Kushner në Serbi dhe Kosovë për përmirësim marrëdhëniesh
Paris, 27 shkurt - Ministria e Jashtme franceze njoftoi sot se ministri i Jashtëm, Bernard Kouchner, do të zhvillojë nga e diela deri të martën vizita në Serbi dhe Kosovë për të treguar angazhimin e Francës në ambiciet e tyre evropiane dhe në përmirësimin e marrëdhënieve mes tyre.
Në një konferencë shtypi zëdhënësi i tij, Bernard Valero shpjegoi se "Vizita e Kouchner tregon angazhimin e Francës për zhvillimin e të gjithë rajonit dhe përmirësimin e marrëdhënieve mes Beogradit dhe Prishtinës".
Serbia vazhdon të mos e njohë shpalljen e pavarësisë së Kosovës, më 17 shkurt të vitit 2008 pavarësisht se 65 vende, shumica e të cilave anëtare të BE-së dhe OKB-së, e kanë njohur atë.
"Cilado qofshin mosmarrëveshjet mes Serbisë dhe Kosovës, ekzistojnë fusha rreth të cilave këto vende mund dhe duhet të arrijnë marrëveshje", theksoi Valero.