20 Nëntor 2019

12 të rinj të Gjilanit përfitojnë grante për ndërmarrësi

Gjilan, 29 maj - 12 të rinj të Gjilanit kanë nënshkruar kontratat e përfitimit të granteve për ndërmarrësi në formë të pajisjeve, të cilat mbështeten nga partneriteti i Komunës së Gjilanit në bashkëpunim me USAID-in (Empower Private Sector) dhe organizatën HELP.

Në ceremoninë e nënshkrimit të kontratave, nënkryetari i Komunës, Arbër Ismajli, tha se idetë e biznesit tuaj kanë qenë më të mirat dhe janë biznese premtuese në të ardhmen.

“Është njëri ndër programet më të mira deri sot që unë i kam parë edhe për shkakun që janë 12 përfitues. Fakti që nga ky program do të përfitojë rinia, më gëzon shumë dhe e falënderoj USAID dhe HELP për implementim."

"Komuna e Gjilanit ka në fokus zhvillimin e qëndrueshëm ekonomik lokal dhe këtë zhvillim ne e shohim përmes partneriteteve sikur ky sot. Pra, sektori privat është motori i zhvillimit ekonomik. Urime për të gjithë dhe i gëzofshi këtë grante”, tha Ismajli.

Shqipe Breznica, drejtoreshë e organizatës HELP, ka konfirmuar se shpërndarja e pajisjeve do të bëhet pas kryerjes së procedurave të prokurimit.

“Përfituesit e granteve duhet të presin edhe pak për procedurat e prokurimit, e më pastaj do t’i shpërndajmë pajisjet. Obligimet tuaja janë që të regjistroni bizneset, e nëse jeni ekzistues, atëherë duhet të punësoni dikë. Jam e bindur që pajisjet do t’i funksionalizoni menjëherë. Faleminderit dhe urime’, ka thënë ajo.

Menaxheri i programit të USAID Empower Pirvate Sector, Artan Loxha, ka pohuar se përzgjedhja e përfituesve të këtij lloji të granteve është mbi baza meritore.

“Iden që e kemi pasur për këtë projekt, jam shumë i lumtur që po jetësohet përmes një angazhimi të madh të organizatës Help dhe Komunës. Përzgjedhja e përfituesve të këtij lloji të granteve është mbi baza meritore."

"Programi Empower si qëllim kryesor për krejt periudhën e operimit e ka pasur sektorin privat dhe për gjenerimin e vendeve të reja të punës. Granti, sado i vogël që është, besoj se iu ofron mundësi që idetë tuaja kreative që i keni ose për regjistrimin e biznesit të ri edhe zgjerimin e biznesit, që t’i realizoni. Urime”, ka thënë Loxha.

Në fund, drejtoresha për Zhvillim  Ekonomik në Gjilan, Valbona Tahiri, ka njoftuar se e gëzon fakti që prej pesë nga 12 përfituesit e granteve janë femra, ndërkohë që tetë përfituesve në fushën e teknologjisë informative do t’iu ofrohet hapësirë ne inkubatorin e biznesit. ​

 

Kalendari

Ngjarjet e datës 20 nëntor 2019

- Ambasada e Finlandës, UBT dhe UNDP organizojnë bashkërisht konferencën “Towards Small Scale Innovative Ecosystems in Kosovo”. (Kampusi Inovativ i UBT-së në Lipjan, ora 9:00)

- Kryeministri në detyrë, Ramush Haradinaj, merr pjesë në konferencën “Small-Scale Innovative Ecosystems in Kosovo”, organizuar nga ambasada e Finlandës në Prishtinë në bashkëpunim me UBT. (Magjistralja Prishtinë - Lipjan, kampusi i UBT-së, ora 9:00)

- Me rastin e shënimit të 20 nëntorit - Ditës Ndërkombëtare të Konventës për të Drejtat e Fëmijëve, Komuna e Gjilanit organizon vizitë nga Asambleja e Fëmijëve në tri shkollat fillore: Selami Hallaqi, Thimi Mitko, Rexhep Elmazi për nder të Ditës Ndërkombëtare të Konventës për të Drejtat e Fëmijëve. (Objektete e shkollave, ora 10:00)

- Koalicioni i OJQ-ve për Mbrojtjen e Fëmijëve hap dyert për fëmijët, prindërit dhe të gjithë qytetarët që dëshirojnë të vizitojnë ambientet e KOMF për të biseduar bashkë për të drejtat e fëmijëve. (Zyret e KOMF, ora 10:00)

- Fillon punimet Kongresi i parë ndërkombëtarë për trajtimin e hershëm të infarktit të miokardit. (Hotel International Prishtina, ora 10:00)

- Mbahet mbledhja e rregullt e Komitetit për Politikë dhe Financa i Komunës së Mitrovicës. (Salla e mediave të Komunës së Mitrovicës, ora 10:00)

- Mbahet mbledhja e gjashtë e rregullt e Këshillit Komunal për Siguri në Bashkësi në komunën e Rahovecit. (Salla e Kuvendit Komunal në Rahovec, ora 10:00)

- Zyra e UNICEF-it në bashkëpunim me Ministrinë e Arsimit, Shkencës dhe Teknologjisë si dhe Shtëpinë e Evropës në Kosovë organizojn aktivitetin kryesor për shënimin e 30 vjetorit të Konventës për të Drejtat e Fëmijës. (Holli i Bibliotekës Kombëtare të Kosovës, ora 11:00) 

- OQJ Integra organizon publikimin e raportit “Instituti i Vetizoluar - Vlerësim i Shoqërisë Civile për Institutin Albanologjik të Prishtinës”. (Hotel Sirius, ora 11:00)

- Fëmijët e çerdhës "Dardania" në Gjilan dhurojnë 120 pako dhurata për fëmijët me nevoja të veçanta. (Gjilan, ora 11:00) 

- Mbahen aktivitete argëtuese për fëmijët e zgjedhur nga Handikos, Asambleja e Fëmijëve, fëmijët nga komunitetet si dhe nga shkollat SHFMU, Gjilan mbështetur nga 'Albanica' dhe 'Kimi'. (Gjilan, ora 12:00)

- Komuna e Gjilanit organizon program nga Qendra e Vallëzimit Modern “Dancing House” Vallëzim Modern, Balet dhe Popullore. (Teatri i Qytetit, Gjilan ora 15:00)

- Qendra Multimedia shfaq "Pesë stinet e armikut te popullit" me regji të Blerta Nezirajt. (Teatri "Bekim Fehmiu" në Prizren, ora 20:00)