24 Korrik 2019

100 të rinjë të Gjilanit nënshkruajnë kontratat e punës praktike me pagesë

Gjilan, 17 prill - Kryetari i Komunës së Gjilanit, Lutfi Haziri, së bashku me ambasadoren Nataliya Apostolova, kanë marrë pjesë në ceremoninë e nënshkrimit të kontratave për praktikë në kompanitë vendore të 100 të rinjve nga rajoni i Gjilanit me pagesë, me qëllimin që gjatë të ardhmes të njejtët të mbeten aktiv në punë dhe të ushtrojnë profesionin e tyre në agrobiznes dhe njëkohësisht edhe të krijojnë të ardhura për vete dhe familjet e tyre.

Kjo është bërë e mundur përmes mbështetjes së Bashkimit Europian dhe Komunës së Gjilanit të cilat si institucione kanë qenë në partneritet të plotë që ky projekt ka shënuar efektet pozitive me angazhimin e 100 të rinjëve në punë.

Kryetari Lutfi Haziri, ka falënderuar Komisionin Evropian për mbështetjen e programit në aspektin financiar dhe ka thënë se këto kontrata për të rinjtë e këtij regjioni janë një lajm i gëzuar për të gjithë, sepse me këtë po krijohet mundësia shumë e mirë për ushtrimin e profesionit të agrobiznesit dhe krijimin e të ardhuragve njëkohësisht.

“Një falënderim i veçantë për KE-në dhe ambasadoren Apostolova, që ka mbështetur financiarisht këtë program i cili target ka të rinjtë, djemë e vajza, nga të gjitha komunitetet. Regjioni i Gjilanit është zonë agro-industriale, sikur që edhe e kaluara e afërt ka qenë e lidhur fuqishëm me agrobiznesin."

"Sektori privat me investimet që po bënë e ka kthyer fokusin në agrobiznes dhe sipas statistikave, në vitin 2018. Gjilani hyn në mesin e Komunave me ambientin më të qëndrueshëm për zhvillimin lokal ekonomik, i bazuar në bujqësi. Përgatitja profesionale e të rinjve, pastaj trajnimet e shumta dhe puna praktike në sektorin e prodhimit, janë një bazë e fuqishme e zhvillimit ekonomik lokal”, ka thënë kryetari, Lutfi Haziri.

Nga ana e saj, ambasadorja Nataliya Apostolova, ka thënë se kjo fazë e projektit është pjesë shumë e veçantë për te dhe më e rëndësishmja deri më tani, sepse me këtë po bëhet një ndryshim i madh pozitiv, me përgatitjen e të rinjve në aspektin profesional, me angazhimin direkt në punë praktike dhe njëkohësisht kjo po bëhet falë edhe bashkëpunimit shumë të mirë që është krijuar me punë mes KE-së, institucioneve lokale dhe sektorit privat të biznesit prodhues.

“Me numrin e bizneseve që kemi në Gjilan dhe në këtë regjion në përgjithësi, besojmë fuqishëm se numri i të punësuarve do të rritet, përkundër kërkesave të mëdha për vende pune, por së bashku me të gjithë akterët kjo do të bëhet realitet dhe do të kemi suksese bashkërisht”, ka thënë ajo.

Aapostolova, gjithashtu, ka potencuar se Bashkimi Evropian është duke investuar vazhdimisht në fusha të ndryshme në Kosovë dhe projekte me vlerë të lartë në regjionin e Gjilanit, për të krijuar së bashku mundësi më të mëdha për të rinjtë, punësim të tyre në sektorin privat, zhvillimin e sektorit të bujqësisë së bashku me të gjitha komunitetet që jetojnë në këtë pjesë.

Pas ceremonisë, ambasadorja Apostolova dhe kryetari Haziri kanë biseduar me praktikantët për planifikimin e tyre për të ardhmen dhe rolin e institucioneve lokale dhe BE-së në këtë proces.

Kalendari

Ngjarjet e datës 24 korrik 2019

- Drejtoresha e Misionit të USAID-it në Kosovë, Lisa Magno, do të dëshmojë nënshkrimin e Memorandumit të Mirëkuptimit me 14 komuna të Kosovës. (Hotel Emerald, ora 10:00) 

- Ministri i Infrastrukturës dhe Transportit Pal Lekaj merr pjesë përurimin e zgjerimit dhe rehabilitimit të hyrjes së pikës kufitare Kosovë - Shqipëri, në Vërmicë. (Pika kufitare e Vërmicës, ora 10:30)

- Kryetari i Komunës së Gjilanit, Lutfi Haziri pret në takim drejtorin e UNHCR. (Zyra e Kryetarit Haziri, ora 11:00)

- Ministri i Mjedisit dhe Planifikimit Hapësinor, Fatmir Matoshi, do të pres në takim kryetarin e Komunës së Malisheves, Ragip Bega, më të cilin do të nënshkruajnë memorandume të bashkëpunimit për financimin e projekteve në fushën e mjedisit. (Kabineti i Ministrit, kati 17, ish objekti Rilindja, ora 11:00)

- Qendra Mediale me mbështetjen e Fondacionit të Kosovës për Shoqëri të Hapur organizon mbahet debatin publik, me temë: "Taksa 100 për qind - kush fitoi, e kush humbi dhe çfarë?". (Qendra Mediale në Çagllavicë, ora 11:00)

- Ministria e Diasporës dhe Investimeve Strategjike në bashkëpunim me Komunën e Prishtinës organizon panairin me punime artizanale, veshje kombëtare dhe ushqime tradicionale. (Sheshi “Skënderbeu”, ora 11:00)

 - Kryetari i Komunës së Gjilanit, Lutfi Haziri pret në takim Sam Paice, udhëheqës i sektorit për demokratizim në Ambasadën Britanike. (Zyra e Kryetarit Haziri, ora 11:30)

- Komuna e Gjilanit organizon ceremoninë e dorëzimi te donacionit për shëndetësi nga Besnik Benz. (Qendra Klinike e Mjeksësisë Familjare, ora 12:30)

- Lëvizja Vetëvendosje mban konferencë për media. (Zyrët e Vetëvendosjes, ora 13:00)