SBASHK kërkon që të mos nënshkruhet përbërja e re e KES-it
"Kemi pritur që MPMS-ja do të na kthej një përgjigje sepse jemi Sindikata më e madhe dhe më aktivja në Kosovë. Pasi nuk ka marrë as edhe një përgjigje kjo sindikatë që nga 1 tetori ka bërë përpjekje të takohet me ministrin Rashiq duke i dërguar kërkesë me shkrim e duke tentuar që përmes përgjegjësve të kabinetit të tij të pajtohemi për një datë dhe për një takim të shkurtër konsultativ. Ministri Rashiq ishte vazhdimisht i zënë e me shumë angazhime dhe ne këtë e kuptojmë, por nga 1 tetori e deri sot është dashur të gjejë pesë minuta edhe për ne."
"Ministri Rashiq Ju do të vazhdoni të jeni i zënë dhe në pamundësi që të na takoni, ne po Ju drejtohemi publikisht me kërkesën që të mos e nënshkruani përbërjen e re të Këshillit Ekonomik-Social sepse me përbërjen e propozuar nga Komisioni, që nuk është dashur të jetë në atë përbërje, gjithë interesat dhe kërkesat e shumta të punëtorëve të arsimit dhe të sektorëve të tjerë nga shërbimet publike, do t’i “mbrojnë” 5 të deleguar nga BSPK-ja. Kjo nuk është e pranueshme për ne z.Ministër."
"Ne jemi sindikata me më së shumti anëtarë dhe përfaqësojmë një sektorë tepër të rëndësishëm dhe me plot zhvillime e halle. Ministria e Arsimit është në KES si përfaqësuese e Qeverisë. Pse të mos jemi edhe ne aty kur i gjithë dialogu social për arsimin, kryesisht, zhvillohet në relacionin MASHT-SBASHK e vend më të qëlluar për këtë dialog nuk ka se në takimet e KES-it."
"I nderuari Ministër Rashiq pasi Ju nuk keni kohë të lirë për t’u ballafaquar me këto vërejtje, urojmë që vartësit tuaj në MPMS ta lexojnë të publikuar këtë kërkesë tonën dhe me rastin kur do të gjeni disa minuta dhe do të nxirrni lapsin duke dashur ta nënshkruani përbërjen e re të KES , ata do t’u tregojnë se, jo vetëm SBASHK-u, por edhe Sindikata e Shëndetësisë, e Policisë dhe të tjera Sindikata janë kundër përbërjes së KES-t me 5 përfaqësues nga BSPK-ja e me as edhe një përfaqësues nga sindikatat më të forta e më aktive të Kosovës."
"Ministër Rashiq mos e nënshkruaj përbërjen e re të KES-it pa gjetur pak kohë të takohesh me përfaqësues të SBASHK-ut dhe të Sindikatave tjera që kanë reaguar", thuhet në fund të letrës.
