17 Tetor 2018

Shënohet dita tradicionale e vjeljes së mollës në Kovragë

Istog, 25 shtator - Për të trembëdhjetin vit me radhë në Kovragë është shënuar manifestimi tashmë tradicional e vjeles së mollës “Dita e Mollës”, me ç’rast në këtë ngjarje kanë marrë pjesë nënkryetari i komunës Lulzim Blakaj, zëvendësministri i Ministrisë së Bujqësisë Mevludin Krasniqi, përfaqësues të shoqatës “Pema” si dhe shumë qytetarë nga komuna e Istogut dhe mysafirë nga qytetet e tjera të Kosovës.

Me këtë rast të pranishmit në emër të kryetarit Haki Rugova i ka përshëndetur dhe nënkryetari i komunës Lulzim Blakaj, sipas tij është bërë tashmë tradicionale dita e vjeljes së mollës dhe po mundohemi që përmes këtij organizimi me pjesëmarrje të biznese dhe tregtarëve në mënyrë që këta fermerë këto produkte të kenë ku ti plasojnë. Me vjen mirë që sivjet keni një prodhimtari të mirë të mollës, unë shpresoj që me vullnetin e mirë të të gjithë biznesmenëve dhe tregtarëve do të gjeni edhe plasmanin e juaja atje. Shpresoj që ministria me politikat zhvillimore të orientohet më shumë në investime në bujqësi sidomos në përkrahje të fermerëve të mëdhenj në mënyrë që të nxisim një bujqësi sa më intensive. Komuna e Istogut cdo vit i kushton rëndësi bujqësisë dhe financimit në bujqësi përmes financimit të drejtpërdrejtë apo edhe subvencionimit u shpreh ndër të tjera nënkryetari Blakaj.

Zëvendësministri i Ministrisë së Bujqësisë Mevludin Krasniqi, tha se po ndihet shumë mirë në mesin e fermerëve, Kovraga është storia e suksesit e Ministrisë së Bujqësisë dhe komunës së Istogut dhe vet fermerëve e kultivuesve.

Organizimi i këtij manifestimi u bë nga shoqata “Pema” në Kovragë, nën patronatin e Komunës së Istogut.



 

Kalendari

Ngjarjet e datës 17 tetor 2018

- Mbahet mbledhja e Komisionit për Administratë Publike, Qeverisje Lokale dhe Media në të cilën do të shqyrtohet Projektligji për ndryshimin dhe plotësimin e Ligjit për festat zyrtare në Republikën e Kosovës. (Ndërtesa e Kuvendit, salla N204, ora 10:00)

- Mbahet ceremonia e nënshkrimit të Memorandumit të Bashkëpunimit në mes të Universitetit të Prishtinës “Hasan Prishtina” dhe Ministrisë se Inovacionit dhe Ndërmarrësisë, për financimin e projektit “Qendra e Inovacionit dhe Ndërmarrësisë në UP". (Rektorati i UP-së, ora 10:00)

- Mbahet tryeza e kampanjës informuese “Kodi Civil ndikon në statusin ligjor të qytetarëve”, organizuar nga  projekti i financuar nga Bashkimi Evropian “Mbështetje Kodit Civil – faza 2”. (Hotel Happy në Gjakovë, ora 10:00)

- Kryeministri Ramush Haradinaj pret në takim Ansamblin Kombëtar të Këngëve dhe Valleve “Shota”, të cilin do ta nderojë me medaljen e Gjergj Kastritot - Skenderbeu. (Ndërtesa e Qeverisë, ora 10:00)

- Pesë profesorë  nga Budapesti do të vizitojnë  Universitetin “Ukshin Hoti” në Prizren, ku edhe promovohet libri “Distribution atlas of vascular plants in Albania” botuar nga botanisti prof. dr. Zoltán Barina dhe mbahet një ligjëratë nga prof. dr. Antal Molnár. (Amfiteatrin e Fakultetit të Shkencave të Jetës dhe Mjedisit, ora 10:00)

- Ministri i Mjedisit dhe Planifikimit Hapësinor, Fatmir Matoshi  do të nënshkruajë Udhëzimin Administrativ për Ndëshkime me Gjoba Mandatore. (Kabineti i Ministrit Matoshi, kati 17, ish objekti “Rilindja”, ora 11:00)

- Mbahet mbledhja e Komisionit për Buxhet dhe Financa në të cilën do të shqyrtohet plotësimi dhe ndryshimi i Ligjit për Automjete, për Efiçiencë të energjisë, etj. (Ndërtesa e Kuvendit, salla N 303, ora 11:00)

- Ministria e Kulturës, Rinisë dhe Sportit, përuron objektin e Qendrës Rinore në Vushtrri. (Vushtrri, ora 11:00)

- Drejtori i Mbrojtjes dhe Shpetimit, Sami Spahiu nga Komuna e Gjilanit mban konferencë për media. (Zyra e krytarit të komunës, ora 11:00)

- Let’s Do It Kosova do të organizoj aksionin e pastrimit në Lipjan. (Oborri i Komunës së Lipjanit, ora 12:00)

- Komisioni për Punë të Jashtme, Diasporë dhe Investime Strategjike do të mbajë mbledhjen e radhës në të cilën do të shqyrtoj vlerësimet e sindikatës së MPJ-së lidhur me shkeljet në shërbimin e jashtëm. (Ndërtesa e Kuvendit, salla N-303, ora 13:00)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të shqyrtohet Projektligji për statusin e punëtorëve të arsimit shqip të Republikës së Kosovës nga viti shkollor 1990/91 deri në vitin shkollor 1998/99. (Ndërtesa e Kuvendit, salla N 225, ora 13:00)

- Lëvizja Vetëvendosje! mban konferencë për media. (Zyrat e Vetëvendosjes, ora 15:00)

-  Kryetari i Nismës Socialdemokrate, Fatmir Limaj, merr pjesë në takim me struktura drejtuese të Nismës në Vushtrri dhe Mitrovicë. (Restaurant Holiday në Vushtrri, ora 17:00)

- Kryeministri i Republikës së Kosovës, Ramush Haradinaj, merr pjesë në hapjen e “Java e bizneseve nga diaspora”, e cila organizohet nga Ministria e Diasporës dhe Investimeve Strategjike, në bashkëpunim me Odën Ekonomike Gjermano-Kosovare. (Hotel Emerald, ora 19:00)