Prishtinë, 22 qershor - Komiteti Drejtues Ndërministror mori vendim për aprovimin e shpalljes së interesit për ndërtimin e autostradës R6, segmentit Prishtinë – Hani i Elezit.

Mbledhja e parë e Komitetit Drejtues Ndërministror, i themeluar me vendimin e Qeverisë së Kosovës, për zhvillimin e projektit “Rruga 6”, autostradës Prishtinë – Hani i Elezit, është mbajtur të premten që e kryesoi ministri i Infrastrukturës, Fehmi Mujota dhe në të cilin morën pjesë edhe anëtarët e Komitetit, zëvendëskryeministrja dhe ministrja e Industrisë dhe Tregtisë, Mimoza Kusari-Lila, ministri i Financave, Bedri Hamza, ai i Zhvillimit Ekonomik, Besim Beqaj dhe ministri i Ambientit dhe Planifikimit Hapësinor, Dardan Gashi.

Po ashtu në këtë mbledhje komiteti Drejtues Ndërministror mori vendim për aprovimin e shpalljes së tenderit për Këshilltarin për Shërbime të Transaksioneve për projektin e autostradës R6 dhe për autorizimin e Ministrisë së Infrastrukturës që t’i zhvillojë procedurat e nevojshme lidhur me projektin e autostradës R6 Prishtinë – Hani i Elezit.

Ndryshe projektin e autostradës Prishtinë-Shkup, e ka bërë kompania franceze “Egis BCEOM Internationale” Gilles Pequeux. Gjatësia e këtij projekti është 55 kilometra, me dy seksione, seksioni verior duke filluar nga veriu i Lypjanit e deri në Kaçanik me një distancë prej 42 kilometrash, ndërsa seksioni jugor, duke filluar nga Kaçaniku deri në kufi me Maqedoninë me një distancë prej 13 kilometrash.

Ndarja e këtij projekti është në dy seksione që lejon kryerjen e ndërtimit në disa faza, në qoftë se është e kërkuar. Në pjesën veriore projektimi i trasesë kryesore është në përputhje me standardet e TEM për karakteristikat gjeometrike, për një shpejtësi prej 120 kilometra në orë.

Rruga për këtë pjesë është projektuar me dy korsi me nga 3.75 m secila, brezi i gjelbër 4metra, shiriti ndihmës 3 metra dhe gjerësia e përgjithshme 28 metra, në pjesën jugore kufizimet topografike së bashku me kufizimet e mjedisit dhe nevojën për të siguruar një projektim me një kosto efektive, ka quar në vendimin për të ulur shpejtësinë projektuese në 100 kilometra në orë. Në seksionin verior do të ketë 33 mbikalime dhe nënkalime, 1 kalim hekurudhor, 4 ura mbi lum dhe 34 struktura hidrologjike, ndërsa në atë jugor do të ketë 2 viadukte të mëdha, 7 viadukte të tjera, 8 mbikalime dhe nënkalime, 1 nënkalim këmbësorësh dhe 13 struktura hidrologjike.
Sa u përket tuneleve, projektuesi në pjesën jugore ka parashikuar ndërtimin e tri tuneleve, e që secili përmban dy tuba një drejtimesh me dy korsi trafiku në çdo tub, me korridoret ndihmëse midis tubave të afërm çdo 300 metra.

Ndërsa, sa i përket gjatësisë së tuneleve, ai i Kaçanikut do të jetë 2.2 kilometra, i Laçit 0.9 kilometra dhe i Kashanit 0.2 kilometra. Projekti është paraparë, që të përfshihen të gjitha pajisjet e sigurisë sipas standardeve n ndërkombëtare, si rrethojat mbrojtëse, sinjalizime dhe mesazhe të trafikut të llojeve të ndryshme, shenja rrugore etj.  Kryqëzimet përgjatë projektit do të ndahen sipas klasave, nuk do të lejohet tjetër qasje në autostradë, e këto janë paraparë në: Lipjan, babush i Muhaxherëve, Ferizaj, Doganaj dhe Hani i Elezit në Kufi me Maqedoninë. Projektuesi ka paraparë që ndërtimi i seksionit verior të përfundojë midis 30 muajsh ndërsa ai jugor 36 muaj duke përfshirë edhe tunelet.