24 Maj 2019

Fillojnë te dalin në publik dallaveret me grantet bujqësore të MBPZHR-së

Prishtinë, 15 maj - Në Ministrinë e Bujqësisë, Pylltarisë dhe Zhvillimit Rural kanë filluar të dalin në pah parregullsitë dhe korrupsioni në ndarjen e granteve dhe subvencioneve në fushën e bujqësisë.  

Zëvendësministri Vesel Krasniqi e ka denoncuar në Polici për kërcënim sekretarin e përgjithshëm të kësaj ministrie, Kapllan Halimi.

Rastin e ka konfirmuar Policia, ndërsa edhe sekretari Halimi e ka pranuar se është ftuar për t’u intervistuar nga policia.

Kur në fillim të vitit “Koha Ditore” ka raportuar se nëpërmjet një “masë të veçantë” Ministria i ka dërguar jashtëligjshëm tre milionë euro të shtetit tek biznese që për aksionarë kanë njerëz të lidhur me të mëdhenjtë e politikës nga radhët e shqiptarëve dhe serbëve, zëvendësministri Krasniqi pati drejtuar gishtin tek tre zyrtarë të lartë.

“Procedurat të cilat i ka ndjekur ministri i Bujqësisë (që atëkohë ishte Nenad Rikalo v.j.), janë jo të rregullta. Ne si zëvendësministra, por mendoj edhe si staf i Ministrisë, jemi informuar vetëm pasi janë ndarë grantet dhe, sipas asaj që tash po shohim, janë favorizuar biznese apo persona të caktuar”, i pati thënë gazetës Krasniqi. “Ministri e ka një grup të ngushtë me të cilët bashkëpunon. Është sekretari Kapllan Halimi dhe ushtruesi i detyrës së kryeshefit të AZHB-së, Ekrem Gjokaj”.

Grantet ishin dhënë nëpërmjet njërit prej dy programeve të veçanta të mbështetjes financiare në vlerë 8 milion euro, të cilat ishin miratuar pa analizë paraprake. Me miratimin e tyre, sipas Auditorit të Përgjithshëm, Ministria ka tejkaluar buxhetin e paraparë për grante për vitin 2018. Për pasojë, janë shkaktuar telashe me buxhetin për grante, për vitin 2019.

Përplasja midis Krasniqit e Halimit kishte ndodhur tri javë më parë, pikërisht kur janë diskutuar këto çështje dhe kur është bërë me gisht për fajtorin.

Nderkaq Sekretari i Përgjithshëm i Ministrisë së Bujqësisë, Pylltarisë dhe Zhvillimit Rural, Kapllan Halimi ka reaguar ndaj shkrimit të gazetës “Koha Ditore”, me titullin  “Zv.ministri Krasniqi raporton në Polici se është kërcënuar nga sekretari Halimi”, të botuar sot, datë 15 maj 2019, në të cilin shkrim ka pasaktësi dhe të pavërteta, duke keqinformuar kështu publikun e gjerë me akuza ndaj sekretarit.


Sekretari i MBPZHR-së sqaron se gjatë takimit për të cilin në shkrim thuhet se në diskutim e sipër për programin e veçantë të ministrisë, sekretari Halimi e ka kërcënuar zëvendësministrin Vesel Krasniqi, aty nuk është diskutuar fare për programin e veçantë të MBPZHR-së, por aty është diskutuar për punën e përditshme të ministrisë, duke përfshirë projektet që janë në realizim të zhvillimit rural. “Po ashtu duhet të ritheksoj se program i ngjashëm si ai për të cilin akuzon z.Krasniqi, tashmë është iniciuar edhe nga ministrja e re, Dijana Zivic”, thotë sekretari Halimi.

Sekretari thekson se Programet për Zhvillim Rural dhe Programet për Pagesa Direkte-subvencione, hartohen duke u bazuar në Ligjin për Bujqësi dhe Zhvillim Rural 03/L-098, si dhe Plotësim Ndryshimit të Ligjit për Bujqësi dhe Zhvillim Rural 04/L-090 dhe udhëzimeve administrative, në të cilat nuk mund të ndryshojë asgjë sekretari Halimi.

Më tej, sekretari potencon se në asnjë rast ai nuk ka ndërhyrë në procedurat e përzgjedhjes së fermerëve përfitues, për të cilën gjë po akuzon zëvendësministri Krasniqi në deklaratat e tij herë pas here në Kohën Ditore.

Por, Halimi potencon se në procedurat e përzgjedhjes së përfituesve, është zëvendësministri Vesel Krasniqi ai, i cili disa herë ka tentuar të ndërhyjë, të cilën gjë e dëshmojnë edhe disa shkrime dhe emisione në mediat vendore.

“Potencoj që zëvendësministri Krasniqi rregullisht ka tentuar të bëjë shantazh me presion publik duke tentuar në këtë mënyrë të kontrolloj gjithçka, ku edhe artikulli  i kallxo.com me titullin “Ilir Limaj, bujku që merr subvencione qumështi pa asnjë lopë” e vërteton këtë që po e them.

Në këtë shkrim më tej thuhet se zëvendësministri i ka premtuar grant fermerit, duke i thënë që gjithçka është e kryer, e po të njëjtat gjëra zëvendësministri m’i ka dërguar me sms, duke më bërë presion politik për fermerin në fjalë”, thotë Halimi.

Krahas këtij shkrimi, sekretari potencon se edhe në emisionin “Bujku”, në RTK-së, të datës 14 prill 2019, zëvendësministri Krasniqi është ai që bën nxitjen e fermerëve mashtrues, të cilët bëjnë dallavere për të përfituar nga grantet e ministrisë.

“Edhe në këtë emision, zëvendësministri Krasniqi, i nxit fermerët për të përfituar grante, pavarësisht se të njëjtit bëjnë dallavere duke i dhënë delet e tyre fermerëve tjerë, për të përfituar kundërligjshëm nga ministria”, thekson Halimi.

Si Sekretar i Përgjithshëm i MBPZHR-së, që nga fillimi i mandatit tim e deri më tani, mbetem i përkushtuar vazhdimisht për rritjen e transparencës me qëllim të informimit të publikut dhe si sekretar i ministrisë i bëj thirrje Kohës Ditore dhe gazetarit Besnik Krasniqi që mos t’i ndihmojnë dhe japin  hapësirë shantazheve karshi një  nëpunësi civil, e krahas kësaj edhe zëvendësministrit Vesel Krasniqi, i bëj thirrje që të ndalë shantazhet ndaj meje.

Kalendari

Ngjarjet e datës 24 maj 2019 - Nisin punimet për rregullimin e rrugës kryesoret të qytetit të Deçanit Rrugës së  Qendrës konkretisht rrugës 'Luan Haradinaj' dhe 'Dëshmoret e Kombit'. (Në afërsi të pikës së karburantit Agonisi Gas në Carrabreg, ora 10:00)

- Mbahet mbledhja e komisionit për Mbikëqyrjen e Financave Publike në të cilën do të behët shqyrtimi i Raportit të Auditimit për raportet financiare dhe atyre të deklarimit financiar të subjekteve politike për vitin 2017. (Ndërtesa e Kuvendit, salla N 302, ora 10:00)

- Kryeministri Ramush Haradinaj merr pjesë në ceremoninë e fillimit të punimeve të rrugës së qytetit të Deçanit. (Sheshi i qytetit në Deçan, ora 10:00)

- Drejtori i Zyrës për Rritje Ekonomike i USAID-it në Kosovë, Brian Martalus, do të mbajë një fjalim në hapjen e Konferencës Ekonomike të Diasporës Shqiptare nga Evropa - B2B. (Hotel Emerald, ora 10:00)

- “Let’s Do It” mban aksion pastrimi në disa fshatra të Hasit, me moton “Për një Has të pastër”. (Fshati Gjonaj tek Ura e Drinit të Bardhë, ora 10:00)

- Drejtoresha e misionit të USAID-it Lisa Magno do të flasë me rastin e prezantimit të gjashtë video udhëzuesve për e-prokurim. (Hoteli Swiss Diamond, ora 10:00)

- Mbledhja e komisionit Ad-hoc për përmirësimin dhe forcimin e procesit zgjedhor në të cilën do të behët shqyrtimi i kërkesës së Grupit për Studime Juridike dhe Politike për pjesëmarrje në Grupin Këshillëdhënës. (Ndërtesa e Kuvendit, salla N 303, ora 10:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Kompleksin Memorial “Dëshmorët e Kombit” në Gllogjan. (Kompleksi Memorial “Dëshmorët e Kombit” në Gllogjan, ora 11:00)

- Programi i Kombeve të Bashkuara për Zhvillim, Ministria e Punëve të Brendshme dhe Policia e Kosovës do të shënojnë së bashku Ditën Ndërkombëtare të Grave për Paqe dhe Çarmatim me një konferencë shtypi. (Ambientet e UNDP-së, ora 11:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Fshatin Kodrali. (Fshati Kodrali, ora 11:30)

- Presidenti i Republikës së Kosovës, Hashim Thaçi, merr pjesë në Akademinë Përkujtimore për heroin Abdullah Tahiri. (Teatri Kombëtar i Kosovës, ora 12:00)

- Prokuroria Themelore e Pejës organizon konferencën për media ku temë diskutimi do jetë ngritja e dhjetëra aktakuzave për rastin e njohur në opinionin publik si “veteranët e rrejshëm”. (Objekti i Prokurorisë Themelore të Pejës, rruga “Hasan Cermaxhija”. ora 12:00)

- 44 nxënës nga klasa 7 deri në klasën 9, nga të gjitha regjionet e Kosovës do të takohen për të garuar në finalen e garës së tretë vjetore të gërmëzimit.  (Biblioteka kombëtare, ora 13:15)

- Ministria e Kulturës, Rinisë dhe Sportit organizon ceremoninë e ndarjes  së çmimeve “Nikete Dardani”. (Kabineti i Ministrit të Kulturës, ora 13:30)

- Rinia Demokratike e Kosovës, mban aktivitet në Prizren, te Komuna, lidhur me qeverisjen lokale në Prizren dhe kundër korrupsionit si dukuri negative. (Te Komuna, Prizren, ora 14:00)

 - Shënohet 19 vjetori i themelimit të Aleancës për Ardhmërinë e Kosovës në Gjakovë. (Pallati i Kulturës” Asim Vokshi” , Gjakovë, ora 18:00)

- Organizuar nga Ministria e Diaspores dhe Investimeve Strategjike dhe Rrjeti i Bizneseve të Diasporës Shqiptare mbahet konferenca ekonomike e diasporës shqiptare nga Evropa më B2B. (Hotel Emerald, ora 20:00)

- Kryeministri Ramush Haradinaj merr pjesë në Konferencën Ekonomike të Diasporës Shqiptare nga Evropa, organizuar nga Ministria e Diasporës dhe Investimeve Strategjike dhe Rrjeti i Bizneseve të Diasporës Shqiptare. (Hotel Emerald, ora 20:00)