Rusia zgjat ndalimin e importit të prodhimeve bujqësore perëndimore
Ndalimi, që përfshin kryesisht artikuj ushqimorë të importuar nga SHBA-ja, BE-ja, Australia, Kanadaja dhe Norvegjia do të zgjatet deri në qershorin e vitit 2016.
Në listën e artikujve përfshihen fruta, perime, mish, peshk, qumësht, mish shpendësh dhe prodhime qumështi. Putin tha se ndalimi i importeve është përgjigje ndaj sanksioneve perëndimore, të vendosura për konfliktin në lindje të Ukrainës.
\"Siç propozoi kreu i qeverisë ne do të zgjasim afatin e masava ndaj sanksioneve perëndimore edhe një vit, duke nisur nga dita e sotme. Mendoj se ky do të jetë një udhëzues i mirë për prodhuesit vendës.\"
Në fillim të javës BE-ja zgjati afatin e sanksioneve ekonomike ndaj Rusisë deri në janar të vitit 2016, si masë ndëshkuese për të ndikuar në zgjidhjen e konfliktit në lindje të Ukrainës.
Sanskionet në sektorin e energjisë, mbrojtjes dhe financave ishin reagimi i BE-së ndaj aneksimit të Krimesë nga Rusia dhe përkrahjes së rebelëve në lindje të Ukrainës.
Moska zyrtare i ka mohuar këto akuza të perëndimorëve.
