19 Qershor 2019

Deputeti republikan Justin Amash kërkon shkarkimin e Trumpit

Washington, 20 maj - Për herë të parë një republikan ka kërkuar nisjen e procedurës për shkarkimin e presidentit, Donald Trump. Një procedurë të tillë, të njohur si “Impeachment” e kanë kërkuar më parë edhe shumë demokratë.

Deputeti republikan Justin Amash nga shteti Michigan, është anëtari i parë i Kongresit nga radhët e partisë së presidentit Trump, i cili kërkon shkarkimin e tij. Ai ka shkruar së fundi 13 mesazhe në twitter ku shpjegon, se këtë vendim e ka marrë pas një “analize të thellë të raportit Mueller”.

Hetuesi i posaçëm, Robert Mueller ka përgatitur së fundmi një raport, në të cilin është hetuar veprimtaria e presidentit Trump në kohën e fushatës elektorale, para zgjedhjeve të vitit vitit 2016, si dhe mundësia e influencimit të këtyre zgjedhjeve nga Rusia.

Presidenti Trump ka ndaluar me një dekret që të publikohet raporti i plotë i hetuesit. Opinioni është njohur vetëm me disa pjesë të raportit, të cilin ka publikuar ministri i Drejtësisë William Barr, i afërt me presidentin Trump. Kritikët e Trumpit thonë se pikërisht ky dekret ka pamundësuar që opinioni të njihet si duhet me përbërjen e raportit. Qëllimi i Trumpit, sipas tyre, është që Kongresi të mos fillojë ndonjë inciativë për përgjegjësinë e tij.

“Trumpi ka qenë i përzier”

Kongresmeni Amash shkruan në mesazhet e tij, se me prezantimin e pjesshëm të raportit është pretenduar që opinioni të mashtrohet qëllimisht.

“Për dallim prej prezantimit të Barrsit, raporti i Muellerit dëshmon se presidenti Trump ka qenë i përzier në veprime të caktuara, që paraqet bazë të mjaftueshme për kërkesën që presidentit të shkarkohet nga posti”, shkruan Amash, duke shtuar se ka dëshmi të mjaftueshme për pengimin e drejtësisë. “Mbi bazën e këtyre dokumenteve, pa fije dyshimi, do të dënohej secili qytetar tjetër i SHBA që nuk është president”, pohon ai.

Amash shkruan se sistemi politik “check and balance” mbështetet pikërisht tek boshti i ndarjes së obligimeve dhe përgjegjësive në pushtet.

Ai paralajmëron se drejtësia duhet të mbisundojë, sepse kjo është baza e lirisë. Ky është edhe shkaku pse ai para përkatësisë partiake ka vënë luajalitetin ndaj Kushtetutës së vendit. N

ë klimën e përçarjeve ekstreme mes partive, ekziston rreziku që procedura e përgjegjësisë së presidentit dhe shkarkimit nga posti të përdoret më rrallë dhe jo më shpesh, pra nuk ka rrezik nga keqpërdorimi i pushtetit të Kongresit, mendon ai.

Amash është anëtar i grupit konservator të republikanëve, Freedom Caucus dhe mendon të kandidojë kundër presidentit aktual në zgjedhjet e ardhshme, si kandidat i republikanëve. Amash thotë madje se demokratët janë ata të cilët nuk kanë mendim unik për përgjegjësinë e Trumpit.

Deputetja demokratike Rashida Tlaib, nga Michigeni, ka kërkuar që edhe republikanët tjerë të mbështesin kërkesën për largimin e Trumpit nga posti i tij.

Por brenda Partisë Demokratike ka mendime të ndryshme për këto kërkesa. Kryesuesja e Dhomës së Përfaqësuesve, demokratja Nancy Pelosi, paralajmëron se impeachmenti do të thellonte humnerën mes partive në SHBA.

Në historinë e SHBA ka pasur deri tani vetëm dy raste të procedurës për shkarkimin e presidentit nga posti i tij. Me 1868 kundër presidentit Andrew Johnson dhe në vitin 1999 kundër Bill Clintonit, për shkak të aferës me praktikanten Monica Lewinsky.

Në të dy rastet Kongresi ka votuar kundër shkarkimit të presidentit. Ndërsa me 1974, presidenti Richard Nixon e ka evituar një procedurë të këtillë, me dorëheqje për shkak të aferës Watergate.

/DW/

Kalendari

Ngjarjet e datës 19 qershor 2019

- Komisioni Hetimor Parlamentar në lidhje me gjendjen në PTK dhe Vala do të merr vendim për angazhimin edhe të katër ekspertëve për nevoja të komisionit. (Ndërtesa e Kuvendit, salla N 303, ora 9:00)

- Kryetari i Komunës së Gjilanit, Lutfi Haziri, pret në takim ambasadorin e Norvegjisë në Kosovës, Per Strand Sjaastad. (Zyra e kryetarit Haziri, ora 10:00)

- Për nder të Ditës së Çlirimit të Istogut mbahet turnir në ping-pong për nxënës të shkollave. (Saradran, ora 10:00)

- Zyra e BE-së në Kosovë në partneritet me Ambasadën e Suedisë është duke organizuar një ngjarje për nisjen e projektit "Fuqizimi i Sistemit Statistikor në Kosovë 2019-2020". (Agjencia e Statistikave e Kosovës, ora 10:00)

- Mbahet mbledhja e rregullt e Komitetit për Politikë dhe Financa e Komunës së Mitrovicës. (Salla e Mediave të Komunës së Mitrovicës, ora 10:00)

- Mbahet seanca plenare e Republikës së Kosovës. (Ndërtesa e Kuvendit, ora 10:00)

- Mbahet mbledhja e rregullt e Komitetit për Politikë dhe Financa e Komunës së gjashtë të rregullt. (Salla e mbledhjeve të Kuvendit të Komunës së Rahovecit, ora 10:00)

- Ministria e Mjedisit dhe Planifikimit Hapësinor hap zyrtarisht fazën e shqyrtimit publik për hartën zonale. (Ish objektin “Rilindja”, kati përdhese, Amfiteatri i madh, ora 10:30)

- Kryetari i Komunës së Gjilanit, Lutfi Haziri dhe ambasadori i Norvegjisë në Kosovës, Per Strand Sjaastad në mënyrë simbolike bëjnë zbulimin e pllakës së emërtimit të rrugës, te parku i qytetit. (Parku i qytetit në Gjilan, ora 10:30)

- Operatori i Sistemit, Transmisionit dhe Tregut të energjisë elektrike të Kosovës organizon ceremoninë solemne të inaugurimit të Nënstacionit 110/10(20)kV Ilirida - Mitrovica 2, e cila do të mbahet në prani të personaliteteve të shumta si vendore ashtu edhe ndërkombëtare. (Objekti i ri në Mitrovicë, ora 11:00)

- Ministri Kujtim Gashi, do të bëjë përurimin e Stadiumit të Komunës së Kamenicës dhe do të nënshkruan dy memorandume mirëkuptimi për sport dhe rini. (Kamenicë, ora 11:00)

- Komuna e Vitisë dhe Fshati Sllatin e Epërme organizojnë promovimin e librit 'Sllatina e Epërme e Anamoravës - Monografi' e autorëve Fahrush Rexhepi dhe Jusuf Osmani. (Shtëpia e Kulturës në Viti, ora 11:00)

- Zyra e BE-së në Kosovë do të lansojë Fushatën e Administratës së BE-së për Siguri dhe Shëndet në Vend të Punës "Vendet të shëndetshme të punës - Menaxhimi i substancave të rrezikshme 2019”. (Shtëpia e Evropës, ora 11:00)

- Drejtori për Mbrojtje dhe Shpëtim i Komunës së Gjilanit, Sami Spahiu mban konferencë për media për 5 mujorin e punës dhe planifikimin për tre-mujorin e ardhshëm. (Zyra e kryetarit të Komunës së Gjilanit, ora 11:00)

- Me rastin e 8 vjetorit të vdekjes, anëtarë të Kryesisë së LDK-së, bëjnë homazhe te varri i nënkryetares së LDK-së, veprimtares së dalluar të çështjes kombëtare, Nekibe Kelmendi. (Varri i Nekibe Kelmendit, ora 11:00)

- Kryeministri Ramush Haradinaj merr pjesë në përurimin e trafostacionit të ri, në lagjen Fidanishte të Mitrovicës, investim i KOSTT dhe BERZH. (Lagjja Fidanishte, Mitrovicë afër Universitetit Publik “Isa Boletini”, ora 11:30)

- Përfaqësuesit e Brigadës së zjarrfikësve të Saône et Loire, në Francë, bëjnë dorëzimin zyrtar të një automjeti kundër zjarrit dhe 300 veshmbathjeve për zjarrfikësit e Rahovecit. (Agjencia e Menaxhimit të Emergjencave në Hajvali, ora 12:00)

- Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal diskuton lidhur me monopolin në fushën e homologimit të veturave, barriera jo tarifore për importin e veturave të reja që kanë origjinën nga BE, e ftuar Ambasadorja e BE-së në Kosovë Nataliya Apostolova. (Ndërtesa e Kuvendit, salla N204, ora 15:30)

- Me rastin e shënimit të Ditës Ndërkombëtare për Eliminimin e Dhunës Seksuale në Konflikt, zyra e UN Women në Kosovë dhe Ambasada e Shteteve të Bashkuara të Amerikës organizojnë në shfaqjen e dokumentarit "Prokurorët", pasuar nga një diskutim me regjisoren e dokumentarit dhe njehkohësisht fituesen e çmimit Emmy, znj. Leslie Thomas. (Kino Armata, ora 17:00)

- Qendra Kinematografike e Kosovës në bashkëpunim me Komunën e Prishtinës dhe Kino Armatën për nder të njëzet vjetorit të çlirimit të qytetit të Prishtinës organizon Javën e Filmit me shfaqjen e filmave "Gardhi" nga Lendita Zeqiri dhe "me dasht‘ me dasht‘ me dasht‘" nga Ilir Hasanaj. (Kino Armata, ora 20:00)

- Mbahet koncerti Recital për flaut- Erëmira Çitaku dhe harpë - Çağatay Akyol, të udhëhequr nga Dafina Zeqiri-Nushi në bashkëpunim me Festivalin “Tingujt e Flautit”. (Bibloteka Kombëtare e Kosovës, ora 20:30)