07 Dhjetor 2021

Gërvalla dhe Xhaçka dakordohen për bashkëpunim në diplomaci

Tiranë, 18 tetor - Ministrja e Punëve të Jashtme dhe Diasporës e Republikës së Kosovës, znj. Donika Gërvalla, po qëndron për vizitë zyrtare në Shqipëri. Vizitën e filloi duke takuar homologen e saj, znj. Olta Xhaçka, me të cilën mbajtën edhe konferencë të përbashkët për media.

Me këtë rast ministrja Gërvalla, theksoi se lidhjet institucionale mes Kosovës dhe Shqipërisë janë vazhdimësi e lidhjeve shpirtërore dhe vëllazërore të qytetarëve në të dy anët e kufirit të cilat do të mbahen të forta në çdo kohë.

“Së bashku me ministren Xhaçka diskutuam se si të krijojmë forma të reja të bashkëpunimit për qytetarët tanë, në të dyja vendet."

"Dy shtetet tona janë të lidhura në mënyrë të pandashme dhe nga ne si politikan pritet që të jetësojmë nevojat e qytetarëve tanë për bashkëpunim."

"Këtu mundemi vetëm të shtrojmë pyetjen nëse ne jemi ajo gjeneratë e politikanëve që do ta jetësojmë përmbushjen e këtyre nevojave sepse qytetarët e kanë të qartë çfarë duan”, ka thënë ministrja Gërvalla.

Palët gjatë takimit që patën u dakorduan rreth nevojës për mbikëqyrjen e zbatimi të marrëveshjeve të përbashkët dhe ranë dakord të thellojnë bashkëpunimin në shumë pika me interes të përbashkët. U theksua nevoja për përfaqësim të përbashkët diplomatik në vende të ndryshme të botës.

Dy kryediplomatet u dakorduan të punojnë edhe për ofrim të shërbimeve të përbashkëta konsullore për qytetarët e të dyja shteteve nëpër botë.

Edhe shkëmbimet e diplomatëve të të dyja Ministrive të Jashtme u vlerësua se duhet të ndodhin së shpejti. Po ashtu e panë të nevojshme të krijohet një ofertë serioze për pjesëtarët e mërgatës e cila është e lidhur mes vete, duke përfshirë këtu mësimin e gjuhës shqipe dhe aktivitete të ndryshme kulturore.

Gjatë bisedës, ministrja Gërvalla duke shprehur mirënjohje për mbështetjen e pa rezervë të Shqipërisë ndaj Kosovës në çdo kohë dhe çdo sektor, ka theksuar se fakti që Shqipëria do të jetë pjesë e Këshillit të Sigurimit në dy vitet e ardhshme, është tejet e nevojshme të ketë intensifikim të bashkëpunimit në mënyrë strategjike mes të dy vendeve në mënyrë që të ndihmohet Kosova për forcim të subjektivitetit të saj.

Në këtë drejtim ministrja Xhaçka ka theksuar se Shqipëria do të bëjë gjithçka që është e mundur, pa asnjë rezervë për të shtyrë përpara proceset që lidhen me fuqizimin e Kosovës, anëtarësimin në organizata ndërkombëtare si dhe arritjen e njohjeve të reja.

Bashkëbisedueset janë pajtuar se bashkëpunimi, marrëveshjet aktuale si dhe ato që do të vinë, shkojnë në funksion të forcimit të relatave mes shteteve dhe qytetarëve tanë të cilët do ta kenë më të lehtë bashkëpunimin mes vete.

“Të dyja shtetet udhëhiqemi nga interesi kombëtar për të thelluar ndërveprimin politik, ekonomik, social dhe kulturor dhe për të avancuar procesin e integrimit në Bashkimin Evropian, në shërbim të paqes e stabilitetit”, ka shtuar Gërvalla.

Gërvalla ndër të tjera është ndalur edhe tek procesi i integrimit evropian dhe vështirësitë e tij. Krahas angazhimit të të dyja shteteve për të përmbushur agjendën evropiane dhe për të arritur synimet në këtë rrugëtim ka thënë se po ndodhin vonesa dhe zvarritje të pakuptimta të cilat nuk janë në dorë të Kosovës dhe Shqipërisë.

“Ndonëse Shqipëria ende po pret për Konferencën Ndërqeveritare me BE-në për negociatat, Kosova ka vite që pret përfundimin e procesit të liberalizimit të vizave. Ne kemi bërë gjithçka që është dashur të bëhet për këto procese por vendimmarrja i takon BE-së."

"Megjithatë theksoj se ne jemi të përkushtuar të vazhdojmë punën me reformat e tjera që na presin në rrugën drejt integrimit në BE, duke u fokusuar në forcim të sundimit të ligjit, barazi e mirëqenie më të mirë për qytetarët”, plotësoi më tej.

 Në takimin që patën dy kryediplomatet biseduan edhe për çështje rajonale.  

Në këtë pikë ministrja Gërvalla ritheksoi përkushtimin e Qeverisë së Kosovës ndaj arritjes së marrëveshjeve të përbashkëta në dobi të qytetarëve në kuadër të Procesit të Berlinit, i cili duke pasur BE-në përbrenda, ofron një siguri dhe qëndrueshmëri më të madhe se sa çdo iniciativë tjetër për vendete Ballkanit Perëndimor.

Nga ana e saj, ministrja për Evropën dhe Punët e Jashtme, znj.Olta Xhaçka, ka ritheksuar mbështetjen e parezervë të Republikës së Shqipërisë ndaj Kosovës në të gjitha sektorët e posaçërisht në angazhimin për forcim të subjektivitetit ndërkombëtar.
 

Kalendari

Ngjarjet e datës 7 dhjetor 2021

- Zyra e Rregullatorit për Energji organizon konferencën për integrimin e tregut të energjisë elektrike. (Hotel “Swiss Diamond”, ora 9:00)

-  Komisioni për Administratë Publike, Pushtet Lokal, Media dhe Zhvillim Rajonal shqyrton në parim i Projektligjit për ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të Agjencive të Pavarura. (Ndërtesa e Kuvendit, salla N506, ora 10:00)

- Mbahet ceremonia inauguruese e pranim dorëzimit të detyrës së Kryetarit të Prishtinës ku edhe do të bëhet betimi dhe nënshkrimi i deklaratës solemne për marrjen e detyrës së Kryetarit të ri të Komunës së Prishtinës, Përparim Rama si dhe betimi i anëtarëve të ri të Kuvendit të Komunës së Prishtinës. (Salla e Kuvendit të Komunës së Prishtinës, ora 10:00)

- Ministri i Kulturës, Rinisë dhe Sportit, Hajrulla Çeku raporton para Komisionit për Arsim, Shkencë, Teknologji, Inovacion, KulturÑ‘, Rini dhe Sport. (Ndërtesa e Kuvendit, salla N303, ora 10:00)

- Lëvizja FOL në partneritet me Misionin e Bashkimit Evropian për Sundimin e Ligjit në Kosovë bën lansimin e Raportit “Pajisjet elektronike: fokusi në parandalimin e rasteve të dhunës në familje”. (Hotel Emerald, ora 10:00)

-  Komisioni për Buxhet, Punë dhe Transfere shqyrton Projektligjit mbi Ndarjet Buxhetore për Buxhetin e Republikës së Kosovës për vitin 2022. (Ndërtesa e Kuvendit, salla C203, ora 10:00)

- Komuna e Rahovecit organizon shënimin e Ditës së Bibliotekës Komunale “Sulejman Krasniqi”. (Salla e Kuvendit të Komunës së Rahovecit, ora 11:00)

- Me rastin e Ditës së Bibliotekës Komunale “Sulejman Krasniqi” udhëheqes të Komunës së Rahovecit vizitojn shkollën e mesme të lartë  "Heronjtë e Kosovës" në Hoçë të Vogel. (Fshati Hoçë, ora 11:00)

- Qendra për Informim, Kritikë dhe Aksion së bashku me disa organizata të tjera feministe organizon aksion simbolik lidhur me aktgjykimin seksist të Gjykatës Themelore në Gjilan që shfajësoi pesë burra të akuzuar për përdhunim në grup të një vajze 19 vjeçare në vitin 2012. (Para Këshillit Gjyqësor të Kosovës, ora 12:00)

- Komisioni për Ekonomi, Industri, Ndërmarrësi dhe Tregti mban dëgjim publik për Pakon e projektligjeve të pronësisë industriale si Projektligji për topografitë e gjysmëpërçuesve; Projektligji për dizajnin industrial, si dhe projektligji për patentat. (Ndërtesa e Kuvendit, salla N10, ora 13:00)

- Komisioni për Bujqësi, Pylltari, zhvillim Rural, Mjedis e planifikim hapësinor dhe Infrastrukturë shqyrton Projektligjin për Odat e Arkitektëve dhe Inxhinierëve në fushën e ndërtimit dhe  planin e performancës për vitin 2022 nga Agjencia për menaxhimin e komplekseve memoriale të Kosovës (Ndërtesa e Kuvendit, salla N302, ora 13:00)
 

- Komisioni Qendror i Zgjedhjeve mban mbledhjen e radhës. (Selia e KQZ-së, ora 13:30)