18 Shkurt 2020

Gjyqtarët e Gjykatës Kushtetuese për vizitë pune në SHBA

Prishtinë, 15 prill - Një delegacion i gjyqtarëve dhe këshilltarëve të Gjykatës Kushtetuese të Republikës së Kosovës, i udhëhequr nga kryetarja e Gjykatës, znj. Arta Rama-Hajrizi, ka udhëtuar për një vizitë pune disaditëshe në Washington.

Gjatë qëndrimit në kryeqytetin amerikan, delegacioni i Gjykatës Kushtetuese do të vizitojë Gjykatën e Qarkut të SHBA-ve për Qarkun e Kolumbisë (DC), Gjykatën e Apelit të Qarkut të DC, si dhe Gjykatën Supreme të Shteteve të Bashkuara, ku do të ketë mundësinë edhe të marrë pjesë në prezantimin dhe në argumentimin oral të rastit, “Shtetet e Bashkuara kundër Davis”.  

Në vazhdim të qëndrimit në Uashington, gjyqtarët dhe këshilltarët e Gjykatës Kushtetuese të Kosovës do të vizitojnë edhe Qendrën Federale Gjyqësore, si dhe Zyrën Administrative të Gjykatave të Shteteve të Bashkuara, për të mësuar më shumë rreth rolit të Zyrës Administrative, etikës gjyqësore në Shtetet e Bashkuara, si dhe raportin e gjyqësorit federal me mediat dhe me publikun.

Pas vizitës në Byronë e Agjencisë USAID për Evropë dhe Euroazi, qëndrimi i delegacionit të Gjykatës Kushtetuese në Uashington do të përmbyllet me vizitën në Fakultetin Juridik të Universitetit Amerikan, ku ndër të tjera, do të diskutohet mbi të drejtën kushtetuese dhe teoritë e interpretimit kushtetues, si dhe interpretimin e kritereve të pranueshmërisë në përzgjedhjen e lëndëve për shqyrtim.

Vizita e delegacionit të Gjykatës Kushtetuese në SHBA është mundësuar me mbështetjen e Programit të USAID-it për Fuqizimin e Sistemit të Drejtësisë në Kosovë (JSSP).
 

Kalendari

Ngjarjet e datës 18 shkurt 2020 - Oda Ekonomike e Kosovës do të mbajë konferencë për media lidhur me rezultatet e anketës të klimës në biznes. (Objekti i Odës Ekonomike të Kosovës, ora 9:30)

- Forumi për Udhëheqje dhe Diplomaci organizon debatin publik me temë “Si duhet ta adresojnë institucionet barazinë gjinore në pozicionet vendimmarrëse?”. (Kafiteri “Dit e Nat” ora 10:00)

- Instituti Demokratik i Kosovës organizon tryezën e diskutimit “Dialogu Kosovë-Serbi: Çfarë pas formimit të Qeverisë së re dhe përfshirjes amerikane?”, në një diskutim rreth të ardhmes së dialogut Kosovë - Serbi. (Hotel Sirius, ora 10:00)

- Zyra Kombëtare e Auditimit prezanton raportin e auditimit të performancës “Sistemi i Përcaktimit të Tarifave të Energjisë Elektrike, Termike dhe atyre të Ujësjellësit”. (Zyra Kombëtare e Auditimit, lagja “Arbëria”, ora 10:00)

- Mbahet mbledhja e parë e rregullt e Komiteti për Politik dhe Financa në Komunën e Rahovecit. (Salla e mbledhjeve të Kuvendit Komunal të Rahovecit, ora 10:00)

- Mbahet mbledhja e Kryesisë së Kuvendit të Republikës së Kosovës në të cilën do të behët propozimi për formimin e grupeve të miqësisë, dhe propozimi i anëtarëve në delegacione për përfaqësim të Kuvendit më organizata ndërkombëtare. (Ndertesa e Kuvendit, salla C 301, ora 11:00)
 
- Korabi Corporation organizon ceremoninë e hapjes së “Qendrës Inovative Korabi”, një qendër unike arsimore në fushën e kulinarisë si dhe do të mbahet “Nata e çokollatës belge”, një spektakël me çokollatën më të mirë në botë, që do të prezantohet nga çokollatrier me famë ndërkombëtare. (Zyrat e Korabi Corporation në Çagllavicë, ora 18:00)