18 Janar 2020

LDK: Qeveria nuk ka vizion për arsimin dhe shkencën

Prishtinë, 15 mars - Ekspertë të arsimit nga radhët e Lidhjes Demokratike te Kosovës (LDK), në një konferencë për media thanë sot se qeverisja aktuale nuk ka vizion për arsimin dhe shkencën, duke mos i mbështetur politikisht dhe financiarisht.

 Ekspertë të arsimit nga Lidhja Demokratike e Kosovës, paraqitën disa vërejtje për qeverinë, me theks të veçantë në fushën e arsimit.

Kujtim Shala, tha se qeveria ka bërë investime të pakta dhe të gabuara, duke zvogëluar buxhetin vit pas viti dhe ka diskriminuar komunat që nuk i administron PDK-ja.

“Qeveria aktuale në vijimësi e ka provuar që nuk ka vizion për arsimin dhe shkencën, nuk i mbështet ato politikisht e as financiarisht. Kjo qeveri nuk i respekton ligjet e detyrimet që ka, nuk i respekton dokumentet themelore të fushës së arsimit dhe të shkencës dhe vepron pa politika e pa standarde”, tha Shala.

Shala tha se qeveria ka dëmtuar edhe arsimtarët, të cilëve iu ka borxh pagat me rritje nga janari dhe shkurti i viti të kaluar. Sipas tij, arsimi nuk ka cilësi të duhur e nuk është konkurrent as me vendet e rajonit. Shala paraqiti orientimet politike të LDK-së, të miratuara nga Kuvendi Punues, në të cilat përcaktohet perspektiva evropiane e arsimit dhe e shkencës në Republikën e Kosovës.

“LDK-ja angazhohet për një sistem arsimor gjithëpërfshirës, që siguron kushte për formim cilësor dhe në përputhje me nevojat e tregut të punës e të shoqërisë. LDK-ja do të angazhohet që cilësia dhe efektiviteti në arsim të rriten në të gjitha nivelet dhe të jenë të integruara, përfshirë edhe sistemin e trajnimit dhe atë të kalimit nga shkolla në punë kualitative, me qëllim të krijimit të një strukture punuese me aftësi të lartë”, tha Shala.

LDK-ja e konsideron me rëndësi të veçantë krijimin e një sistemi të integruar për shfrytëzimin efikas të krijimtarisë shkencore-hulumtuese të Kosovës dhe integrimin e Kosovës në Hapësirën Evropiane të Hulumtimeve. Ekspertët e LDK-së, u zotuan se do të punojnë për rritje të vazhdueshme të buxhetit për arsimin dhe shkencën.
 

Kalendari

Ngjarjet e datës 18 janar 2020 - Federata e Futbollit e Kosovës do të fillojë projektit zhvillimor “Elite Youth Development Programme U15”, i cili do të realizohet në të gjitha regjionet. (Fusha e mbuluar “Prince” në lagjen Arbëri në Prishtinë, ora 9:00)

- Kryeministri në detyrë, Ramush Haradinaj merr pjesë në Akademinë Solemne “Faleminderit Shqipëri”. (Qendra “BogdaniPolis”, Katedralja “Shën Nënë Tereza”, ora 10:00)

- Presidenti i Republikës së Kosovës, Hashim Thaçi, do të marrë pjesë në Akademinë Solemne “Faleminderit Shqipëri”.  (Qendra “Bogdanpolis” në Prishtinë, ora 10:00)

- Teatri i Qytetit të Prishtinës 'Dodona' shfaq premierën për fëmijë “Fjalët magjike” nga Alba Loxha e në regji të Shkurtë Aliut e cila trajton nevojën e përdorimit të fjalëve magjike: “më fal”, “të lutem”, “faleminderit” etj., nga fëmijët. (Teatri Dodona, ora 12:00)