17 Tetor 2019

Gjykata Komerciale hyn në programin Legjislativ të Qeverisë për vitin 2019

Prishtinë, 11 korrik - Në fillim të mbledhjes së 110-të, Qeveria e Republikës së Kosovës, e drejtuar nga kryeministri Ramush Haradinaj, ka mbajtur një minutë heshtje në nderim dhe respekt të viktimave në 24 vjetorin e Masakrës së Srebrenicës.

Pika e parë që mori aprovimin e kabinetit qeveritar ishte Rregullorja për Integrimin e të Huajve, e cila përcakton procedurat, kriteret dhe institucionet përgjegjëse për integrimin e të huajve në jetën sociale, ekonomike dhe kulturore në Republikën e Kosovës.

Rregullorja për Shqyrtimin Administrativ të Akteve të Komunave, mori aprovimin e kabinetit qeveritar. Qëllimi i kësaj rregulloreje është përcaktimi i procedurave për shqyrtimin administrativ të akteve të komunës, si dhe obligimeve të Ministrisë së Administrimit të Pushtetit Lokal, ministrive të linjës dhe institucioneve tjera përgjegjëse për këtë proces.

U miratua edhe vendimi për shqyrtimin e mëtejmë të kërkesës për shpronësim për interes publik të pronave të paluajtshme/Ndërtesës-Lokaleve Afariste të cilat janë nën menaxhimin e Agjencisë Kosovare të Privatizimit të cilat preken nga realizimi i projektit “Ndërtimi i Sheshit të Qytetit” në Obiliq si dhe vendimi Preliminar për shpronësim të pronave të paluajtshme të ish ndërmarrjes OBP “Produkt” Zona Kadastrale Polac i Ri në Skenderaj, të cilat preken nga realizimi i Projektit “Ndërtimi i Parkut të Biznesit”.

Kabineti Qeveritar aprovoi në parim Nismën për lidhjen e marrëveshjes ndërmjet Qeverisë së Portugalisë dhe Qeverisë së Republikës së Kosovës për promovimin dhe mbrojtjen e ndërsjellë të investimeve.

Miratimin e Qeverisë së Kosovës e mori edhe propozimi i Ministrit të Drejtësisë, Abelard Tahiri, që në Programin Legjislativ për vitin 2019 të përfshihet edhe Projektligji për Gjykatën Komerciale. Themelimi i kësaj Gjykate del si rezultat i analizave të procesit të rishikimit funksional të sektorit të sundimit të ligjit, rezultate këto që rekomandojnë fuqishëm themelimin e kësaj gjykate.

Poashtu, me propozim të Ministrit të Punës dhe Mirëqenies Sociale, Skender Reçica, në mbledhjen e sotme aprovimin e kabinetit qeveritar e mori edhe vendimi për pagesën e pensionit të papaguar për vitet 2011 – 2015, në vlerë prej 18 mijë euro për bashkëshorten e Ismet Jasharit – komandant “Kumanovës”.

Në fund të mbledhjes kryeministri Haradinaj ka kërkuar nga ministri i Financave, Bedri Hamza, sqarim lidhur me kërkesën dhe propozimin e Komunës së Gjilanit lidhur me çështjen e ujit të pijes në këtë komunë, dhe një kërkesë të K.R.U Gjakova lidhur me buxhetin e paraparë për renovimin e gypave në këtë ujësjellës.

Ministri i Financave, Bedri Hamza tha se ndërrimi i gypave të azbestit është projekt jetik për qytetarët e komunës së Gjakovës dhe si ministri e Financave në proceset e ardhshme buxhetore, po edhe gjatë këtij viti, pas krijimit të rrethanave ligjore janë të gatshëm për mbështetjen e këtij projekti dhe adresimin e kësaj çështje.
 

Kalendari

Ngjarjet e datës 17 tetor 2019 - Presidenti i Republikës së Kosovës, Hashim Thaçi, pret në takim Lartmadhërinë e saj, Sophie, Konteshën e Wessexit. (Kabineti i Presidentit, ora 9:00 - vetëm pamje)

- Komisioni Qendror i Zgjedhjeve mban mbledhjen e radhës. (Selia e KQZ-se, ora 9:30)

- Dogana e Kosoves organizon ceremoninë e shprendarjes se certifikatave për dy kompanitë kosovare të certifikuara si Operator Ekonomik të Autorizuar. (Objekti i Drejtorise se Doganes në Emshir, ora 10:00)

- Ambasada Britanike dhe Qendra e Rehabilitimit të Kosovës për Viktimat e Torturës po mbajnë një konferencë për të filluar rezultatet e hulumtimit paraprak në traumën transgjeneruese në lidhje me Dhunën Seksuale të Lidhur me Konfliktin. (Hotel Swos Diamond, ora 10:30)

- Mbahet punëtoria “Shkolla e Mozaikut”. (Muzeu Kombëtar e Kosovës, ora 11:00)

- Mbahet protestë pasi Akademia Suedeze e Shkencave shpërbleu me çmimin Nobel për Letërsi, autorin austriak Peter Handke, një mbështetës i gjenocidit dhe luftërave në ish-Jugosllavi nën regjimin e Sllobodan Millosheviqit. (Para Ambasadës së Suedisë, ora 11:00)

- Lëvizja FOL, Çohu, INPO, Instituti Columbus dhe Open Data Kosovo organizojnc konferencën e përbashkët të cilën do të prezantohet Raporti i monitorimit të aktivitetit të prokurimit rreth rrotulimit Rreth rrotullimi Lakrishtë - Rreth rrotullimi Arbëri. (Zyrat e Lëvizjes FOL, ora 11:00)

- Prokurori i Shtetit do të mbajë konferencë për media. (Objekti i Prokurorit të Shtetit, kati III, salla e takimeve të Këshillit Prokurorial, ora 11:30)

-  Organizata për Rritjen e Cilësisë në Arsim organizon debat me studentët e Fakultetit të Ndërtimtarisë dhe Arkitekturës për identifikimin e problemeve në këto fakultete dhe zgjidhjen e tyre përmes formave të ndryshme të mbështetjes së studentëve. (Fakulteti i Ndërtimtarisë dhe Arkitekturës, ora 15:00)

- Ambasadorja e Francës, Marie-Christine Butel do të ketë nderin të dekorojë znj Nerimane Kamberi me Urdhrin e Palmave Akademike. (Rezidenca e Francës, ora 18:30)

- Galeria e Ministrisë së Kulturës organizon hapjen e ekspozites "Post-Avangarda Lindore" te autorëve Adrian Çene, Brikena Bërdo dhe Albana Shoshi. (Galeria e Ministrisë së Kulturës, ora 19:00)