11 Dhjetor 2018

Asnjë vendim me gabime nuk ndalon fjalën e lirë

Prishtinë, 15 nëntor - Sot, Rron Gjinovci nga ORCA ka lexuar artikullin në bazë të të cilit është shkruar pjesa e raportit të Admovere, e cila me urdhër të Gjykatës Themelore të Prishtinës është ndaluar nga qarkullimi përkohësisht.

Askush nuk do ta cenoje fjalën e lirë. As një profesor, as një politikan, as një gjykatës, sepse fjala e lirë është themel i shoqërisë sonë, i kulturës evropiane të cilës i përkasim dhe liri e pacenueshme. Është nga ato liritë dhe të drejtat për të cilat ia vlen të vdesësh.

Ne jemi sot këtu që ta sfidojmë censurën. Jemi këtu që të protestojmë kundër vendimit të gjykatësit Adnan Konushevci i Gjykatës Themelore i cili ia ndalon përkohësisht nga qarkullimi organizatës Admovere pjesën e raportit që flet për plagjiaturën e Mejdi Bektashit, profesor në Fakultetin Juridik. Jemi këtu për ta mbrojtur interesin publik, e ai interes është që publiku të informohet rreth shërbimeve që merr nga institucioni publik përmes atyre që paguhen me paranë publike.

Gjykatësi Adnan Konushevci në mënyrë absurde e ka urdhëruar Admovere-n që ta tërheqë nga qarkullimi pjesën e raportit të tyre “Stafi Akademik i UP-së” që flet për plagjiaturën e Mejdi Bektashit, ndërkohë që i gjithë teksti i raportit të Admovere i referohet një artikulli të Gazetës Express të vitit 2007.

Si qenka e mundur që të censurohet një raport në emër të një padije për shpifje, ndonëse raporti bazohet në një artikull publik, në një artikull që asnjëherë asnjë institucion nuk e ka cilësuar si shpifje. Kjo përbën sulm mbi fjalën e lirë, mbi mediet në Kosovë dhe mbi të gjithë hulumtuesit që synojnë ta shpalosin të vërtetën për ndodhitë brenda institucioneve publike.

Nëse kjo qenka bërë e mundur, atëherë është e mundur për një qytetar të Republikës të lexojë një artikull publikisht, sepse këtë s’mund ta ndalojë asnjë gjykatë me asnjë vendim. Nga sot ORCA do lexojë rregullisht këtë artikull, derisa Gjykata e Apelit ta rrëzojë vendimin absurd të gjykatësit Adnan Konushevci.

Ia bëjmë me dije secilit që mendon se mund të na heshtë apo të na zmbrapsë, se me çfarëdo mjeti që vendosni ta bëni këtë do t’ju kthehet veç kundër jush, edhe më keq se që mund ta keni imagjinuar ndonjëherë.
 

Kalendari

Ngjarjet e datës 11 dhjetor 2018 - Organi Shqyrtues i Prokurimit fillon me transmetim të drejtpërdrejtë “live stream” të sesioneve të tij, një hap ky në drejtim të një qasjeje më transparente nga ana e këtij institucioni. (Zyra e Organit Shqyrtues të Prokurimit, ish-Banka e Lubjanës, kati i 5-të, ora 10:00)

- Koalicioni i OJQ-ve “Java Kundër Korrupsionit 2018” do të mbajë tryezën e diskutimit me temë “Zbatimi i Ligjit për Parandalimin e Konfliktit të Interesit në ushtrimin e funksionit publik në pushtetin legjislativ”. (Hotel Sirius, ora 10:00)

- Shoqata “Miqtë e Amerikës” dhe Komuna e Gjakoves hapin Librin e Zisë, në nderim të Presidentit George H.W. BUSH. (Pallati i Kulturës "Asim Vokshi" në Gjakovë, ora 10:00)

- Në kuadër të Fushatës “Ta Pastrojmë Kosovën” do të organizohet aksion pastrimi në Komunën e Rahovecit. (Rruga kryesore në fshatin Zaqisht të Rahovecit, ora 10:00)

- Shefi i Zyrës së BE-së, Nataliya Apostolova, do të diskutojë me nxënësit e shkollave të mesme me temë "Të mbështesë ndryshimin kulturor: roli i gjeneratave të reja për formësimin e vlerave të së nesërmes".  (Kafiteria Dit' e Nat', ora 10:00)

- Kompania vendore 'Produktet Natyrale të Kosovës' organizon ceremoninë e inaugurimit të linjës së re me teknologji të avancuar për përpunimin e farave të kungullit. (Fabrika 'Produktet Natyrale të Kosovës' në fshatin Loxhë në Pejë, ora 11:00)

- Sindikata e Pavarur e Sektorit Privat të Kosovës të mbajë konferencë për shtyp lidhur me gjendjen e punëtorëve të sektorit privat. (Zyret te BSPK, së ora 11:00)

- Instituti Demokraci për Zhvillim organizon ngjarjen vjetore të shpërblimeve në kuadër të projektit “Leja prindërore për barazi gjinore” që financohet nga Qendra Ndërkombëtare Olof Palme dhe mbështetet nga Qeveria Suedeze. (Libraria Dukagjini, ora 11:00)

- Mbahet tryeza në të cilën do të diskutohet për pakon ligjore kundër korrupsionit, si dhe për punën e institucioneve të drejtësisë në luftën ndaj krimit të organizuar dhe korrupsionit. (Ndërtesa e Kuvendit, salla C-405, ora 11:00)

- Asociacioni i Arkitektektëve të Kosovës dhe Komunës së Gjilanit bën prezantimin e “Bienales së Arkitekturës 2018”, ku do të marrin pjesë edhe përfaqësuesit e Komunës së Gjilanit dhe arkitektët në nivel Kosove dhe ata regjional. (Gjilan, ora 13:00)

- Instituti për Politika Zhvillimore organizon konferencën për shtyp me temë “Standardizimi i produkteve vendore: Shpërndarja dhe shitja e standardeve. (Resource Center Kosovo, në lagjen Pejton, në zyre të Forumit për Iniciativa Qytetare, ora 13:00)

- Koalicioni i OJQ-ve “Java Kundër Korrupsionit 2018” do të organizoj tryezen e diskutimit me temë “Zbatimi i Ligjit për Parandalimin e Konfliktit të Interesit në ushtrimin e funksionit publik në pushtetin ekzekutiv”. (Hotel Sirius, ora 14:00)

- Partia Socialdemokrate mban konferencë për media lidhur me çështjen e dialogut me Serbinë, për të cilën do të flasin nënkryetarët Visar Ymeri dhe Dukagjin Gorani. (Zyrat e PSD-së, në lagjen "Arbëria", ora 14:00)

- Ministria e Administrimit të Pushtetit Lokal në prag të përfundimit të vitit 2018, organizon ngjarjen vjetore për shënimin e të arriturave në vetëqeverisjen lokale në Kosovë si dhe të prezantojë orientimet për vitin e ardhshëm. (Sheshi 21, ora 18:00)