20 Shtator 2020

Filloi fushata mbi regjistrimin e popullsisë, ekonomive familjare dhe banesave

Prishtinë, 12 shkurt - Nën përkujdesjen e Ministrisë së Administratës Publike dhe Entit të Statistikave të Kosovës, i cili funksionon si Agjenci në kuadër të kësaj  ministrie dhe në bashkëpunim me Zyrën Ndërlidhëse të Komisionit Evropian në Kosovë, është shënuar hapja e  fushatës senzibilizuese për Regjistrimin e Popullsisë, Ekonomive familjare dhe Banesave, përmes një Konference të mbajtur në amfiteatrin e Ndërtesës së Re të Qeverisë ( ish Pallati i medieve “Rilindja”).

Panelistët në këtë Konferencë kane ofruar shpjegime të domethënies dhe rëndësisë që ka Regjistrimi i popullsisë në përgjithësi dhe si dhe kanë theksuar rëndësinë e veçantë që ka fushata informuese në këtë aspekt. Në emër të Qeverisë së Republikës së Kosovës, zëvendëskryeministri Ramë Manaj ka theksuar rëndësinë e këtij procesi, si një prioritet i veçantë i Qeverisë, i cili konsiston në faktin e pasqyrimit real të gjendjes socio-demografike dhe ekonomike përmes nxjerrjes së të dhënave kredibile, kualitative dhe të krahasueshme.

Ministri i Ministrisë së Administratës Publike, dr. Arsim Bajrami, duke qenë në krye të institucionit i cili do të bart përgjegjësinë e Regjistrimit të Popullsisë në vitin 2011, ka ofruar para të pranishmëve kronologjinë e vendimeve që lidhen me këtë proces, si dhe mekanizmat të cilët në vazhdimësi janë koordinuar në mënyrë që Regjistrimi i Popullsisë të jetë i suksesshëm.

„ Qeveria e Kosovës, përkatësisht MAP me qëllim të mbarëvajtjes së procesi, ka punuar në drejtim të ngritjes së vazhdueshme të kapaciteteve në kontekst profesional si dhe adresimit të çështjeve dhe identifikimit të masave që duhen marrë“ ka thënë ministri Bajrami në fjalën e tij. Ministri i Ministrisë së Punës dhe Mirëqenies Sociale, Nenad Rashiq, në fjalën e tij ka vënë theksin mbi rëndësinë që ka procesi i Regjistrimit të Popullsisë për gjithë komunitetet në Kosovë, duke i ftuar ata pa dallim që të jenë pjesë e këtij procesi, nga i cili do të përfitojnë të gjitha komunitetet.

Një nga panelistët në këtë Konferencë, fjala e të cilit u ndoq me shume interes nga të pranishmit, ishte Peter Everaers nga EUROSTAT-i, drejtor i bashkëpunimit, komunikimit dhe indikatorëve kyç me jashtë, si dhe udhëheqës i Grupit Menaxhues të Monitorimit Operacional Ndërkombëtar, në fjalën e tij ka shpjeguar mbi përfitimet nga regjistrimi i popullsisë dhe shtëpive në një shoqëri moderne, duke qartësuar kuptimin e asaj se çka është regjistrimi i popullsisë dhe si njerëzit mund të përfitojnë nga të dhëna të sakta dhe të besueshme.

Ndërkaq, shefi i zyrës Ndërlidhëse të Komisionit Evropian në Kosovë, z. Renzo Daviddi në prezantimin e tij ka sjellur shpjegime për statistikat dhe integrimin në Bashkimin Evropian, për kontekstin regjional dhe evropian te Regjistrimit, si dhe asistencën e Komisionit Evropian dhe koordinimin  donatorëve në këtë proces.

Aspekte nga prizmi ligjor i regjistrimit te popullsisë deri në vendimin e Kuvendit të Kosovës për datën e mbajtjes së Regjistrimit, si dhe historikun e Regjistrimit të Popullsisë dhe Shtëpive ne Kosovë janë elaboruar nga zëvendësministri Rifat Blaku, i cili njëkohësisht udhëheq Komisionin Qendror për Regjistrimin e Popullsisë. Drejtori për Regjistrimin e Popullsisë në Irlandë, Aidan Punch, i cili njëkohësisht është edhe anëtar i Komitetit Drejtues i Grupit Menaxhues të Monitorimit Operacional Ndërkombëtar ka qartësuar aspekte teknike te aktiviteteve monitoruese, duke theksuar sfidat dhe në anën tjetër rekomandimet mbi bazën e të cilave ky proces do të jetë i suksesshëm.

Kryeshefi Ekzekutiv i Entit të Statistikave, Avni Kastrati prezantimin e tij e ka fokusuar në kampanjën mediale dhe informuese mbi regjistrimin e popullsisë, e cila ka filluar me Konferencën e sotme. Gjithashtu, në këtë Konferencë panelistët u përgjigjën edhe në pyetjet e të pranishmëve - përfaqësues institucional, nga shoqëria civile, mediet dhe përfaqësuesit e mekanizmave ndërkombëtarë në Kosovë.

Përmes lansimit të Fushatës Sensibilizuese për Regjistrim të Popullsisë, përkatësisht implementimit të strategjisë së informimit dhe komunikimit, synohet aplikimi i dialogut konstruktiv dhe proaktiv dhe ngritja e vetëdijes për gjithëpërfshirjen në regjistrim dhe shmangien e perceptimeve jo të drejta në mungesë të informimit të saktë. 
 

Kalendari

Ngjarjet e datës 21 Shtator 2020 - Mbahet mbledhja e Qeverisë së Republikë së Kosovës. (Ndërtesa e Qeverisë, ora 8:30)

- Fillon Shkolla Verore e BE-së në të cilën do të shtjellohet temat për zhvillimin ekonomik, qëndrueshmërinë mjedisore dhe shfaqjen e pandemisë globale. (Zyra e Bashkimit Evropian në Kosovë, ora 9:00)

- Mbahet mbledhja e komisionit për të Drejtat e Njeriut, Barazi Gjinore, për Persona të Pagjetur dhe Peticione në të cilën do të votohet raporti i panelit përzgjedhës për shqyrtimin e aplikacioneve, intervistim dhe listën e ngushtë të kandidatëve për Avokat të Popullit. (Ndërtesa e Kuvendit, salla N302, ora 10:00)

- Ministrja e Punëve të Jashtme dhe Diasporës, Meliza Haradinaj Stublla takohet me Ambasadorin japonez, Mizutani Akira. (Kabineti i ministres Haradinaj Stublla, ora 10:00 - pa prezencen e mediave)

- Kryeministri i Republikës së Kosovës, Avdullah Hoti, pret në takim delegacionin e Qeverisë së SHBA-ve, të udhëhequr nga Kryeshefi Ekzekutiv i Korporatës Ndërkombëtare të Financave dhe Zhvillimit në SHBA Adam Boehler, të cilit do t’i bashkohet edhe i dërguari special i SHBA-së për dialogun Kosovë - Serbi, Richard Grenell, përfaqësues të USAID, Kryetarin e Bankës së Eksport-Importit të Shteteve të Bashkuara, si dhe zyrtarë të tjerë të lartë të qeverisë nga Departamentet e Energjisë dhe Tregtisë në SHBA. (Ndërtesa e Qeverisë, ora 10:00)
 
- Ministrja e Punëve të Jashtme dhe Diasporës, Meliza Haradinaj Stublla dhe Ambasadori japonez, Mizutani Akira, nënshkruajnë marrëveshjen për donacionin e radhës të Japonisë për Kosovën. (Ministria e Punëve të Jashtme dhe Diasporës, ora 10:30)

-  Komisioni Hetimor Parlamentar lidhur me procesin e privatizimit në Kosovë shqyrton listen e dëshmitarëve, përzgjedh ekspertët e jashtëm si dhe publikon adresën për dorëzimin e dëshmive nga qytetarët. (Ndërtesa e Kuvendit, salla N10, ora 11:00)

- Kryeministri Avdullah Hoti merr pjesë në përurimin e shtatores së Heroit Ahmet Krasniqi, si dhe në inaugurimin e sheshit, i cili do të mbajë emrin e tij. (Sheshi “Ahmet Krasniqi” në Vushtrri, ora 11:00)  

- Mbahet ceremonia e dorëzimit të pajisjeve mjekësore për Sallën e Operacionit dhe Sallën e Lindjes për gratë e infektuara me COVID-19, pajisje këto të financuara nga partneri jonë Raiffeisen Bank në Kosovë dhe AMC. (QKUK, ora 11:00)

- Kryetari i Autoritetit Kosovar të Konkurrencës, Valon Prestreshi, do të takohet me U.D i Kryesuesit të Bordit të Zyrës së Rregullatorit për Energji Arsim Janova, ku do të  nënshkruajnë një Marrëveshje Mirëkuptimi dhe Bashkëpunimi mes dy institucioneve, pas nënshkrimit të marrëveshjes do të ketë konferencë për medie. (Ish-objekti i Bankës së Lubjanës, kati i IV, ora 11:15)

- Seanca plenare e Kuvendit, e ndërprerë të premten do të vazhdojë sot. (Ndërtesa e Kuvendit, ora 13:00)