24 Maj 2019

Gjermania mbështet Kosovën me 2 milionë euro për Qeverisjen Financiare

Prishtinë, 15 maj - Qeveria e Republikës së Kosovës dhe Qeveria e Republikës Federale të Gjermanisë, kanë nënshkruar sot Marrëveshjen Implementuese për Fazën e IV të Projektit të Qeverisjes së Mirë Financiare, në vlerë prej 2 milionë euro.

Marrëveshja u nënshkrua nga Ministri i Financave Bedri Hamza, ambasadori i Republikës Federale të Gjermanisë në Kosovë Christian Heldt dhe drejtori i GIZ-it për Kosovën dhe Maqedoninë e Veriut David Oberhuber, në praninë e sekretarit gjeneral të Kuvendit të Kosovës Ismet Krasniqi dhe  udhëheqëses së Projektit për Qeverisje të Mirë Financiare Kadri Jõgiste.

Me këtë rast ministri Bedri Hamza, bëri të ditur se kjo marrëveshje parasheh mbështetje direkte në formë të asistencës teknike për Ministrinë e Financave dhe agjencitë e saj si dhe për Kuvendin e Kosovës, përkatësisht Komisionin për Buxhet dhe Financa dhe Komisionin për Mbikëqyrje të Financave Publike dhe njësitë mbështetëse të tyre.

“Faza IV e projektit pritet të implementohet përgjatë periudhës 2019-2020. Andaj në fazën IV të këtij projekti e mirëpresim ndryshimin e qasjes së projektit, që të jetë më gjithëpërfshirëse dhe të punojë së bashku me të gjitha departamentet e përfshira në procese të caktuara të Menaxhimit të Financave Publike”, shtoi Ministri Hamza.

Ai theksoi se “Ministria e Financave, mirëpret edhe zgjerimin e mëtutjeshëm të fushëveprimit të Portalit të Transparencës të paraparë me këtë fazë, si dhe implementimin e Udhëzimeve Administrative për Investime Kapitale, Transfere dhe Rialokime”.

Ministri Hamza bëri të ditur gjithashtu se Projekti për Qeverisje të Mirë Financiare ka filluar implementimin në vitin 2009 dhe deri më tani me sukses janë implementuar tri faza të këtij projekti, me fokus në: qeverisjen financiare në Kosovë, në veçanti llogaridhënie, transparencë, dhe efektivitet të planifikimit dhe shpenzimeve.

"Ndër të arriturat kryesore të fazave të kaluara janë: Lansimi i Portalit të Transparencës,  Themelimi i Zyrës së Gjobave dhe Ndëshkimeve në ATK, Përmirësimi i sistemeve të IT-së të ATK dhe MF, Hartimi i akteve nënligjore dhe asistenca në zgjerim të dokumenteve përcjellëse të Buxhetit të Kosovës, Asistenca e ofruar përmes ekspertëve të integruar në MF dhe ATK, Publikimi i thjeshtëzuar i dokumenteve shpjeguese për buxhetin dhe shpenzimet e Qeverisë së Kosovës, Kryerja e Anketave të Tatimpaguesve, si dhe Rritja e bashkëpunimit mes Ministrisë së Financave, Komisionit Parlamentar për Buxhet dhe Financa, Komisionit Parlamentar për Mbikëqyrje të Financave Publike, dhe Zyrës së Auditorit të Përgjithshëm”, theksoi Hamza.

“Zhvillimi i mëtejmë i kapaciteteve në Ministrinë e Financave dhe ATK vazhdon të jetë prioritet i yni, në mënyrë që tatimpaguesit dhe qytetarët e Republikës së Kosovës të marrin shërbimet më të mira dhe të barabarta nga institucionet shtetërore”, shtoi Ministri Hamza. 

Ministri Hamza  gjithashtu vlerësoi lartë Qeverinë Gjermane për mbështetjen që i ka dhënë dhe vazhdon t’i japë Kosovës, dhe GIZ-in që ka vazhduar të jetë partner shumë serioz në implementim të reformave në menaxhim të financave publike.

“Qeverisja demokratike dhe moderne përmirësohet vetëm duke marrë shembujt më të mirë dhe praktikat e njohura duke na siguruar që ndërtimi i shtetit të Kosovës do të ketë të ardhme në familjen euro-atlantike”, shtoi Ministri Hamza.

Ndërsa, ambasadori Christian Heldt me këtë rast u shpreh “Njëri nga sukseset për të cilat e përgëzojmë Qeverinë e Kosovës është lansimi i Portalit të Transparencës Buxhetore. Që nga fillimi i bashkëpunimit në vitin 2009, qëllimi i këtij projekti ka qenë forcimi i qeverisjes së mirë financiare të Kosovës me theks të veçantë në llogaridhënien, transparencën dhe efektivitetin në procesin e punës. Duke u bazuar në bashkëpunimin tonë të suksesshëm me Ministrinë e Financave, Kuvendin e Kosovës dhe Administratën Tatimore, Qeveria Gjermane dhe GIZ presin me padurim fazën e re të projektit.”

 

Kalendari

Ngjarjet e datës 24 maj 2019

- Nisin punimet për rregullimin e rrugës kryesoret të qytetit të Deçanit Rrugës së  Qendrës konkretisht rrugës 'Luan Haradinaj' dhe 'Dëshmoret e Kombit'. (Në afërsi të pikës së karburantit Agonisi Gas në Carrabreg, ora 10:00)

- Mbahet mbledhja e komisionit për Mbikëqyrjen e Financave Publike në të cilën do të behët shqyrtimi i Raportit të Auditimit për raportet financiare dhe atyre të deklarimit financiar të subjekteve politike për vitin 2017. (Ndërtesa e Kuvendit, salla N 302, ora 10:00)

- Kryeministri Ramush Haradinaj merr pjesë në ceremoninë e fillimit të punimeve të rrugës së qytetit të Deçanit. (Sheshi i qytetit në Deçan, ora 10:00)

- Drejtori i Zyrës për Rritje Ekonomike i USAID-it në Kosovë, Brian Martalus, do të mbajë një fjalim në hapjen e Konferencës Ekonomike të Diasporës Shqiptare nga Evropa - B2B. (Hotel Emerald, ora 10:00)

- “Let’s Do It” mban aksion pastrimi në disa fshatra të Hasit, me moton “Për një Has të pastër”. (Fshati Gjonaj tek Ura e Drinit të Bardhë, ora 10:00)

- Drejtoresha e misionit të USAID-it Lisa Magno do të flasë me rastin e prezantimit të gjashtë video udhëzuesve për e-prokurim. (Hoteli Swiss Diamond, ora 10:00)

- Mbledhja e komisionit Ad-hoc për përmirësimin dhe forcimin e procesit zgjedhor në të cilën do të behët shqyrtimi i kërkesës së Grupit për Studime Juridike dhe Politike për pjesëmarrje në Grupin Këshillëdhënës. (Ndërtesa e Kuvendit, salla N 303, ora 10:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Kompleksin Memorial “Dëshmorët e Kombit” në Gllogjan. (Kompleksi Memorial “Dëshmorët e Kombit” në Gllogjan, ora 11:00)

- Programi i Kombeve të Bashkuara për Zhvillim, Ministria e Punëve të Brendshme dhe Policia e Kosovës do të shënojnë së bashku Ditën Ndërkombëtare të Grave për Paqe dhe Çarmatim me një konferencë shtypi. (Ambientet e UNDP-së, ora 11:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Fshatin Kodrali. (Fshati Kodrali, ora 11:30)

- Presidenti i Republikës së Kosovës, Hashim Thaçi, merr pjesë në Akademinë Përkujtimore për heroin Abdullah Tahiri. (Teatri Kombëtar i Kosovës, ora 12:00)

- Prokuroria Themelore e Pejës organizon konferencën për media ku temë diskutimi do jetë ngritja e dhjetëra aktakuzave për rastin e njohur në opinionin publik si “veteranët e rrejshëm”. (Objekti i Prokurorisë Themelore të Pejës, rruga “Hasan Cermaxhija”. ora 12:00)

- 44 nxënës nga klasa 7 deri në klasën 9, nga të gjitha regjionet e Kosovës do të takohen për të garuar në finalen e garës së tretë vjetore të gërmëzimit.  (Biblioteka kombëtare, ora 13:15)

- Ministria e Kulturës, Rinisë dhe Sportit organizon ceremoninë e ndarjes  së çmimeve “Nikete Dardani”. (Kabineti i Ministrit të Kulturës, ora 13:30)

 - Shënohet 19 vjetori i themelimit të Aleancës për Ardhmërinë e Kosovës në Gjakovë. (Pallati i Kulturës” Asim Vokshi” , Gjakovë, ora 18:00)

- Organizuar nga Ministria e Diaspores dhe Investimeve Strategjike dhe Rrjeti i Bizneseve të Diasporës Shqiptare mbahet konferenca ekonomike e diasporës shqiptare nga Evropa më B2B. (Hotel Emerald, ora 20:00)

- Kryeministri Ramush Haradinaj merr pjesë në Konferencën Ekonomike të Diasporës Shqiptare nga Evropa, organizuar nga Ministria e Diasporës dhe Investimeve Strategjike dhe Rrjeti i Bizneseve të Diasporës Shqiptare. (Hotel Emerald, ora 20:00)