25 Qershor 2019

Finlanda vendi më i lumtur në botë, Kosova radhitet në vendin e 46-të

Prishtinë, 22 mars - Finlanda është klasifikuar si vendi më i lumtur në botë për të dytin vit radhas, në një raport të ri të Kombeve të Bashkuara.

Edhe vendet e tjera nordike, si edhe Hollanda, Zvicra, Kanadaja, Zelanda e Re dhe Austria hynë në 10 vendet më të lumtura në anketën ku u përfshinë 156 vende.

Sudani i Jugut, u radhit i fundit. Edhe vende të tjera të goditura nga lufta ishin në fund të listës.

Ballkani sjell një panoramë të përzier, por më tepër e anuar nga niveli i ulët i lumturisë. Por në këtë panoramë, Kosova është radhitur në vendin e 46-të mjaft lart në krahasim me shumë nga vendet e rajonit.

Ndërsa Shqipëria është në ekstremin tjetër. E radhitur në vendin e 107-ë, ajo është vetëm një vend më lart se Venezuela.

Finlanda njihet për dimrin e ftohtë, pyjet e bukura dhe sistemin e gjerë të ndihmave sociale. Ekonomia e saj është e krahasueshme me atë të vendeve të tjera evropiane. Atëherë çfarë i bën finlandezët aq të lumtur? As ata vetë nuk janë shumë të sigurt.

"Ekonomia jonë është në gjendje të mirë dhe nuk e di, ndoshta jemi vërtet pranë natyrës”, thotë Emilia, një avokate nga Helsinki.

Është e sigurt që nuk është moti, thotë një çift pensionishtësh.

"Nuk mund të jetë klima. Kemi pasur një dimër shumë të gjatë dhe të errët. Por ndoshta është shkalla e sigurisë”, thotë Leena Vaisanen.

“Këtu ke siguri. Nuk ke arsye të jesh i frikësuar gjithë kohën dhe mund t’u besosh njerëzve”, thotë Olli Vaisanen.

Lumturia në Finlandë, konsolidohet nga qasja në natyrë, siguria, kujdesi i përballueshëm për fëmijët, arsimi falas dhe kujdesi shëndetësor që subvencionohet. Edhe pjesa tjetër e 10 vendeve u renditën në krye të listës për arsye të ngjashme.

Është e kuptueshme se pse vende të prekura nga konflikti si Sudani i Jugut, Republika Qendrore Afrikane dhe Afganistani, radhiten në fund. Por Shtetet e Bashkuara të Amerikës, vendi më i fuqishëm dhe ekonomia numër 1 e botës, vazhdoi rënien duke zënë vendin e 19-të këtë vit. Raporti ia atribuon rënien në Shtetet e Bashkuara, depresionit shkaktuar kryesisht nga varësia tek droga, alkooli, kumari dhe media elekronike.

Vendet që kanë pasur rritjen më të madhe dekadën e fundit janë në Evropën Qendrore dhe Lindore, Afrikën Nënsahariane dhe disa në Amerikën Latine.

Jemeni, India, Siria, Botsvana dhe Venezuela kanë pësuar rënien më të thellë.

Raporti analizon faktorët që mund të ndikojnë tek lumturia e një vendi, si prodhimi ekonomik, mbështetja sociale, qeverisja, jetëgjatësia e shëndetshme, mungesa e korrupsionit dhe bujaria. Ai arrin në përfundimin se njerëzit ndjehen më të lumtur kur ndihmojnë të tjerët, por nëse e bëjnë këtë me dëshirën e vet.

Koha në rritje kushtuar mediave sociale, është e lidhur me rënien në nivelin e lumturisë, sidomos mes adoleshentëve.

Njerëzit e lumtur janë më të prirur të votojnë për udhëheqësit aktualë. Rritja e mbështetjes për politikanët populistë mund të jetë rezultat i aftësisë së tyre për të tërhequr votuesit e pakënaqur. Raporti thekson se ka shumë faktorë që përcaktojnë nivelin e lumturisë së një vendi, dhe nuk ka një shpjegim të thjeshtë për të gjitha ato.

"Duhet t’iu kujtosh vetes kur do që të ankohesh për kohën, se jemi vërtet të lumtur këtu. Jemi duke shkuar të pijmë çajin e pasdites!”, thotë Leena Vaisanen.

Një gjë duket se është e qartë: Koha me diell nuk është garanci për lumturinë.

Kalendari

Ngjarjet e datës 25 qershor 2019 - Ministri i Punëve të Jashtme i Republikës së Kosovës, Behgjet Pacolli do ta presë në takim ministren e Punëve të Jashtme të Norvegjisë, Ine Eriksen Søreide. (Hapësirat e MPJ-së, ora 8:30)

- The Siracusa International Institute for Criminal Justice and Human Rigths, një Organizatë Joqeveritare italiane organizon Dialogun Strategjik Kombëtar mbi temën e luftës kundër trafikut të paligjshëm. (Hotel Swiss Diamond, ora 9:00)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të diskutohet lidhur me kërkesat e Këshillit Kombëtar Shqiptar nga vizita e përbashkët e realizuar në Luginë të Preshevës (Ndërtesa e Kuvendi, salla C 203, ora 10:00)

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të mbajë konferencë për media, në të cilën do publikohet raporti analitik: “Dështimet në rastet e shënjestruara”. (Hotel Sirius, ora 10:00)

- Ministri i Arsimit, Shkencës dhe Teknologjisë, Shyqiri Bytyqi, do të vizitojë Shkollën Fillore dhe të Mesme të Ulët “Pjetër Bogdani” në Prishtinë, ku do të bëhet dorëzimi i pajisjeve për klubet e mediave, që është donacion i GIZ-it.  (Shkolla “Pjetër Bogdani”, ora 10:00)

- Koalicioni i OJQ-ve për Mbrojtjen e Fëmijëve në Kosovë organizojnë konferencën për media lidhur me Projektligjin për Mbrojtjen e Fëmijëve. (Sheshi “Ibrahim Rugova” përpara objektit të Kuvendit të Republikës së Kosovës, ora 10:00)

- Kryeministri Ramush Haradinaj pret në takim Ministren e Punëve të Jashtme të Norvegjisë, Ine Eriksen. (Ndërtesa e Qeverisë, ora 10:05)

- Kompania Rajonale e Ujësjellësit Prishtina organizon ceremoninë me rastin e shënimit të ditës më të madhe për qytetarët e Fushë Kosovës, lëshimin në funksion të linjës magjistrale për furnizim 24 h me ujë të pijshëm. (Rr. Hajrullah ZymiFushë Kosovë, ora 10:30)

- Drejtoria e Emergjencës dhe Sigurisë në Komunën e Prizrenit organizon aktivitete solemne me rastin e Ditës së Zjarrfikësve të Prizrenit duke filluar me defileun e automjeteve dhe mjeteve zjarrfikëse në unazën e qytetit. (Nisja nga objekti i Shërbimit Zjarrfikës në Prizren, ora 11:00)

- Ministria e Punëve të Brendshme së bashku me UNDP do të organizojnë konferencën për media për vazhdimin e kampanjës për legalizimin e armëve. (Objekti qendrorë i MPB-së, salla P-02, ora 11:00)

- Kryetari Shpend Ahmeti takohet me Kryetarin e qytetit të Des Moines, Iowa të SHBA,  Thomas  Cownie. (Ndërtesa e vjetër e Komunës, ora 11:00)

- Drejtoria e Administratës në Komunën e Prizrenit në bashkëpunim me OJQ Nevo Koncepti organizon tryezë diskutimi me temën Trajtimi i Fëmijëve në Raste të Dhunës dhe Abuzimit. (Hotel Centrum, ora 11:00)

- Ministri i arsimit, Shyqiri Bytyqi raporton para Komisioni për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi lidhur me tekstet e reja shkollore. (Ndërtesa e Kuvendit, salla N 303, ora 12:00)

- Drejtoria e Emergjencës dhe Sigurisë në Komunën e Prizrenit bën demonstrimin i ushtrimeve të kërkim-shpëtimit dhe shuarjes së zjarrit në objektin e shkollës fillore “Heronjtë e Lumës” në fshatin Vërmicë. (Vërmicë, ora 12:00)

- Balkan Green Foundation, Instituti GAP, Grupi për Studime Juridike dhe Politike dhe Instituti për Politika Zhvillimore organizojnë tryezën e rrumbullakët "Kapacitetet e energjisë së ripërtëritshme dhe kost-efektiviteti i tyre,". (Hotel Sirius, ora 13:00)

- Ministri i Ministrisë së Infrastrukturës dhe Transportit, Pal Lekaj raporton para Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal lidhur me monopolin në fushën e homologimit të veturave. (Ndërtesa e Kuvendit, salla N 303, ora 13:00)

- Mbahet mbledhja e rregullt e Qeverisë së Kosovës. (Ndërtesa e Qeverisë, ora 14:00)

- Banka Evropiane për Rindërtim dhe Zhvillim organizon ceremoninë e nënshkrimit të kredisë prej 18 milionë eurosh që BERZH-i i ka dhënë parkut energjetik me erë të Kitkës. (Hotel Sirius, ora 15:00)

- Kryeministri Ramush Haradinaj merr pjesë në Ekspozitën e Artizanaleve të ndryshme, nga organizata e grave “Orkide”, në Prizren. (Qendra Kulturore “Yunus Emre”, Prizren, ora 18:00)

- Kryeministri Ramush Haradinaj merr pjesë në shënimin e Javës Egjiptiane në Gjakovë. (Pallati i Kulturës “Asim Vokshi”, Gjakovë, ora 19:00)

- Shkolla Amerikane e Kosovës organizon Inagurimi i kampusit të ri të Shkollës Amerikane të Kosovës. (Shkolla Amerikane e Kosovës, Shkabaj, Prishtinë, ora 20:00)