13 Nëntor 2018

MIN përkrahë financiarisht sektorin e vetëm që ka shënuar bilanc pozitiv tregtar

Prishtinë, 17 maj - Ministria e Inovacionit dhe Ndërmarrësisë ka lansuar sot “Programin për financim të Inovacionit dhe Ndërmarrësisë” për organizatat jo qeveritare, fond ky që do të mbështes financiarisht projektet e OJQ-ve që kanë për qëllim zhvillimin dhe promovimin e inovacionit dhe ndërmarrësisë në Republikën e Kosovës.

Në hapje të kësaj ngjarjeje para pjesëmarrësve ka folur ministri i Ministrisë së Inovacionit dhe Ndërmarrësisë Besim Beqaj. Ministri Beqaj ka theksuar rëndësinë që ka lansimi i këtij programi për promovim dhe zhvillim të inovacionit nga OJQ-të, duke theksuar se MIN në bashkëpunim me organizatat me kredibilitet ndërkombëtar do të bëjë që procesi i ndarjes së fondeve të jetë transparent dhe me efekt të prekshëm ekonomik për vendin.

“Kjo është ngjarja më e rëndësishme që nga themelimi  i Ministrisë së Inovacionit dhe Ndërmarrësisë. Vizioni i Ministrisë së Inovacionit është që  rininë ta bëjmë faktorin kryesor për rritje të konkurrueshmërisë në vend dhe ta përkrahim sektorin i cili po shënon bilancin pozitiv tregtar”, tha ministri Besim Beqaj.

Ministri Besim Beqaj ka specifikuar edhe kategoritë e përfituesve të fondeve, duke theksuar se Programi do të këtë tri nivele të mbështetjes financiar, nga 15 mijë  deri në 200 mijë euro dhe është më së i sigurt se ky program do të sjell benifite për zhvillim ekomomik të vendit.

“Programi për përkrahjen financiare të  OJQ-ve, që fushë të veprimtarisë e kanë inovacionin dhe ndërmarrësinë, është hap i rëndësishëm që po bënë sot MIN në drejtim të hapjes së mundësive për shfrytëzim të potencialit të të rinjve të Kosovës në fushën e teknologjisë informative”, shtoi ministri Beqaj.

Në ceremoninë e lansimit të Fondit për Inovacion dhe Ndërmarrësi për OJQ-të, para pjesëmarrësve kanë folur edhe zëvendësministri i Ministrisë së Financave Fatmir Gashi, drejtoresha e STIKK Vjollca Çavolli dhe Arianit Dobroshi nga Prishtina Hackerspace.​

 

Kalendari

Ngjarjet e datës 13 nëntor 2018 - Mbahet seanca e jashtëzakonshme e Kuvendit të Republikës së Kosovës në të cilën do të behët shqyrtimi dhe miratimi i pakës së ligjeve për sundim të ligjit dhe agjendën integruese evropiane. (Kuvendi i Kosovës, ora 10:00)

- Ministri i Mjedisit dhe Planifikimit Hapësinor, raporton para Komisionit për Bujqësi, Pylltari, Zhvillim Rural, Mjedis e Planifikim Hapësinor lidhur me gjendjen e mjedisit në Kosovë. (Ndërtesa e Kuvendit, salla N 302, ora 10:00)

- Ta Pastrojmë Kosovën do të organizoj aksion pastrimi në Mitrovicë, në lagjen rome, afër stadiumit “Riza Lushta”, përkatësisht  te rruga “Adem Voca”. (Mitrovicë, ora 10:00)

- Misioni i OSBE-së në Kosovë, komuna e Obiliqit përurojnë mekanizmin koordinues kundër dhunës në familje. (Restorant Amazona, ora 10:00)

- Mbahet debati publik me temën “Narkomania dhe alkoholizmi në Kosovë - si të luftohet kundër veseve që po i shkatërrojnë të rinjtë?". (Qendra Mediale në Çagllavicë, ora 11:00)

- Këshilli për Mbrojtjen e Konsumatorit mban konferencë për media më temë "Të gjithë bashkë kundër dëmeve që vijnë nga Serbia". (Holli i Ministrisë së Tregtisë dhe Industrisë, ora 11:00)

- Komuna e Gjilanit bëb prezantimin e projektit “Të rinjtë në Agrobiznes - Regjioni Ekonomik Lindor”. (Shtëpia e Rinisë, ora 11:00)

- Mbahet mbledhja e Komisionit për Integrime Evropiane në të cilën do të behët shqyrtimi Projekt-kodit Penal nga aspekti i përputhshmërisë me legjislacionin e BE-së, shqyrtimi i Projektligjit për përgjegjësinë disiplinore të gjyqtarëve dhe prokurorëve nga aspekti i përputhshmërisë me legjislacionin e BE-së dhe shqyrtimi i Projektligjit për dhënien në shfrytëzim dhe këmbim të pronës së paluajtshme të komunës, nga aspekti i përputhshmërisë me legjislacionin e BE-së. (Ndërtesa e Kuvendit, salla N204, ora 11:00)

- Lëvizja Vetëvendosje mban konferencë për media. (Oborri i Postës dhe Telekomit të Kosovës, ora 12:00)