24 Maj 2019

SHBA shton arsenalin për t’u përballur me kërcënimin nga Irani

Washington, 16 maj - Ushtria amerikane po përgatit arsenalin në Lindjen e Mesme për t’u përballur me një sulm të mundshëm nga Irani. 

Si një demonstrim force dhe një sinjal i qartë për Iranin, një njësi raketash Patriot dhe anija ushtarake USS Arlington do t’u bashkohen katër bombarduesve B-52 dhe aeroplanmbajtëses USS Abraham Lincoln.

Komandatët ushtarakë kërkuan këtë mbështetje të mëtejshme pasi shërbimet e zbulimit pikasën kërcënime të mundshme iraniane ndaj forcave amerikane në tokë dhe në det.

“Është e rëndësishme që Irani të kuptojë se një sulm ndaj amerikanëve apo interesave tona do të marrë përgjigjen e duhur”, tha Sekretari amerikan i Mbrojtjes në detyrë, Pat Shanahan.

Një zyrtar i lartë ushtarak tha se ndër kërcënimet radhiten edhe anije tregtare që Garda Revolucionare e Iranit i ka modifikuar me “paisje ushtarake dhe raketa”.

Por, një ushtarak i lartë britanik i koalicionit kundër Shtetit Islamik iu përgjigj ndryshe pyetjes së Zërit të Amerikës për kërcënimet konkrete.

“Nuk ka patur rritje të kërcënimit nga forcat e mbështetura nga Irani në Irak dhe Siri”, tha Gjeneral Major Chris Ghika, komandanti britanik për strategjinë i koalicionit kundër Shtetit Islamik.

Pas këtij komenti, ushtria amerikane deklaroi se “komentet më të fundit të zëvendëskomandantit të koalicionit bien ndesh me kërcënimet e besueshme të identifikuara nga shërbimet e zbulimit të Shteteve të Bashkuara dhe vendeve aleate për forcat që mbështet Irani në rajon”. Të gjithë ushtarakët që shërbejnë në Irak dhe Siri janë vendosur tashmë në gjendje të lartë gatishmërie.

“Nëse do të gjenim një mënyrë reagimi të kufizuar, mendoj se duhet të veprojmë. Por, nëse e teprojmë, mund të jemi duke lëvizur drejt luftës”, thotë Michael O’Hanlon, i Institutit Brookings.

Zyrtarët thonë se Shtetet e Bashkuara nuk dëshirojnë luftë, por se do të mbrojnë forcat amerikane.

Kalendari

Ngjarjet e datës 24 maj 2019

- Nisin punimet për rregullimin e rrugës kryesoret të qytetit të Deçanit Rrugës së  Qendrës konkretisht rrugës 'Luan Haradinaj' dhe 'Dëshmoret e Kombit'. (Në afërsi të pikës së karburantit Agonisi Gas në Carrabreg, ora 10:00)

- Mbahet mbledhja e komisionit për Mbikëqyrjen e Financave Publike në të cilën do të behët shqyrtimi i Raportit të Auditimit për raportet financiare dhe atyre të deklarimit financiar të subjekteve politike për vitin 2017. (Ndërtesa e Kuvendit, salla N 302, ora 10:00)

- Kryeministri Ramush Haradinaj merr pjesë në ceremoninë e fillimit të punimeve të rrugës së qytetit të Deçanit. (Sheshi i qytetit në Deçan, ora 10:00)

- Drejtori i Zyrës për Rritje Ekonomike i USAID-it në Kosovë, Brian Martalus, do të mbajë një fjalim në hapjen e Konferencës Ekonomike të Diasporës Shqiptare nga Evropa - B2B. (Hotel Emerald, ora 10:00)

- “Let’s Do It” mban aksion pastrimi në disa fshatra të Hasit, me moton “Për një Has të pastër”. (Fshati Gjonaj tek Ura e Drinit të Bardhë, ora 10:00)

- Drejtoresha e misionit të USAID-it Lisa Magno do të flasë me rastin e prezantimit të gjashtë video udhëzuesve për e-prokurim. (Hoteli Swiss Diamond, ora 10:00)

- Mbledhja e komisionit Ad-hoc për përmirësimin dhe forcimin e procesit zgjedhor në të cilën do të behët shqyrtimi i kërkesës së Grupit për Studime Juridike dhe Politike për pjesëmarrje në Grupin Këshillëdhënës. (Ndërtesa e Kuvendit, salla N 303, ora 10:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Kompleksin Memorial “Dëshmorët e Kombit” në Gllogjan. (Kompleksi Memorial “Dëshmorët e Kombit” në Gllogjan, ora 11:00)

- Programi i Kombeve të Bashkuara për Zhvillim, Ministria e Punëve të Brendshme dhe Policia e Kosovës do të shënojnë së bashku Ditën Ndërkombëtare të Grave për Paqe dhe Çarmatim me një konferencë shtypi. (Ambientet e UNDP-së, ora 11:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Fshatin Kodrali. (Fshati Kodrali, ora 11:30)

- Presidenti i Republikës së Kosovës, Hashim Thaçi, merr pjesë në Akademinë Përkujtimore për heroin Abdullah Tahiri. (Teatri Kombëtar i Kosovës, ora 12:00)

- Prokuroria Themelore e Pejës organizon konferencën për media ku temë diskutimi do jetë ngritja e dhjetëra aktakuzave për rastin e njohur në opinionin publik si “veteranët e rrejshëm”. (Objekti i Prokurorisë Themelore të Pejës, rruga “Hasan Cermaxhija”. ora 12:00)

- 44 nxënës nga klasa 7 deri në klasën 9, nga të gjitha regjionet e Kosovës do të takohen për të garuar në finalen e garës së tretë vjetore të gërmëzimit.  (Biblioteka kombëtare, ora 13:15)

- Ministria e Kulturës, Rinisë dhe Sportit organizon ceremoninë e ndarjes  së çmimeve “Nikete Dardani”. (Kabineti i Ministrit të Kulturës, ora 13:30)

 - Shënohet 19 vjetori i themelimit të Aleancës për Ardhmërinë e Kosovës në Gjakovë. (Pallati i Kulturës” Asim Vokshi” , Gjakovë, ora 18:00)

- Organizuar nga Ministria e Diaspores dhe Investimeve Strategjike dhe Rrjeti i Bizneseve të Diasporës Shqiptare mbahet konferenca ekonomike e diasporës shqiptare nga Evropa më B2B. (Hotel Emerald, ora 20:00)

- Kryeministri Ramush Haradinaj merr pjesë në Konferencën Ekonomike të Diasporës Shqiptare nga Evropa, organizuar nga Ministria e Diasporës dhe Investimeve Strategjike dhe Rrjeti i Bizneseve të Diasporës Shqiptare. (Hotel Emerald, ora 20:00)