15 Nëntor 2019

Kontrata 3 milionëshe, me shumë shkelje

Mitrovicë, 23 tetor - Sot organizatat e shoqërisë civile nga rajoni i Mitrovicës organizuan një konferencë për shtyp, ku u bë lansimi e Raportit të Monitorimit të tenderit - Qendra e riciklimit industrial për mbeturinat paraprakisht të klasifikar ose të përziera që kishte një vlerë prej 3 milion e 395 mijë euro.

Raporti i përgatitur nga organizatat: Community Building Mitrovica, Mundësia, 7 Arte, Civil Development Organization, Iniciativa Qytetare Skenderaj; konstaton se Komuna e Mitrovicës duke e shkelur Ligjin e Prokurimit Publik e ka kufizuar konkurrencën në tenderin 3 milion e 395 mijë euro.

Tenderi është iniciuar në pjesën e parë të vitit 2018, ndërsa kontrata është nënshkruar në shtator të vitit 2018. Komuna e Mitrovicës ka lidhur kontratë me konzorciumin “Alfa I & RECY technologies”, në vlerë prej 3,395,070 euro

“Kemi gjetur disa shkelje ligjore që janë bërë në këtë tender 3 milion e 395 mijë euro të Komunës së Mitrovicës. Këto shkelje, sado që duken të vogla dhe procedurale, kanë ndikuar që të kufizohet konkurrenca për këtë tender dhe në fund të shpërblehet me kontratë operatori i vetëm që ka qenë në garë”, ka thënë Kenan Beqiri, një nga autoret e këtij punimi.

Në raportin e publikuar thuhet se Komuna e Mitrovicës kur është bërë korrigjimi i gabimeve nuk i kishte zgjatur afatet siç kërkohen në Ligjin e Prokurimit dhe kështu ia ka pamundësuar operatorit “TEHNIX” doo - Kroaci dhe “TEHNIX” doo — Maqedoni që të ankohet.

“Përveç lëshimeve nga komuna e Mitrovicës, grupi ka gjetur se kishte shkelje edhe nga Organi Shqyrtues i Prokurimi. Kjo e fundit ka bërë shkelje gjatë shqyrtimit të ankesës duke iu referuar gabimisht ankesave që janë bërë. Këto gabime të OSHP-së kanë pasur ndikim direkt në vendimin final që ia ka mundësuar Komunës së Mitrovicës të nënshkruaj kontratën 3 e 395 mijë euro”, Erzen Isufi, një nga autoret e këtij punimi.

Grupi ka gjetur se janë bërë edhe dy lëshime nga Komuna e Mitrovicës. Komuna ka pranuar ofertë në gjuhën italiane, në kundërshtim me kërkesat e Ligjit të Prokurimit për të pranuar vetëm oferta në gjuhët zyrtare në Kosovë.

Përveç kësaj, Komuna ka lëshuar një gabim me rastin e hartimit dhe bashkëngjitjes në e-prokurim tek pjesa e përshkrimit të çmimeve në gjuhen angleze, pasi në tabelën e Excel nuk janë kalkuluar fare shpenzimet e doganës në vlerë prej 8%.

Kjo ka bërë që operatorët që kanë aplikuar duke u bazuar në dosjen në gjuhen angleze të ofertojnë gabimisht, pra pa i kalkuluar shpenzimet doganore.

Përkundër që kriter për dhënie të kontratës ishte caktuar “Çmimi ekonomikisht më i favorshëm”, që nuk e merr për bazë vetëm çmimin, grupi vlerëson se nënkriteret nuk ishin të matshme dhe relevante për këtë projekt.

Grupi Punues rekomandon që të respektohen afatet dhe kërkesat ligjore sa i përket hapjes së tenderëve, korrigjimit të gabimeve si dhe dokumentet dhe ofertat të pranohen vetëm në tri gjuhët zyrtare.

“Kryetari i Komunës duhet të sigurohet që lëshime të tilla nga stafi i prokurimit të sanksionohen në mënyrë që të parandalohet diskriminimi i OE, përkatësisht kufizimi i konkurrencës që rrezikon rritjen e çmimeve. Ndërsa, Paneli shqyrtues i OSHP-së duhet të sigurohet që mos të lëshojë gabime kapitale në vendimet e tyre”, ka thënë Gentiana Zeqiri.

Kalendari

Ngjarjet e datës 15 nëntor 2019  - Klinika e Neonatologjisë dhe Shoqata e Neonatologëve të Kosovës, organizojnë Konferencën e I-rë nderkombëtare. (Hotel Garden, ora 9:00)

- Policia e Kosovës në shënim të ditës botërore të përkujtimit të viktimave në trafikun rrugor, në bashkëpunim me Këshillin e Sigurisë në Trafikun Rrugor dhe me Shoqatën e Sigurimeve , do të mbaj tryezë për shënimin e kësaj dite. (Salla Orion në Prishtinë në afërsi të Kino ABC, ora 9:30)

- Ministria e Arsimit, Shkencës dhe Teknologjisë organizon tryezën dhe punëtorinë me temën “Status quo e Zhvillimit të Kërkimit dhe Inovacionit në Kosovë: Ide rreth së ardhmes së K&I në Kosovë”, mbështetur nga Projekti HERAS i cili përkrahet nga Qeveria e Austrisë. (Hotel Sirius, ora 9:30)

- Komisioni i Pavarur për Miniera dhe Minerale mban punëtorinë lidhur me “Udhëzuesin për miradministrimin e aktiviteteve minerare dhe mjedisore. (Hotel Amazona, ora 10:00)

- Programi i Kombeve të Bashkuara për Zhvillim në Kosovë, përmes projektit Interdev 2, organizon një panair me shoqatat e grave prodhuese për të shënuar Ditën Ndërkombëtare të Sipërmarrësisë së Grave. (Qendra Kulturore në Viti, ora 11:00)

- Ministria e Mbrojtjes organizon ceremoninë e certifikimit të rekrutëve të rinj të FSK-së, gjenerata e dytë 2019. (Kazerma 'Adem Jashari' në Komandën e Forcave Tokësore në Prishtinë, ora 11:00)

- Komuniteti artistik organizon takim përkujtimor për regjisoren Arzana Kraja. (Teatri Kombëtar, ora 12:00)

- Organizata ETEA dhe Kuvendi i të Rinjve të Prishtinës organizon ceremoninë e hapjes të minibibliotekës së lagjes Ulpiana. (Te fontana në lagjen Ulpiana, ora 12:00)

- Kryetarja e KQZ-së dhe anëtarët, presin në takim deputetët e Kuvendit të Republikës së Shqipërisë, anëtarë të Komisionit të Reformës Zgjedhore: znj. Rudina Hajdari, Myslim Murrizi dhe Ralf Gjoni. (Selia e KQZ-se, ora 12:00)

- Ministri i MMPH-së, Fatmir Matoshi, do të nënshkruajë gjashtë Udhëzime Administrative që avancojne fushën e kadastrës dhe regjistrimit të pronës. (Zyret e Agjencisë Kadastrale të Kosoves, ndërtesa e Arkivit të Kosovës, ora 14:00)

- Kryetari i Gjykatës Themelore në Gjilan, Ramiz Azizi, do të mbajë një konferencë për media në të cilën do të prezantohet raporti nga muaji korrik deri në muajin tetor për Gjykatën Themelore të Gjilanit, së bashku me Degët e saja. (Gjykata Themelore Gjilan, ora 14:30)

- Mbahet marsh përkujtimor në këmbë nga Lagja Arbëria, rrugës Fehmi Agani deri te Teatri Kombëtar ku do të bëhet ndezja e qirinjve në përkujtim të viktimave që kanë humbur jetën në aksidente në trafikun rrugor. (Kolegji i Shkencave të Aplikuara Teknike “Tempulli”, ora 18:00)

- Mbahet stërvitja e Kombëtares së Kosovës. (Stadiumi ‘Fadil Vokrri’, ora 18:00)

- Galeria e Ministrisë së Kulturës organizn hapjen e ekspozitës individuale të autores Lumjetë Havolli, e titulluar "Is This Me...Or i Do it For You Only!?". (Galeria e Ministrisë së Kulturës, ora 19:00)

- Qendra për Informim dhe Përmirësim Social feston hapjen e Linjës telefonike për parandalim të vetëvrasjes "Linja e Jetës" në Kosovë! (Menza Ramiz Sadiku, ora 21:00)