03 Shkurt 2023

Kosova merr kredinë e parë nga Banka Botërore

Prishtinë, 6 shkurt - Banka Botërore i ka aprovuar Kosovës kërkesën për financim të projekteve për modernizim të sektorit publik dhe regjistrimit të pronave në vlerë 20.25 milionë dollarë.

 

Ndryshe nga mënyrat e financimit që ka bërë BB-ja deri më tani për Kosovën, kësaj radhe 11.14 milionë dollarë do të jenë kredi me zero interes, ndërsa pjesa tjetër donacion.

Kjo është kredia e parë që i aprovohet Kosovës gati një vit pas anëtarësimit në këtë institucion financiar ndërkombëtar. Në dokumentin e aprovuar nga Bordi i Drejtorëve të BB-së në Uashington, më 4 shkurt, thuhet se “International Development Association” (IDA), pjesë e bankës, do t’i japë Kosovës, për financimin e projektit për modernizim të sektorit publik, 4.4 milionë dollarë kredi, me afat të maturimit 40 vjet dhe periudhë të ngrirjes së kredisë (Grace Period), me normë të interesit 0 për qind.

Ndërkaq, IDA do ta ndihmojë këtë projekt edhe me një grant 3.6 milionë dollarë. Po, i njëjti institucion do t’i sigurojë Kosovës edhe 6.74 milionë dollarë kredi me kushte të njëjta, dhe një grant 5.5 milionë dollarësh për regjistrimin kadastral të pronave.

Lundrim Aliu, zyrtar për komunikim në zyrën e Bankës Botërore në Kosovë, ka konfirmuar për gazetën “Express” aprovimin e këtyre projekteve nga Bordi dhe ka thënë se këto janë pjesë e strategjisë së re dyvjeçare të këtij institucioni për Kosovën. Zëvendësministri i Ekonomisë dhe Financave, Bedri Hamza, tha se ky është një start i mirë dhe “ne presim financime edhe më të mëdha të projekteve të tjera në Kosovë”.

Kalendari

Ngjarjet e datës 3 shkurt 2023  - Këshilli Gjyqësor i Kosovës mban mbledhjen e radhës. (Ndërtesa e KGjK-së, ora 9:00)

- Kuvendi Komunal i Gjilanit mban seancë të jashtëzakonshme, ku në rend dite do të jetë falja e tatimit në pronë në vlerën deri 100 euro për të gjithë tatimpaguesit e kësaj komune, për vitin 2023. (Salla e Kuvendit Komunal të Gjilanit, ora 10:00)

- Sindikata e Sektorit Privat të Kosovës mban konferencë për shtyp lidhur me gjendjen e punëtorëve teknik të Sektorit Privat te Kosovës dhe dialogu me qeverinë dhe institucionet tjera të Kosovës. (Zyrët e Sindikatës, ora 11:00)

- Lidhja Demokratike e Kosovës Dega në Prizren, mban konferencë për medie. (Selia e LDK-së në Prizren, ora 11:00)

- Komisioni për Buxhet, Punë dhe Transfere shqyrton Projektligjin për ndryshimin dhe plotësimin e Ligjit mbi ndarjet buxhetore, si dhe shqyrton listën e kandidatëve për plotësimin e një pozite për anëtar joekzekuiv të Bordit të Bankës Qendrore të Kosovës. (Kuvendi i Kosovës, salla C203, ora 13:30)

- Prezantohet puna e kryer rreth vajzave dhe grave me aftësi të kufizuara të cilat kanë folur hapur për historitë e tyre të, abuzimeve seksuale, dhunës fizike, dhunës psikike, keqtrajtimeve, ofendimeve dhe diskriminimeve. (Ndërtesa e Qeverisë, salla P38, ora 14:30)

- Parlamenti i Studentëve të Universitetit të Prishtinës organizon marsh kundër Asociacionit, dhe në shënim të 53-vjetorit të themelimit të UP-së. (Biblioteka Kombëtare, ora 16:00)