19 Nëntor 2018

Përmbyllet edicioni i Akademisë së Dialogut të OSBE-së për gra të reja

Vjenë, 22 tetor - Edicioni i katërt i Akademisë së Dialogut të OSBE-së, që mblodhi 24 pjesëmarrëse nga Prishtina dhe Beogradi, u përmbyll në Stadtschlaining të Austrisë.

Për dhjetë ditë me radhë, pjesëmarrëset patën mundësi të zhvillojnë kontaktet personale, shkëmbejnë pikëpamjet rreth çështjes së fuqizimit të gruas në vendimmarrje, të mësojnë për sfidat me të cilat ballafaqohen pjesëtaret e secilës shoqëri, si dhe të trajtojnë shqetësimet e përbashkëta.   

Programi ka përfshirë aktivitete intensive të punës ekipore, ligjërata për” Dialogun, ndërmjetësimin, dhe pajtimin” dhe për “Gratë në politikë” me ekspertë ndërkombëtar, si dhe një shkëmbim pikëpamjesh për dialogun me 6 gra të dalluara nga Prishtina dhe Beogradi – anëtare të iniciativës “Na ndiqni”.

Për t’u njohur me punën që e bën OSBE, pjesëmarrëset dëgjuan Ambasadoren Melanne Verveer, Përfaqësuese Speciale për Çështje Gjinore e Kryesisë së Radhës të OSBE-së dhe Ambasadore e parë e SHBA për Çështje Globale të Grave, duke ndarë përvojat e saja dhe duke u përgjigjur në pyetjet e tyre sfiduese dhe interesante. Krahas kësaj, pjesëmarrëset morën pjesë në një seancë të Këshillit të Përhershëm të OSBE-së dhe u takuan me përfaqësuesit e Kryesisë Italiane të OSBE-së.

“Akademia e Dialogut e OSBE-së për të gra të reja na e rikonfirmoi se politika do t’iu shërbejë grave vetëm atëherë kur gratë përfshihen në të,” tha Kaltrina Ahmeti, pjesëmarrëse nga Prishtina.

Isidora Šmigić nga Beogradi tha: “Akademia e Dialogut e OSBE-së na mësoi se gratë duhet të qëndrojnë së bashku dhe të bashkuara në luftën për të drejtat tona, duke i kapërcyer kështu ndarjet tona etnike, fetare dhe politike. Kjo është mënyra e vetme për ta arritur ndryshim në shoqëritë tona.”

Si vijim, pjesëmarrëset e edicionit të katërt të Akademisë së Dialogut do të takohen në nëntor në Beograd, për vizitën shkëmbyese me alumnit (pjesëmarreset e edicioneve të mëhershme). Ato do t’i zhvillojnë tutje projekt-idetë e tyre për 2019, që kanë për qëllim rritjen e bashkëpunimit dhe promovimin e shkëmbimeve kulturore.

Akademia organizohet çdo vjet nën përkujdesjen e iniciativës “Na ndiqni,” të përkrahur nga Misioni i OSBE-së në Kosovë dhe Misioni i OSBE-së në Serbi, si pjesë e punës së tyre për të forcuar pjesëmarrjen e gruas në dialog dhe zgjidhje të konfliktit si dhe procese të vendimmarrjes.

Iniciativa, që mbledh gra të shquara nga Beogradi dhe Prishtina u lancua në vitin 2012, dhe që nga ajo kohë është ndihmuar nga Misioni i OSBE-së në Kosovë dhe Misioni i OSBE-së në Serbi. 

Kalendari

Ngjarjet e datës 19 nëntor 2018 - Kuvendi i Republikës së Kosovës shënon Diten e Konventës Ndërkombëtare për të Drejtat e Fëmijëve.(Ndërtesa e Kuvendit, salla C 405, ora 10:00)

- Kryeparlamentari Kadri Veseli merr pjesë në Ditën e Konventës Ndërkombëtare për të Drejtat e Fëmijëve. (Ndërtesa e Kuvendit, salla C 405, ora 10:00)

- Mbledhja e Kryesisë së Kuvendit me kryetarët e grupeve parlamentare. (Ndërtesa e Kuvendit, salla  C-301, ora 11:00)

- Programi i Kombeve të Bashkuara për Zhvillim do të përurojë impiantin i për trajtimin e ujërave të zeza në vise rurale në fshatin Kramovik, Komuna e Rahovecit. (Fshati Kramovik, ora 11:00)

- Ministri i Mjedisit dhe Planifikimit Hapësinor, Fatmir Matoshi, do të marrë pjesë në ceremoninë e inaugurimit të Impiantit për Trajtimin e Ujërave të Zeza - moçalishtë e ndërtuar në Kramovik të komunës së Rahovecit. (Fshati Kramovik, ora 11:00)

- Koordinatori Nacional për Kulturë, Rini dhe Sport në Qeverinë e Kosovës, Rexhep Hoti, do të nënshkruajë marrëveshje bashkëpunimi me Kryetarin e Komunës së Ferizajt, Agim Aliu për avansimin e pozitës së të rinjve në sport, kreativitet kulturor dhe mendim kritik dhe në dituri. (Objekti i Komunës së Ferizajt, ora 11:00)

- Kryeparlamentari Kadri Veseli merr pjesë në mbledhjen e Kryesisë së Kuvendit. (Ndërtesa e Kuvendit, salla C 301, ora 11:00)

-  Mbahet ceremonia e nënshkrimit të marrëveshjes së bashkëpunimit ndërmjet Ministrisë së Integrimit Evropian dhe Norvegjisë, me ç’rast nënshkruhet projekti përkrahës i Norvegjisë për ngritjen e kapaciteteve të shërbyesve civilë për zbatimin e MSA-së. (Ndërtesa e Qeverisë, salla e Konferencave P-32, ora 11:00)

- Mbahet sesioni informues i thirrur nga  Fondi i Ballkanit Perëndimor e cila është thirrja e dytë me radhë për propozimet e projekteve rajonale. (Ambientet e Ministrisë së Punëve të Jashtme, ora 11:00)

- Kryeparlamentari Kadri Veseli pret në takim të përbashkët ministrin e Financave, ministrin e Drejtësisë dhe kryeshefin e Agjencisë Kundër Korrupsionit në Kosovë. (Kabineti i Kryeparlamentarit, ora 13:00)

- Kryetari i Nismës Socialdemokrate, Fatmir Limaj, mban takim me të rinjtë e Nismës në Shtime. (Shtëpia e Kulturës në Shtime, ora 16:00)
 
- Kryetari i Nismës Socialdemokrate, Fatmir Limaj, mban takim me të rinjtë e Nismës në Lipjan. (Golden Day në Lipjan, ora 18:00)

- Galeria Kombëtare e Kosovës organizon hapjen e ekspozitës “Muzeu i tri pikave” të artistit Lulzim Zeqiri. (Galeria Kombëtare e Kosovës, ora 20:00)