05 Tetor 2022

Prodhuesit e qumështit i reagojnë MBPZHR për shkak të mospërfilljes së kërkesave

Prishtinë, 23 shtator - Shoqata e Prodhuesve të Qumështit të Kosovës ka reaguar ndaj Ministrisë së Bujqësisë, Pylltarisë dhe Zhvillimit Rural (MBPZHR) për shkak të mospërfilljes së kërkesave të tyre.

Përmes një komunikate, Shoqata e Prodhuesve të Qumështit të Kosovës (ShPQK), thekson se në vazhdimësi që nga pjesëmarrja në grupet punuese rreth hartimit të kritereve për aplikim, ka shprehur indinjatën dhe pakënaqësinë e saj rreth kritereve të caktuara për aplikim, në pagesa direkte dhe cilësi të qumështit nga ana e ministrisë së bujqësisë, por edhe për subvencionet dhe përkrahjet e tjera të nevojshme shtesë të fermerëve si pasojë e rrethanave të krijuara!

“Fatkeqësisht, asnjë kërkesë deri më tani e jona, si para ashtu edhe pas publikimit të kritereve për aplikim dhe afatit të shkurtër nuk është marrë parasysh”, thekson ShPQK.

Sipas tyre ,në takimin fundit të mbajtur me zv.ministrin z. Imri Demelezi dhe zyrtarin e AZhB-së, z. Imer Limani, ditë më parë ka njoftuar ministrinë për irritimin dhe pakënaqësitë e mëdha të krijuara te fermerët dhe ka bërë kërkesën e radhës për heqjen e kritereve të panevojshëm dhe të pa implementueshëm dhe t’ju japin mundësi fermerëve aplikim normal dhe që fermerët të ju kthehen punëve të tyre të përditshme e sidomos tani përgatitjeve dhe mbjelljeve vjeshtore, përndryshe ju kemi bërë me dije se do të ballafaqoheni edhe me protesta të fermerëve.

“Shoqata e Prodhuesve të Qumështit të Kosovës, në tërësi përkrahim shprehjen e pakënaqësisë së fermerëve edhe përmes protestave të sotme edhe pse jo formë e dëshiruar e jona, por siç po shihet mundësia e vetme dhe e fundit. Gjithashtu, njoftojmë se ne nuk do të tërhiqemi nga kërkesat e arsyeshme tona dhe nëse nuk kemi përgjigje pozitive këto protesta vetëm se do të intensifikohen. Shpresojmë në mirëkuptim dhe reflektim serioz nga ministria e bujqësisë dhe realizim të kërkesave të arsyeshme të fermerëve prodhues”, thekson në fund ShPQK. 

Kalendari

Ngjarjet e datës 5 tetor 2022

- Komisioni për Buxhet, Punë dhe Transfere shqyrton Projektligjin për ratifikimin e Marrëveshjes së Financimit në mes të Republikës së Kosovës përfaqësuar nga Ministria e Financave, Punës dhe Transfereve dhe Asociacionit Ndërkombëtar për Zhvillim për “Projektin e Reformës së Sistemit të Ndihmës Sociale në Kosovë”. (Ndërtesa e Kuvendit, salla C203, ora 10:00)

- Shefi i futbollit në UEFA, Zvonimir Boban takohet me Ministrin e Kulturës, Rinisë dhe Sportit Hajrulla Çeku. (Ndërtesa e Ministrisë, ora 10:00)

- Avokati i Popullit organizon dëgjim publik përkitazi me hetimin e përgjithshëm për shëndetin riprodhues në Gjilan. (Salla e Kuvendit të Komunës së Gjilanit, ora 10:00)

- Shefi i futbollit në UEFA, Zvonimir Boban takohet me kryetarin e Komunës së Prishtinës Përparim Rama. (Ndërtesa e Komunës, ora 10:45)

- Aleanca Kosovare e Bizneseve pret sekretaren e ambasadës së Malit të Zi, Fedisa Dacić ku edhe do të mbahet konferenca për media lidhur me Forumin Ekonomik Ndërkombëtar Ulqini. (Objekti i AKB-së, ora 11:00)

- Shefi i futbollit në UEFA, Zvonimir Boban takohet me Komitetin Ekzekutiv të Federatës së Futbollit të Kosovës. (Selia e FFK-së, ora 11:30)

- Komisioni për Shëndetësi dhe Mirëqenie Sociale shqyrton në parim Projektligjin për faljen e masave ndëshkimore të vendosura gjatë periudhës së Pandemisë COVID-19. (Ndërtesa e Kuvendit, salla N10, ora 11:30)

- Agjencia Kosovare e Privatizimit organizon ceremoninë e hapjes së ofertave të shitjeve të aseteve përmes likuidimit nr. SHAL 59. (Hotel Grand, ora 12:30)

- Zëvendëskryeministri i parë për Integrim Evropian, Zhvillim dhe Dialog, Besnik Bislimi raporton para Komisionit për Integrime Evropiane. (Ndërtesa e Kuvendit, salla N302, ora 13:00)

- Komuna e Gjilanit organizon mbledhje komemorative për të nderuar jetën dhe veprën e prof. dr. Shqiponja Isufit. (Salla e teatrit të qytetit të Gjilanit, ora 13:00)

-  Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike bën zgjedhjen e eksperteve. (Ndërtesa e Kuvendit, salla C203, ora 14:00)

- Shefi i futbollit në UEFA, Zvonimir Boban mban konferencë për media. (Stadiumi “Fadil Vokrri”, ora 15:00)

- Zhvillohet ndeshja Kosovë - Itali në kuadër të Kualifikimeve e Evropianit U17. (Stadiumi “Fadil Vokrri”, ora 16:00)