, si dhe të aktivitetit të BQK-së gjatë vitit 2017, ku vërehet qartë se BQK-ja me sukses ka arritur që të realizoj objektivat e saj ligjore.

Raporti fillimisht ofron një përmbledhje të zhvillimeve kryesore ekonomike dhe financiare në ekonominë e Eurozonës dhe të Evropës Juglindore, për të vazhduar pastaj me zhvillimet në ekonominë e Kosovës. Rritja ekonomikë në Kosovë në vitin 2017 vlerësohet të ketë qenë 3.7, kurse, për vitin 2018 parashikimet e BQK-së sugjerojnë se norma reale e rritjes së BPV-së pritet të jetë në intervalin prej 4.2% deri në 4.4%.

Në vitin 2017, sistemi financiar u karakterizua me rritje të aktivitetit, ku vlen theksohet në veçanti rritja e kreditimit bankar me një normë vjetore prej 11.5 përqind.

Gjithashtu, zhvillim shumë të rëndësishëm për sektorin bankar paraqet edhe rënia e mëtejme e kredive joperformuese, të cilat zbritën në 3.1 përqind, një nivel dukshëm më i ulët krahasuar me vendet tjera të rajonit.

Normat e interesit në kredi vazhduan trendin rënës, duke kontribuar kështu në përmirësimin e mëtejmë të kushteve për qasje në financim bankar.

Norma mesatare e interesit në kredi në fund të vitit 2017 ishte 6.8 përqind, në krahasim me normën prej 7.2 përqind të regjistruar në periudhën e njëjtë të vitit të kaluar.

Rëndësi të veçantë ka edhe përmirësimi i performancës së sektorit të sigurimeve, të cilat pas një periudhe të gjatë të brishtësive financiare, arritën ta përmirësojnë performancën dhe të shënojnë një profit neto në vlerë prej 6.4 milionë euro.

Ky përmirësim i performancës reflekton suksesin e masave rregullatore dhe mbikëqyrëse të BQK-së për sanimin e performancës së këtij sektori. Sektori mikrofinanciar shënoi rritje të aktivitetit kredidhënës, ndërsa vlera e gjithsej aseteve arriti në 193.5 milionë euro, që paraqet një rritje vjetore të theksuar prej 29.4 përqind.

Fondet pensionale u karakterizuan me një performancë pozitive në vitin 2017, ku vlera e përgjithshme e aseteve arriti në 1.65 miliard euro, një rritje e theksuar e aseteve prej 16.0 përqind, kurse dyfishoi kthimin në investime duke arritur në 103.1 milionë euro në vitin 2017.

Në funksion të mbajtjes së një sistemi bankar stabil, BQK-ja gjatë vitit 2017 ka bërë ekzaminimet e bankave komerciale konform planit të paraparë, ku në përputhje me praktikat ndërkombëtare në fushën përkatëse, vëmendje e veçantë i është kushtuar rrezikut kreditor, rrezikut të likuiditetit, rrezikut të tregut dhe rreziqeve tjera, duke u bazuar në qasjen e mbikëqyrjes së bazuar në rrezik.

Banka Qendrore e Republikës së Kosovës, një vëmendje të madhe i ka kushtuar mbrojtjes së shfrytëzuesve të shërbimeve financiare.

Gjatë vitit të kaluar, në BQK janë shqyrtuar 602 ankesa të shfrytëzuesve të shërbimeve financiare (persona fizikë dhe juridikë), ku 335 ankesa kanë qenë të deponuara për banka, IMF, IFJB dhe fonde pensionale, përderisa 267 ankesa kanë qenë të deponuara për kompanitë e sigurimeve.

Gjatë vitit 2017, një rëndësi të madhe BQK-ja i ka kushtuar adaptimit të Kornizës Bazel për Kapital, Ligjit për Institucionet Mikrofinanciare dhe Institucionet Financiare Jobankare, Ligjit të ri për Mbrojtjen e Konsumatorit, Plotësimit të kornizës rregullative për mbikëqyrjen e siguruesve, Plotësimit të kornizës rregullative për mbikëqyrjen e fondeve pensionale dhe mbështetjes ligjore dhe rregullative të shtyllës së Mbikëqyrjes Financiare.

BQK-ja ka vazhduar të përfitojë nga asistenca teknike gjatë vitit 2017, e ofruar nga institucionet financiare ndërkombëtare dhe donatoret e ndryshëm si me projektet ekzistuese, po ashtu edhe me iniciativa të reja. 

Kalendari

Ngjarjet e datës 14 dhjetor 2018 - Mbahet seanca plenare e Kuvendit të Republikës së Kosovës në të cilën do të behët shqyrtimi i dytë i Projektligjit për Ministrinë e Mbrojtjes, shqyrtimi i dytë i Projektligjit për Forcën e Sigurisë së Kosovës dhe shqyrtimi i dytë i Projektligjit për shërbim në Forcën e Sigurisë së Kosovës. (Kuvendi i Kosovës, ora 10:00)

- Në kuadër të “Javës Kundër Korrupsionit 2018” mbahet turneu kundër Korrupsion “Kosova Open 2018”. (Kino “Armata”,  ora 10:00)

- Misioni i Organizatës për Siguri dhe Bashkëpunim në Evropë në bashkëpunim me Asociacionin e Gazetarëve të Kosovës organizojnë tryezën "Roli i medias dhe shoqërisë civile në luftimin e korrupsionit". (Swiss Diamond Hotel, ora 10:00)

- Instituti D4D organizon hapjen zyrtare të projektit “Rritja e qasjes së grave në punësim”. (Restorant Tartine Deli, Prishtinë, ora 10:00)

- Në kuadër të “Javës Kundër Korrupsionit 2018” mbahet tryeza me temë "Lufta Kundër Korrupsionit në Ballkan. (Hotel Sirius, ora 10:00)

- Mbahet ceremonia e përurimit të shtëpisë për familjen skamnore në fshatin Livoç. (Fshati Livoç, ora 10:30)

- Në kuadër të Javës Kundër Korrupsion, Demokraci Plus organizon debatin publik në lidhje me gjetjet e monitorimit të prokurimit publik në Komunën e Prishtinës. (Hotel Sirius, ora 11:00)

- Let's Do It organizon aksion pastrimi në Plemetin të Obiliqt në kuadër të Fushatës "Ta Pastrojmë Kosovën". (Plemetin, ora 11:00)

- Lidhja Demokratike e Kosovës bën homazhe te varri i Presidentit Historik të Kosovës Dr. Ibrahim Rugova dhe vazhdon më pas për homazhe te varri i Ahmet Krasniqit. (Velani, ora 11:30)

- Aleanca Kosovare e Bizneseve dhe Qendra Tregtare "Plus Center “ organizon hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2018” me moto: Unë Konsumoj Produkte Vendore, Po JU?. (Objekti i Qendrës Tregtare "Plus Center“ ne Ferizaj, ora 12:00)

- Koalicioni i OJQ-ve “Java Kundër Korrupsionit 2018” do të mbajë ngjarjen përmbyllëse të “Javës Kundër Korrupsionit 2018”, ku do të jenë prezent Ambasadorët e Shteteve Anëtare të QUINT, BE dhe Koalicioni i OJQ-ve. (Përpara Teatrit Kombëtar, ora 15:00)

- Kryeministri Ramush Haradinaj merr pjesë Akademinë Përkujtimore me rastin e 20 vjetorit të rënies së Heroit Mujë Krasniqi dhe 40 bashkëluftëtarëve të tij. (Salla e Kuqe të Pallatit të Rinisë, ora 16:00)

- Fondi për të Drejten Humanitare organizon ligjëratën publike “Sot, 20 vite më parë: Rasti Panda”. (Qendra e Dokumentimit në bibliotekën Hivzi Sulejmani, rruga “Sadik Bekteshi” nr 16, ora 16:30)

- Federata Kosovare e Atletikës organizon manifestimin sportiv të atletikës "Laureatët e vitit – Gala Athletics2018”. (Miracle Beni Dona, Zona Industriale, ora 18:30)

- Shfaqet drama jokonvencionale e Mark Ravenhill lidhur me dy vëllezër identikë të cilët ritakohen pasi që janë rritur ndarazi më Gjermaninë lindore dhe perëndimore. (Ambienti i fondacionit “Shtatëmbëdhjetë”, rruga e Muzeu Etnologjik, ora 20:00)